ޖަޕާނުގައި 2026 ވަނަ އަހަރު ބޭއްވުމަށް ހަމަޖެހިފައިވާ އޭޝިއަން ގޭމްސްގެ ސާފިން އަންހެން ޑިވިޝަނުން ރާއްޖެ ފުރުސަތު ހޯދައިފިއެވެ.
މި ފުރުސަތު ރާއްޖެއަށް ލިބުނީ ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕް 2024 ގެ ވިމެން އޯޕަން ބައިގެ ތިންވަނަ ބުރުގެ ހީޓު އެކެއްގައި ރާއްޖޭގެ މަރިޔަމް ރާހިލް ނަސީމް (އާޔާ) ވާދަކޮށް، ހީޓުގެ ތިންވަނަ ހޯދުމުންނެވެ. އެގޮތުން މި ހީޓުގައި އާޔާ ވަނީ 4.2 ސްކޯއެއް ކޮށްފައެވެ.
މި އާއެކު އޭޝިއަން ގޭމްސްއިން ދެކުނު އޭޝިއާ ސަރަހައްދުގެ ޖާގަ ރާއްޖެއަށް ލިބުނުއިރު، ތިންވަނަ ބުރުގައި ދެކުނު އޭޝިއާ ސަރަހައްދުން ވާދަކޮށްފައިވަނީ އާޔާގެ އިތުރުން ސްރީ ލަންކާގެ އެތުލީޓަކާއި އިންޑިއާގެ އެތުލީޓެކެވެ. އެ ދެ އެތުލީޓުންވެސް ދިޔައީ ވާދަކުރި ހީޓުތަކުގެ ފުލަށެވެ.
މި ނަތީޖާއާއެކު އޭޝިއަން ގޭމްސްގެ އަންހެން ސާފިން އިވެންޓުގައި ވާދަކުރުމުގެ ފުރުސަތު ރާއްޖެއަށް ލިބުނުއިރު، ގޭމްސްގައި ވާދަކުރާނެ އެތުލީޓެއް ކަނޑައަޅާނީ މޯލްޑިވްސް ސާފިން އެސޯސިއޭޝަން (އެމްއެސްއޭ) އިންނެވެ.
މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕުގެ އަންހެން ބައިގައި އާޔާގެ އިތުރުން ވާދަކޮށްފައިވަނީ ރާއްޖޭގެ ޝާޒިޔާ ސައީދެވެ. މިއަދު ކުރިއަށްދިޔަ ރިކޮލިފިކޭޝަން (ރެޕޯ) ހީޓު ނުވަތަ ދެވަނަ ބުރުގެ ހީޓު ތިނެއްގައި ޝާޒިޔާ ވާދަކުރިއިރު، އޭނާ ދިޔައީ ހީޓުގެ ތިންވަނައަށެވެ. މި ހީޓުގައި ޝާޒިޔާއަށް ސްކޯ ކުރެވުނީ 1.27 އެވެ.