ބަޔާން މިއުނިކަށް ކުޅެމުން އަންނަ ކްރޮއޭޝިއާގެ ޑިފެންޑަރު، ޖޯސިޕް ސްޓަނިޝިޗްގެ ކަކުލަށް ލިބުނު އަނިޔާއެއްގެ ސަބަބުން މިފަހަރުގެ ސީޒަނުގެ ކުރީބައިގައި ކުޅުމަށް ހަމަޖެހިފައިވާ މެޗުތަކުގައި ނުކުޅެވޭނެކަން ކަށަވަރުވެއްޖެއެވެ.
އެގޮތުން، ބަޔާނުން ވަނީ، ހޯމަ ދުވަހު ކުރިއަށްދިޔަ ފަރިތަކުރުންތަކުގައި ސްޓަނިޝިޗްގެ ކަނާތު ކަކުލުގެ ލިގަމެންޓަށް ލިބިފައިވާ އަނިޔާގެ ސަބަބުން "ގިނަ ހަފްތާތަކަކަށް ނުކުޅެވޭނެ" ކަމަށް ބުނެފައެވެ.
ސްޓަނިޝިޗް، 24، ނިމިދިޔަ ސީޒަނުގައި ލޯން އެއްބަސްވުމެއްގެ ދަށުން، ކުޅުނީ ބަޔާ ލެވަކޫސަން އަށެވެ. ބަޔާން ފަހަތަށް ޖައްސާލުމަށްފަހު، މެޗަކުން ބަލިނުވެ ލެވަކޫސަނުން ބުންޑެސްލީގާ ކާމިޔާބުކުރިއިރު ސްޓަނިޝިޗް ވަނީ ހުރިހާ މުބާރާތެއްގައި އެ ޓީމަށް 38 މެޗު ކުޅެފައެވެ. މި ފަހަރުގެ ސީޒަނުގައި ބަޔާނުން މިހާތަނަށް ކުޅުނު ހަމައެކަނި މެޗުގައި ޖަރުމަނު ކަޕްގައި އޭނާ ވަނީ ކުޅެފައެވެ.
ސްޓަނިޝިޗަށް ލިބުނު މި އަނިޔާގެ ސަބަބުން ކްރޮއޭޝިއާ އަށް ކުރިއަށް އޮތް ޔޫއެފާ ނޭޝަންސް ލީގުގެ ދެ މެޗު ނުކުޅެވޭނެ އެވެ. އެއީ ސެޕްޓެމްބަރު 5 ގައި ޕޯޗުގަލްއާ ދެކޮޅަށް ރަށުން ބޭރުގައި ކުޅޭ މެޗާއި، އޭގެ ތިން ދުވަސް ފަހުން ޕޮލެންޑާ ދެކޮޅަށް އަމިއްލަ ދަނޑުގައި ކުޅޭ މެޗެވެ.
މީގެއިތުރުން، މިހާރު މުޅިން އައު ފޯމެޓަކަށް ކުޅުމަށް ހަމަޖެހިފައިވާ ޗެމްޕިއަންސް ލީގުގެ ކުރިއަށް އޮތް ލީގް ފޭސްގެ ފުރަތަމަ ދެ މެޗުގައި ވެސް އޭނާ އަށް ނުކުޅެވޭނެއެވެ. އެ މެޗުތައް ކުޅުމަށް ހަމަޖެހިފައިވަނީ ސެޕްޓެމްބަރު 17-19 އާއި އޮކްޓޯބަރު 1-2 އާ ދެމެދުގައެވެ. މި ފަހަރުގެ މުބާރާތުގައި ކޮންމެ ޓީމަކުން ކުޅޭނެ އަށް މެޗުގެ ގުރުއަތުލުން އަންނަ ހަފްތާގައި މޮނާކޯގައި ބޭއްވުމަށް ވަނީ ހަމަޖެހިފައެވެ.
އައު ސީޒަނުގެ ލީގުގައި ބަޔާނުން ކުޅޭ ފުރަތަމަ މެޗުގައި އަންނަ އާދީއްތަ ދުވަހު ރަށުން ބޭރުގައި ނިކުންނާނީ ވުލްފްސްބާގާ ދެކޮޅަށެވެ.