ސައުދީ ޕްރޯ ލީގަށް އަލަށް ޕްރޮމޯޓްވި އަލް ގަދްސިއާ އާއި އަލަށް ގުޅުނު ސްޕޭނުގެ ނާޗޯ ފެނާންޑޭޒް އާއި ގެބޮންގެ އަބަމިއަންގް ލީގުގެ ފުރަތަމަ މެޗަށް ކެތްމަދުވެފައިވާ ކަމަށް ބުނެފި އެވެ.
ސައުދީ ލީގު މިއަދު ފަށާއިރު، އަލް ގަދްސިއާގެ ފުރަތަމަ މެޗުގައި މާދަމާ ނިކުންނާނީ އަމިއްލަ ދަނޑުގައި އަލް ފާތިހް އާއި ދެކޮޅަށެވެ.
ކުރިން ސްޕޭނުގެ ބާސެލޯނާ އާއި ޖަރުމަނުގެ ބޮރޫޝިޔާ ޑޯޓްމަންޑްގެ އިތުރުން އިނގިރޭސިވިލާތުގެ ޗެލްސީ އާއި އާސެނަލްއަށް ކުޅެފައިވާ އުމުރުން 35 އަހަރުގެ އަބަމިއަންގް ގަދްސިއާ އާއި ގުޅިފައިވަނީ އަހަރަކު 8.5 މިލިއަން ޕައުންޑްގެ މުސާރައަކަށް ކަމަށް މީޑިޔާ ރިޕޯޓްތައް ވަނީ ބުނެފައެވެ.
އާ ސީޒަން ފެށުމުގެ ކުރިން އަބަމިއަންގް ބުނެފައިވަނީ ޔޫރަޕްގެ ވަރަށް ގިނަ ކްލަބްތަކަށް ކުޅެ ގިނަ ކާމިޔާބީތަކެއް ހޯދިފައިވާ ކަމަށާއި އަދި މިއީ ބަދަލެއް ތަޖުރިބާ ކޮށްލަން ރަގަޅު ވަގުތުކަމަށް ގަބޫލުކުރާ ކަމަށެވެ. އަދި އޭނާގެ ތަޖުރިބާ ގަދްސިއާގެ ޒުވާން ކުޅުންތެރިންނަށް ލިބުމަކީ އެ ކްލަބަށް ލިބިގެންދާނެ ކުރިއެރުމެއްކަމަށްވެސް އަބަމިއަންގް ވަނީ ބުނެފައެވެ.
ސްޕޭނުގެ ރެއާލް މެޑްރިޑްގެ ޔޫތު އެކަޑެމީ އާއި 2001 ވަނަ އަހަރު ގުޅުނު ފަހުން މެޑްރިޑްގައި އެތައް އަހަރެއް ހޭދަކޮށްފައިވާ ނާޗޯ ގަދްސިއާ އަށް ސޮއިކޮށްފައިވަނީ ޔޫރޯ ފުޓްބޯޅަ މުބާރާތުގެ ތެރޭގައެވެ.
އުމުރުން 34 އަހަރުގެ ނާޗޯ ކުރިން ބުނެފައިވަނީ ފުޓްބޯޅަ ކެރިއަރު ހުއްޓާލަން އަދި ބޭނުން ނުވާ ކަމަށައި އެހެންކަމުން ދެން ވިސްނާނީ ރެއާލް މެޑްރިޑާއި ދެކޮޅަށް ކުޅެން ނުޖެހޭނެފަދަ ޓީމަކަށް ކުޅުމަށް ކަމަށެވެ.
ސައުދި އަރަބިއްޔާގެ މަޝްހޫރު އަރަމްކޯ ކުންފުނިން ހިންގާ ގަދްސިއާ އާ ސީޒަނަށް ވަރުގަދަ ކުރުމުގެ ގޮތުން އެ ކްލަބަށް ވަނީ ގިނަ ކުޅުންތެރިންތަކެއް ގެންގޮސްފައެވެ.