އަންނަ މަހު އޮތް ފީފާ ވޯލްޑް ކަޕް ކޮލިފައިންގ މެޗުތަކަށް ނެގި އާޖެންޓީނާގެ ސްކޮޑުން އެ ޓީމުގެ ކެޕްޓަން، ލިއޮނަލް މެސީ ބާކީކޮށްފިއެވެ.
މެސީ، 37، އަށް އަނިޔާވީ މިދިޔަ ޖުލައި މަހު ނިމުނު ކޮޕާ އެމެރިކާ ފުޓްބޯޅަ މުބާރާތުގެ ފައިނަލް މެޗުގައެވެ. ފައިގެ ކުޑަހުޅަށް ލިބުނު މި އަނިޔާ އަށް މިވަގުތު މެސީ އަންނަނީ ފަރުވާ ހޯދަމުންނެވެ.
އާޖެންޓީނާގެ ކޯޗު، ލިއޮނަލް ސްކަލޯނީ ނެގި ސްކޮޑުގައި މިފަހަރު ނުހިމެނުނު އިތުރު ކުޅުންތެރިންގެ ތެރޭގައި ދާދިފަހުން ގައުމީ ޓީމުން ރިޓަޔާކުރި އެންހެލް ޑި މާރިއާ އާއި ރިވާ ޕްލޭޓްގެ ގޯލްކީޕަރު، ފްރޭންކޯ އަރްމާނީ ހިމެނެއެވެ. އަދި މި ފަހަރުގެ ސްކޮޑުން މުޅިން އަލަށް ޖާގަ ދީފައިވާ ކުޅުންތެރިންގެ ތެރޭގައި، މިޑްފީލްޑަރު، އެޒެކީލް ފެނާންޑޭޒް އާއި ސްޓްރައިކަރު ވަލެންޓިން ކަސްޓެޔާނޯސް ހިމެނެއެވެ.
މީގެއިތުރުން، މިހާތަނަށް ބައިނަލްއަގުވާމީ މަދު މެޗުތަކެއް ކުޅެފައިވާ ޒުވާން ކުޅުންތެރިން ކަމަށްވާ، އަލެހަންދްރޯ ގަނާޗޯ، ވެލެންޓިން ކާބޯނީ، ވެލެންޓިން ބާކޯ އާއި މަތިއަސް ސޫލް އަށް މި ފަހަރުގެ ސްކޮޑުން ޖާގަ ދީފައިވެއެވެ.
ދެކުނު އެމެރިކާގެ ވޯލްޑް ކަޕް ކޮލިފައިންގައި މިހާތަނަށް ކުޅުނު ހަ މެޗަށްފަހު އާޖެންޓީނާ އޮތީ 15 ޕޮއިންޓާއެކު ތާވަލްގެ އެއްވަނައިގައެވެ.
އާޖެންޓީނާ އިން އެންމެ ފުރަތަމަ ކުޅުމަށް ހަމަޖެހިފައިވާ މެޗުގައި އަންނަ ސެޕްޓެންބަރު މަހުގެ 6 ވަނަ ދުވަހު އަމިއްލަ ދަނޑުގައި ޗިލީއާ ދެކޮޅަށް ނިކުންނައިރު، އޭގެ ފަސް ދުވަސް ފަހުން ރަށުން ބޭރުގައި އެ ޓީމު ނިކުންނާނީ ކޮލަމްބިއާ އާ ދެކޮޅަށެވެ.
އާޖެންޓީނާގެ 28 ކުޅުންތެރިންގެ ސްކޮޑު:
ގޯލްކީޕަރުން: ވޯލްޓާ ބެނީޓޭޒް (ޕީއެސްވީ އެއިންދޯވަން)، ޖެރޮނިމޯ ރުއްލީ (އޮލިމްޕިކް މާސޭ)، ހުއާން މުސޯ (އެޓަލާންޓާ)، އެމިލިއާނޯ މާޓިނޭޒް (އެސްޓަން ވިލާ).
ޑިފެންޑަރުން: ގޮންޒާލޯ މޮންޓިއެލް (ސެވިއްޔާ)، ނަހުއެލް މޮލީނާ (އެތުލެޓިކޯ މެޑްރިޑް)، ކްރިސްޓިއަން ރޮމޭރޯ (ޓޮޓެންހަމް ހޮޓްސްޕާ)، ޖާމަން ޕެޒެއްލާ (ރިވާ ޕްލޭޓް)، ލިއޮނާޑޯ ބަލޭޑީ (އޮލިމްޕިކް މާސޭ)، ނިކޮލަސް އޮޓަމެންޑީ (ބެންފީކާ)، ލިސަންދްރޯ މާޓިނޭޒް (މެންޗެސްޓާ ޔުނައިޓެޑް)، ނިކޮލަސް ޓަގްލިއަފީކޯ (އޮލިމްޕިކް ލިޔޯން)، ވަލެންޓިން ބާކޯ (ބްރައިޓަން).
މިޑްފީލްޑަރުން: ގުއިޑޯ ރޮޑްރިގޭޒް (ވެސްޓް ހޭމް ޔުނައިޓެޑް)، އަލެކްސިސް މެކް އެލިސްޓާ (ލިވަޕޫލް)، އެންޒޯ ފެނާންޑޭޒް (ޗެލްސީ)، ޖިއޮވާނީ ލޮ ސެލްސޯ (ޓޮޓެންހަމް ހޮޓްސްޕާ)، އެޒެކީލް ފެނާންޑޭޒް (އަލް ޤާދިސިއާ)، ރޮޑްރިގޯ ޑެ ޕޯލް (އެތުލެޓިކޯ މެޑްރިޑް)، ނިކޮލަސް ގޮންޒާލޭޒް (ފިއޮރެންޓީނާ)، ލެއަންޑްރޮ ޕަރެޑޭސް (އޭއެސް ރޯމާ).
ފޯވާޑުން: އަލެހަންދްރޯ ގަނާޗޯ (މެންޗެސްޓާ ޔުނައިޓެޑް)، މަތިއަސް ސޫލް (އޭއެސް ރޯމާ)، ޖިއުލިއާނޯ ސިމިއޯނީ (އެތުލެޓިކޯ މެޑްރިޑް)، ވެލެންޓިން ކާބޯނީ (އޮލިމްޕިކް މާސޭ)، ހޫލިއަން އަލްވަރޭޒް (އެތުލެޓިކޯ މެޑްރިޑް)، ލަޓާރޯ މާޓިނޭޒް (އިންޓަ މިލާން)، ވަލެންޓިން ކަސްޓެޔާނޯސް (ލާޒިއޯ).