ނިއުކާސަލުން ގޭހީގެ ބަދަލުގައި އެހެން ކުޅުންތެރިއަކު ހޯދުމަށް ކުރަމުން އަންނަ މަޝްވަރާތައް އިތުރުކޮށްފި

ކްރިސްޓަލް ޕެލަސްގެ އިނގިރޭސި ޑިފެންޑަރު، މާކް ގޭހީ، 24، ގަތުމަށް ނިއުކާސަލް ޔުނައިޓެޑުން ކުރަމުން އަންނަ މަސައްކަތްތައް ކާމިޔާބުނުވެދާނެ ކަމަށް ބަލައި، ބަދަލުގައި އެހެން ކުޅުންތެރިއަކު ހޯދުމުގެ މަޝްވަރާތައް އެ ކްލަބުން އިތުރުކޮށްފިއެވެ.

މިހާތަނަށް ނިއުކާސަލުން ގޭހީ ގަތުމަށް ޕެލަސް އަށް ހުށަހެޅި ހުރިހާ ބިޑެއް އެ ކްލަބުން ވަނީ އަނބުރާ ފޮނުވާލައިފައެވެ. އެގޮތުން، ނިއުކާސަލުން އެންމެ ފަހުން ހުށަހެޅި އެންމެ ފުރަތަމަ 60 މިލިއަން ޕައުންޑް ދިނުމަށްފަހު، ބޯނަހުގެ ގޮތުގައި އިތުރު ފަސް މިލިއަން ޕައުންޑް ދޭން ނިންމި ބިޑަށް ވެސް ޕެލަސް ވަނީ ފުރަގަސްދީފައެވެ.

ނަމަވެސް، ޕެލަސް އިން ގޭހީ ވިއްކާލަން ކަނޑައަޅާފައިވަނީ 70 މިލިއަން ޕައުންޑާ ގާތްކުރާ އަދަދެއް ކަމަށް ހަބަރުތައް ބުނެއެވެ. މިއާއެކު، އެ ޓީމުން އަދި ހުރީ ނިއުކާސަލް އަށް ދޫ ދިނުމުގެ ވިސްނުމެއް ނެތެވެ. އެހެންވިޔަސް، ނިއުކާސަލުން އަދި އެއްކޮށް ގޭހީ ގަތުމަށް ކުރާ މަސައްކަތް ހުއްޓާލުމަށް ގަސްދެއް ނުކުރެއެވެ.

އެކަމަކު، ނިއުކާސަލުން މިހާރު އަންނަނީ ބަޔާ ލެވަކޫސަން އަށް ކުޅެމުން އަންނަ ބުރްކީނާ ފާސޯގެ ޑިފެންޑަރު، އެޑްމަންޑް ޓެޕްސޯބާ އާއި ޗެލްސީގެ ފްރާންސް ޑިފެންޑަރު، އެކްސެލް ޑިސާސީ ހޯދުމަށް މަސައްކަތްކުރަމުން ކަމަށް ފަހުގެ މީޑިއާ ހަބަރުތައް ބުނެއެވެ.

ޓެޕްސޯބާ، 25، ވަނީ ވޭތުވެދިޔަ ސީޒަނުގައި ލެވަކޫސަން އަށް ހުރިހާ މުބާރާތްތަކެއްގައި 46 މެޗު ކުޅެފައެވެ. އޭނާ ވަނީ އެ ޓީމާއެކު ބުންޑެސްލީގާގެ ޗެމްޕިއަންކަން ހޯދައި، އެންމެ ފަހުގެ ޔުއެފާ ޔުރޮޕާ ލީގުގެ ފައިނަލަށް ދަތުރުކޮށްފައެވެ. ލެވަކޫސަންއާ އޭނާ ގުޅުނީ 2020 ވަނަ އަހަރުގައި ޕޯޗުގީޒް ކްލަބު ވިޓޯރިއާ ޑެ ގުއިމަރޭސް އިންނެވެ.

ޑިސާސީ ވަނީ މިދިޔަ އަހަރުގެ ހޫނު މޫސުމުގައި މޮނާކޯއިން ޗެލްސީ އަށް ބަދަލުވެފައެވެ. އަދި މިދިޔަ ސީޒަންގައި ހުރިހާ މުބާރާތްތަކެއްގައި 44 މެޗުގައި ކުޅެފައިވެއެވެ. ނަމަވެސް، މިވަގުތު ޑިސާސީ ހުރީ ހާނިއާ އޮޕަރޭޝަނެއް ކުރުމަށްފަހު، ރިކަވަރީގައެވެ. އެހެންވެ، ޕްރީ-ސީޒަންގައި ޗެލްސީ ކުޅުނު މެޗުތަކުގައި ބައިވެރިނުވެވުނެވެ.

މީގެ ތިން އަހަރެއްހާ ދުވަސްކުރީން، 2021 ގައި ޗެލްސީ އިން ޕެލަސް އަށް ބަދަލުވެ، ގޭހީ ވަނީ މިހާތަނަށް އެ ޓީމަށް 111 މެޗު ކުޅެދީފައެވެ. މިދިޔަ އަހަރުތަކުގައި ދެއްކި މޮޅު ކުޅުމުގެ ސަބަބުން ބޮޑެތި ކްލަބުތަކުން އަންނަނީ އޭނާ އަށް ފާރަލަމުންނެވެ. ގޭހީ ވަނީ ނިމިދިޔަ ޔޫރޯ ފުޓްބޯޅަ މުބާރާތުގެ ފައިނަލަށް އިންގްލެންޑް ދަތުރުކުރިއިރު މޮޅު ކުޅުމެއްދައްކާފައެވެ.

ޕެލަސް އާއެކު ގޭހީ ހަދާފައިވާ އެއްބަސްވުން ހަމަވާން ބާކީ ދެ އަހަރަށްވުރެ ކުރު މުއްދަތެއް އޮތްއިރު، އެންމެ މުހިއްމު އެއްކުޅުންތެރިޔާ ހިލޭ ޓްރާންސްފާއެއްގައި ދޫކޮށްލުމަކީ އެކްލަބުން ކުރަން ބޭނުންވާކަމެއް ނޫނެވެ.

އޭނާ ވަނީ މިދިޔަ އާދީއްތަ ދުވަހު ބްރެންޓްފޯޑާ ދެކޮޅަށް ކުޅުނު މެޗުގައި ޕެލަސްގެ ފުރަތަމަ އެގާރައިގައި ހިމެނި، އެ ޓީމުގެ ކެޕްޓަންކަން ކޮށްފައެވެ. މިއީ ޕެލަސް އިން މި ފަހަރުގެ ސީޒަނުގައި ކުޅުނު ފުރަތަމަ މެޗެވެ. މި މެޗުން އެ ޓީމު ބަލިވީ 2-1 އިންނެވެ.