ބާސެލޯނާ އަށް ކުޅެމުން އަންނަ ޖަރުމަނުގެ މިޑްފީލްޑަރު، އިލްކާއި ގުންޑޮގާން، ގައުމީ ޓީމަށް ކުޅުން ހުއްޓާލިކަން އިޢްލާންކޮށްފިއެވެ.
ސޯޝަލް މީޑިއާގައި ކުރި ޕޯސްޓެއްގައި ގުންޑޮގާން، 33، ބުނީ، ގައުމީ ޓީމުން ރިޓަޔާކުރުމަށް ނިންމީ، ގިނަ ދުވަސްތަކެއް ވަންދެން ވިސްނުމަށްފަހުގައި ކަމަށެވެ.
ނިމިދިޔަ ސީޒަނުގައި މެންޗެސްޓާ ސިޓީން ސްޕެއިނުގެ ބާސެލޯނާ އަށް ބަދަލުވި ގުންޑޮގާން އެންމެ ފުރަތަމަ ގައުމީ ޓީމަށް ކުޅެން ފެށީ 2011 ގައެވެ. އޭގެފަހުން، ކުޅުން ހުއްޓާލުމާ ހަމައަށް، މިދިޔަ ޔޫރޯ ފުޓްބޯޅަ މުބާރާތުގެ ނިޔަލަށް އޭނާ ވަނީ 82 މެޗު ކުޅެ، 19 ލަނޑުޖަހައިފައެވެ.
ގައުމީ ޓީމަށް މިހާތަނަށް ގިނަ މެޗުތަކެއް ކުޅެވިފައިވުމުން އެކަމާ ގުޅޭގޮތުން، ގުންޑޮގާން ބުނީ، ބައިނަލްއަގުވާމީ ގޮތުން 82 މެޗުގައި ގައުމު ތަމްޞީލުކުރުމުގެ ފުރުޞަތު ލިބިގެންދިއުމުން ޝުކުރުވެރިވެ، ފަޚުރުވެރިވާ ކަމަށެވެ. އަދި، އެއީ ކުރެވިދާނެ ކަމެއްގެ ގޮތުގައި ކުރީން ހުވަފެނުންވެސް ދެކެފައިނުވާ ކަމެއްގެ ގޮތުގައި ގުންޑޮގާން ވަނީ ސިފަކޮށްފައެވެ.
ޖަރުމަނުގައި ބޭއްވި އެންމެ ފަހުގެ ޔޫރޯގައި އޭނާ ވަނީ އެ ޓީމުގެ ހުރިހާ މެޗެއްގައި ކުޅެފައެވެ. އެ މުބާރާތުގައި އެ ޓީމުގެ ކެޕްޓަންކަންކުރި ގުންޑޮގާން އެންމެ ފަހުން ކުޅުނު ބައިނަލްއަޤްވާމީ މެޗަކީ ޗެމްޕިއަންކަން ހޯދި ސްޕެއިނާ ދެކޮޅަށް ކުޅުނު ކުއާޓާ ފައިނަލް މެޗެވެ.
"އަހަރެންގެ އެންމެ ފާހަގަކޮށްލެވޭ ކަމަކީ އަމިއްލަ ގައުމުގައި ބޭއްވުނު ޔޫރަޕިއަން ޗެމްޕިއަންޝިޕްގައި ޖަރުމަނު ޓީމުގެ ކެޕްޓަނެއްގެ ގޮތުގައި ކުޅުމުގެ ޝަރަފު ލިބުން،" ގުންޑޮގާން ބުންޏެވެ.
ގުންޑޮގާން އިތުރަށް ބުނީ، މުބާރާތުގެ ކުރީން ވެސް އޭނާ އަށް ހުރިހާ ގޮތަކުން ވަރުބަލިކަން އިހުސާސްކުރެވުނު ކަމަށާއި، އެހާ ހިސާބުން ވެސް ކުޅުން ހުއްޓާލުމާ މެދު ވިސްނަންފެށި ކަމަށެވެ. އަދި ކުރިއަށް އޮތް ތަނުގައި ވެސް ކްލަބު ފުޓްބޯޅައިގައި އާއި ގައުމީ ޓީމަށް ކުޅެންޖެހޭ މެޗުތަކުގެ އަދަދު މަދުވާނެކަމަށް ނުބެލެވޭ ކަމަށް ވެސް ގުންޑޮގާން ފާހަގަކުރިއެވެ.