ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕް 2024 ގެ ޖޫނިއަރ ފިރިހެން ބައިގެ ކުއާޓާ ފައިނަލުން ރާއްޖޭގެ ޔޫސުފް ކަޔާން ހަމްދާން ޒަކީ، ޞައްޔިދު ޞަލާހުއްދީން އަދި ކަޔާން އަބްދުالله އަރީފް ޖާގަ ހޯދައިފިއެވެ.
ޖޫނިއާ ބައިގެ ތިންވަނަ ބުރުގެ ހީޓުތައް މިއަދު ކުރިއަށްދިޔައިރު، ޖޫނިއާ އޭ ޓީމުގައި ހިމެނޭ ކަޔާން ޒަކީ ވަނީ ހީޓު ހަތަރެއްގެ އެއްވަނަ ހޯދާފައެވެ. އެގޮތުން މި ހީޓުގައި އޭނާ ވަނީ 8.97 ސްކޯ ކޮށްފައެވެ. ޖޫނިއާ ޓީމުގެ ކެޕްޓަން ޞައްޔިދު ވާދަކޮށްފައިވަނީ ހީޓު ފަހެއްގައެވެ. މި ހީޓުގެ ދެވަނައަށް ޞައްޔިދު ދިޔައިރު، އޭނާ ވަނީ 8.27 ސްކޯ ކޮށްފައެވެ.
މީގެ އިތުރުން ހީޓު އެކެެއްގެ ދެވަނަ ޖޫނިއާ ބީ ޓީމުގައި ހިމެނޭ ކަޔާން އަރީފް ހޯދިއިރު، އޭނާގެ ސްކޯ އަކީ 8.80 އެވެ. މި ހީޓުގައި ޖޫނިއާ ބީ ޓީމުގައި ހިމެނޭ މުޙައްމަދު އިނާންވެސް ވާދަކުރިއިރު، އޭނާ ދިޔައީ ހަތަރުވަނައަށެވެ. އެގޮތުން މި ހީޓުގައި އިނާން އަށް ސްކޯ ކުރެވުނީ 7.14 އެވެ.
ޖޫނިއާ ބައިގެ ތިންވަނަ ބުރުގައި ދެން ވާދަކޮށްފައިވަނީ އޭ ޓީމުގައި ހިމެނޭ ޔާސިން އަޙްމަދު ނާޝިދެވެ. ހީޓު ތިނެއްގައި ވާދަކުރި ޔާސިން ތިންވަނައަށް ދިޔައިރު، އޭނާއަށް ސްކޯ ކުރެވުނީ 8.43 އެވެ.
މީގެ އިތުރުން މިއަދު ވަނީ މެންސް އޯޕަން ބައިގެ ކުއާޓާ ފައިނަލް ހީޓުތައް ކުރިއަށް ގެންގޮސްފައެވެ. އެގޮތުން ހީޓު އެކެއްގައި ރާއްޖޭގެ ސީނިއާ ޓީމުގައި ހިމެނޭ ހޫދު އަޙްމަދު ވާދަކުރިއިރު، އޭނާ ދިޔައީ ތިންވަނައަށެވެ. މި ހީޓުގައި ހޫދަށް ސްކޯ ކުރެވުނީ 9.10 އެވެ.