ޕެރިހުގައި ކުރިއަށްދިޔަ އޮލިމްޕިކްސްގެ ފުޓްބޯޅަ އިވެންޓްގެ ރިހި މެޑެލް ހޯދައިދިނުމަށްފަހު، ފްރާންސްގެ 21 އަހަރުން ދަށުގެ ގައުމީ ޓީމުގެ ކޯޗުގެ މަގާމުން ކުރީގެ ފޯވާޑް، ތިއެރީ އޮންރީ އިސްތިއުފާ ދީފިއެވެ.
އަމިއްލަ ސަބަބަކާ ހުރެ އޮންރީ، 47، މަގާމުން އިސްތިއުފާ ދީފައިވާ ކަމަށް އެ ގައުމުގެ ފުޓްބޯޅަ ފެޑެރޭޝަނުން ވެސް ވަނީ ކަށަވަރުކޮށްދީފައެވެ.
އޮންރީ އެ ޓީމާއެކު ސޮއިކުރީ ދެ އަހަރުގެ ކޮންޓްރެކްޓެއްގައެވެ. އެހެންކަމުން، އޭނާ ހަދާފައިވާ އެއްބަސްވުން ހަމަވާން އޮތީ އަންނަ އަހަރުގެ ނިޔަލަށެވެ. އޭރު ފްރާންސްގެ ފުޓްބޯޅަ ފެޑެރޭޝަނުގެ އަމާޒަކަށްވެފައި އޮތީ، 2025 ވަނަ އަހަރުގެ 21 އަހަރުން ދަށުގެ ޔޫރަޕިއަން ޗެމްޕިއަންޝިޕަށް ކޮލިފައިކޮށްދިނުމެވެ.
އޮންރީ މަގާމު ދޫކޮށްލުމުން، އޭނާ ކޮށްދީފައިވާ މަސައްކަތްތަކަށް އެ ގައުމުގެ ފުޓްބޯޅަ ފެޑެރޭޝަނުގެ ރައީސް، ފިލިޕް ޑިއަލޯ ވަނީ ޝުކުރު އަދާކޮށްފައެވެ.
އޮންރީ އެ މަގާމާ ހަވާލުވީ ވެސް އޮލިމްޕިކްސް އަށް ވިސްނައިގެން، އޭގެއިން ރަނގަޅު ކާމިޔާބީއެއް ހޯދުމަށް އަމާޒުހިފައިގެންނެވެ. އޭނާގެ އިރުޝާދުގެ ދަށުން ކުޅުނު ފްރާންސްގެ ޓީމުން ވަނީ ފައިނަލްގައި އިތުރުވަގުތުގައި 5-3 އިން ސްޕެއިން އަތުން ބަލިވެ، ރިހި މެޑެލް ހާސިލްކޮށްފައެވެ.
އެ މެޗަށްފަހު އޮންރީގެ ކުރިމަގާމެދު ކުރި ސުވާލުތަކަށް ދިން ޖަވާބުން ދޭހަވީ، ދެން އިތުރަށް 21 އަހަރުން ދަށުގެ ޓީމުގެ ކޯޗުގެ މަގާމުގައި ނުހުންނާނެކަމެވެ.
"އޮލިމްޕިކް ގޭމްސްގައި އަހަރެންގެ ގައުމަށް ރިހީ މެޑަލް ހޯދައިދިނުމަކީ އަހަރެންގެ ދިރިއުޅުމުގައި އެންމެ ބޮޑަށް ފަޚުރުވެރިވާ ކަންތައްތަކުގެ ތެރެއިން އެއް ކަމެއްގެ ގޮތުގައި ދެމި އޮންނާނެ،" އޮންރީ ނެރުނު ބަޔާނުގައިވެއެވެ.