އިނގިރޭސި ޕްރިމިއާ ލީގުގައި ރޭ ކުޅުނު މެޗުގައި ލެސްޓާ ސިޓީއާ ޓޮޓްނަމް ހޮޓްސްޕާ 1-1 އިން އެއްވަރުވެގެން ނިމިއްޖެއެވެ.
ކިންގޕަވާ ސްޓޭޑިއަމްގައި ކުޅުނު މި މެޗު ފެށިގެން ޑޮމިނޭޓްކުރަމުންދިޔަ ޓޮޓެންހަމުން ލީޑްނެގީ 29 ވަނަ މިނެޓުގައި ޕެޑްރޯ ޕޯރޯ ކާމިޔާބުކުރި ގޯލުންނެވެ. އެ ޓީމުގެ އިނގިރޭސި މިޑްފީލްޑަރު، ޖޭމްސް މެޑިސަން ނަގައިދިން ހުރަހަކުން ޕޯރޯ މި ލަނޑުޖެހީ ބޮލުންނެވެ. އެ ބޯޅަ ހުއްޓުވަން ލެސްޓާގެ ގޯލްކީޕަރު، މެޑްސް ހާމެންސަން އަށް މާބޮޑު ކަމެއް ނުކުރެވުނެވެ.
ޓޮޓެންހަމުން މި ލަނޑުޖެހުމުގެ ކުރީން، މި ފަހަރުގެ ސީޒަނަށް ބޯންމައުތުން 65 މިލިއަން ޕައުންޑްގެ ޓްރާންސްފާ ފީ އަކަށް އެ ޓީމަށް ބަދަލުވި އިނގިރޭސި ފޯވާޑް، ޑޮމިނިކް ސޮލާންކޭ އަށް ވަނީ ލަނޑުޖަހައިދޭން ލިބުނު ދެ ފުރުޞަތެއް ނަގާލައިފައެވެ.
ލެސްޓާ އިން އެއްވަރުކުރި ލަނޑު، 57 ވަނަ މިނެޓުގައި ކާމިޔާބުކޮށްދިނީ ޖެމީ ވާޑީ އެވެ. އެ ޓީމުގެ ވިންގަށް ކުޅެމުންއަންނަ ގާނާގެ އަބްދުލް ފަތަވޫ ނަގައިދިން ހުރަހަކުން ވާޑީ މި ލަނޑުޖެހީ ބޮލުންނެވެ. މިއީ ޓޮޓެންހަމްއާ ދެކޮޅަށް ވާޑީ ކާމިޔާބުކުރި ނުވަވަނަ ލަނޑެވެ. އޭގެފަހުން، ލެސްޓާ މޮޅުކޮށްދޭން ވާޑީ އަށް ލިބުނު ފުރުޞަތުގައި ފޮނުވާލި ބޯޅަ ޓޮޓެންހަމްގެ ކީޕަރު، ގުގްލިއެލްމޯ ވިކާރިއޯ ވަނީ ހުއްޓުވައިފައެވެ.
ދެވަނަ ހާފުގައި ޓޮޓެންހަމްގެ މިޑްފީލްޑަރު، ރޮޑްރިގޯ ބެންޓަންކޫރްގެ ބޮލަށް ލިބުނު އަނިޔާއަކާ ގުޅިގެން ދަނޑުމަތީގައި ގާތްގަނޑަކަށް ފަސްމިނެޓު ވަންދެން ފަރުވާދިނުމަށްފަހު، ސްޓްރެޗަރުގައި ވަނީ ގެންގޮސްފައެވެ. މެޗަށްފަހު ޓޮޓެންހަމްގެ ކޯޗު، އަންގޭ ޕޮސްޓެކޮގްލޫ ވަނީ ބެންޓަންކޫރްގެ ހާލު މިހާރު ރަނގަޅުކަމަށް ބުނެފައެވެ.
ލީގުގައި ޓޮޓެންހަމް ދެންކުޅޭ މެޗުގައި މި މަހުގެ 24 ވާ ހޮނިހިރު ދުވަހު އަމިއްލަ ދަނޑުގައި ނިކުންނާނީ އެވަޓަންއާ ދެކޮޅަށެވެ. ހަމަ އެ ދުވަހު ރަށުން ބޭރުގައި ލެސްޓާ ބައްދަލުކުރާނީ ފުލަމްއާ އެވެ.