ނޭޕާލުގައި މިހާރު ކުރިއަށްދާ 20 އަހަރުން ދަށުގެ ސާފް ޗެމްޕިއަންޝިޕުގައި މިއަދު އެއް ކުޅުންތެރިއަކު މަދުކޮށް ކުޅުނު ބޫޓާނުން ފަހު ވަގުތު ލަނޑު ޖަހައި ރާއްޖެ ބަލިކޮށްފިއެވެ.
ގްރޫޕް ބީގައި ރާއްޖެއިން ކުޅުނު ފުރަތަމަ މެޗުން ބަލިވީ 2-1 ގެ ނަތީޖާއަކުންނެވެ. މިއީ މި ފަހުން ބޫޓާންގެ ޓީމަކުން ރާއްޖެ އަތުން ކާމިޔާބު ހޯދި ތިންވަނަ ފަހަރެެވެ.
އަންފާ ސްޕޯޓްސް ކޮމްޕެލްސް ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ބޫޓާނުންނެވެ. މެޗުގެ 21 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޖެޓްސުއެން ޑޯޖީއެވެ.
މި މެޗުގެ ދެވަނަ ހާފުގެ ކުރީކޮޅު ރާއްޖޭގެ ކެޕްޓަން ޝަނާން ރަޝާދު ޖައްސާލި ބޯޅައެއް، އޭރިއާ ބޭރުން ބޫޓާންގެ ގޯލްކީޕަރު ސޯނަމް ޓެންޒިންގެ އަތުގައި ޖެހުމުން، އޭނާއަށް ރެފުރީ ވަނީ ސީދާ ރަތް ކާޑެއް ދައްކާފައެވެ. އެއާއެކު އޭރިއާ ރޮނގުމަތިން ލިބުނު ހިލޭ ޖެހުން ރާއްޖޭގެ އިޝްއާފް އަޙްމަދު ފިރާގު ވަނީ ގޯލުގެ ތިރީ ކަނަށް އަމާޒުކޮށްލާފައެވެ.
އެއް ކުޅުންތެރިއަކު މަދުކޮށް ކުޅުނު ބޫޓާނުން އަލުން ލީޑު ނަގާފައިވަނީ މެޗުގެ އިތުރު ވަގުތުގެ ފުރަތަމަ މިނެޓުއެވެ. މި ލަނޑު އެ ޓީމަށް ކާމިޔާބުކޮށްދިނީ ބަދަލަކަށް ކުޅެން އެރި ނަގަވާން ޗޮޕެލްއެވެ.
މި މެޗުން ބޫޓާން މޮޅުވިއިރު، ގްރޫޕް ބީގެ ފުރަތަމަ މެޗުގައި އެ ޓީމު ވަނީ އިންޑިއާ އަތުން 1-0 ގެ ނަތީޖާއަކުން ބަލިވެފައެވެ. މި ގްރޫޕުގެ ފަހު މެޗުގައި އަންނަ ހުކުރު ދުވަހު އިންޑިއާ އާއި ރާއްޖެ ބައްދަލުކުރާއިރު، ރާއްޖެއަށް ސެމީގެ ފުރުސަތެއް އޮތީ އެ މެޗުން މޮޅުވެގެންނެވެ.