ޕޯޗުގަލްގެ ފޯވަޑް ޖޮއާއޯ ފެލިކްސް ހަތް އަހަރުގެ އެއްބަސްވުމެއްގެ ދަށުން އިނގިރޭސި ޕްރިމިއާ ލީގުގެ ކްލަބް ޗެލްސީއަށް ސޮއިކޮށްފި އެވެ.
އުމުރުން 24 އަހަރުގެ ފެލިކްސް ޗެލްސީއަށް ސޮއިކޮށްފައިވަނީ ސްޕޭނުގެ އެތްލެޓިކޯ މެޑްރިޑް އިން 45 މިލިއަން ޕައުންޑްގެ ޓްރާންސްފާ ފީއަކަށެވެ. މިއީ އޭނާ ޗެލްސީއަށް ބަދަލުވި ދެވަނަ ފަހަރެެވެ. މީގެ ކުރިން ފެލިކްސް ވަނީ ލޯނު އެއްބަސްވުމެއްގެ ދަށުންވެސް ޗެލްސީއަށް ކުޅެފައެވެ.
ލޯނު އެއްބަސްވުމުގެ ދަށުން ޗެލްސީގައި ފެލިކްސް 2022-23 ވަނަ އަހަރުގެ ސީޒަނުގައި ހޭދަކުރި ދުވަސްވަރު އޭނާ ވަނީ ޗެލްސީއަށް ކުޅެދިން 20 މެޗުގައި 4 ގޯލު ކާމިޔާބުކޮށްދީފައެވެ. އަދި އޭގެ ފަހުން ލޯނު އެއްބަސްވުމެއްގެ ދަށުން ފެލިކްސް ވަނީ ސްޕޭނުގެ ބާސެލޯނާއަށްވެސް ކުޅެފައެވެ.
ޗެލްސީއަށް ބަދަލުވުމަށްފަހު ފެލިކްސް ބުނެފައިވަނީ ޗެލްސީއަށް އެނބުރި އާދެވުމުން އުފާ ކުރާ ކަމަށާއި އަދި އެ ކްލަބާއިއެކު އޭނާގެ ކެރިއަރު ފަށައިގަންނަން ކެތްމަދުވެފައިވާ ކަމަށެވެ.
2019 ވަނަ އަހަރު ފެލިކްސް އެތްލެޓިކޯ މެޑްރިޑަށް ސޮއިކޮށްފައިވަނީ އެ ކްލަބުގެ ރެކޯޑް ފީއެއް ކަމުގައިވާ 140 މިލިއަން ޑޮލަރުގެ ފީއަކަށެވެ. އަދި އެތްލެޓިކޯއަށް ކުޅުނު 131 މެޗުގައި އޭނާ ވަނީ 34 ގޯލު ޖަހާފައެވެ. އަދި 2021 ވަނަ އަހަރުގެ ލަލީލާ ޓައިޓަލް އެތްލެޓިކޯ މެޑްރިޑްއިން ކާމިޔާބުކުރިއިރު އޭނާ ވަނީ މުހިންމު ދައުރެއް އަދާކޮށްފަ އެވެ.