ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕް 2024 ގެ މެންސް އޯޕަން ބައިގެ ހަތަރުވަނަ ބުރުގައި ވާދަކޮށް، ރާއްޖޭގެ ސީނިއާ ޓީމުގައި ހިމެނޭ ހޫދު އަޙްމަދު ކުއާޓާ ފައިނަލުގެ ޖާގައެއް ހޯދައިފިއެވެ.
މެންސް އޯޕަން ބައިގެ ހަތަރުވަނަ ބުރުގެ ހީޓުތައް މިއަދު ކުރިއަށްދިޔައިރު، އޭނާ ވާދަކޮށްފައިވަނީ ހީޓު ތިނެއްގައެވެ. މި ހީޓުގައި ދެން ހިމެނުނީ ރާއްޖޭގެ ބީ ޓީމުގައި ހިމެނޭ އިސްމާޢީލް ރަޝީދު (ސްމައިލީ) އާއި، އިންޑޮނޭޝިއާގެ އައި މޭޑް ޕަޖަރް އަރިޔާނާ އަދި ކޮރެއާގެ ކަނޯއަ ހީޖޭ ޕަލްމިއާނޯއެވެ.
ކުއާޓާގެ ޖާގައެއް ހޫދު ހޯދީ ހީޓުގެ ދެވަނަ ހޯދައިގެންނެވެ. އެގޮތުން މި ހީޓުގައި ހޫދު ވަނީ 8.40 ސްކޯ ކޮށްފައެވެ. އެއްވަނައަށް ދިޔަ ޕަޖަރް އަރިޔާނާ 11.84 ގެ ސްކޯއެއް ހޯދިއިރު، ތިންވަނައިގައި ނިންމި ކަނޯއަ ހީޖޭ ވަނީ 8.17 ސްކޯ ކޮށްފައެވެ. އަދި މި ހީޓުގެ ހަތަރުވަނައަށް ރާއްޖޭގެ ސްމައިލީ ދިޔައިރު، އޭނާއަށް ސްކޯ ކުރެވުނީ 5.94 އެވެ.
ހަތަރުވަނަ ބުރުގައި ވާދަކޮށް ކުއާޓާގެ ޖާގައެއް ހޫދު ހޯދިއިރު، އޭނާގެ އިތުރުން ރާއްޖޭގެ ތިން އެތުލީޓެއްވެސް ވަނީ ހަތަރުވަނަ ބުރުގައި ވާދަކޮށްފައެވެ. އެގޮތުން ސީނިއާ ޓީމުގެ ކެޕްޓަން އަޙްމަދު އާގިލް (އައްމަޑޭ) ހީޓު ދޭއްގައި ވާދަކުރިއިރު، އޭނާ ދިޔައީ ތިންވަނައަށެވެ. މި ހީޓުގައި އައްމަޑޭއަށް ސްކޯ ކުރެވުނީ 7.60 އެވެ. އަދި ހީޓު ހައެއްގައި ވާދަކުރި ރާއްޖޭގެ ސީނިއާ ޓީމުގެ އިސްމާޢީލް މިގުލާލް ދިޔައީ ހަތަރުވަނައަށެވެ. މި ހީޓުގައި އޭނާއަށް ސްކޯ ކުރެވުނީ 8.57 އެވެ.