ލީގުގައި އެމްބާޕޭގެ ފުރަތަމަ މެޗުން ރެއާލަށް ޕޮއިންޓެއް

ސްޕެނިޝް ލަލީގާގެ އައު ސީޒަނުގެ ފުރަތަމަ މެޗުގައި ފްރާންސްގެ ތަރި، ކީލިއަން އެމްބާޕޭ އާއެކު ރަށުން ބޭރުގައި އެންމެ ފަހުގެ ޗެމްޕިއަން، ރެއާލް މެޑްރިޑުން 1-1 ގެ ނަތީޖާއަކުން ރެއާލް މަޔޯކާއާ އެއްވަރުވެއްޖެއެވެ

ރެއާލްގެ ކުޅުންތެރިއެއްގެ ގޮތުގައި އެމްބާޕޭގެ ފުރަތަމަ ފެނިލުމުގައި މިދިޔަ ބުދަ ދުވަހުގެ ރޭ ޔުއެފާ ސުޕަ ކަޕްގައި އިޓަލީގެ އެޓަލާންޓާ އަތުން 2-0 އިން މޮޅުވިއިރު، އެމްބާޕޭ ވަނީ އެ މެޗުގައި ލަނޑުޖަހައިފައެވެ

މަޔޯކާގެ ސޮން މޮއިޒް ސްޓޭޑިއަމްގައި ރޭ ކުޅުނު މި މެޗު ފެށިގެން 13 ވަނަ މިނެޓުގައި ކުރީން ލީޑްނެގީ ވެސް ރެއާލުންނެވެ. މިއީ އެ ޓީމުގެ ބްރެޒިލް ވިންގް، ވިނީޝިއުސް ޖޫނިއާގެ ބެކްހީލް ޕާހަކުން ރޮޑްރީގޯ ކާމިޔާބުކުރި ރީތި ގޯލެކެވެ

ރެއާލްގެ ލަނޑަށްފަހު މަޔޯކާގެ ގޯލަށް މާބޮޑު ނުރައްކަލެއް ކުރެވިފައިނުވާއިރު، ކައުންޓާއެޓޭކުގައި މަޔޯކާ އިން ދިޔައީ ނުރައްކާ ކުރަމުންނެވެ. އެގޮތުން، މަޔޯކާ އިން ފޮނުވާލި ނުރައްކާތެރި ތިން ހަމަލާއެއް ރެއާލްގެ ގޯލްކީޕަރު، ތިބައުޓް ކޯޓުއާ ވަނީ ހުއްޓުވާފައެވެ.

ދެވަނަ ހާފުގެ ކުޅުން ފެށިގެން އަށްވަނަ މިނެޓުގައި މަޔޯކާ އިން ވަނީ ނަތީޖާ އެއްވަރުކޮށްފައެވެ. ޑެނިއެލް ރޮޑްރިގޭޒް ނަގައިދިން ކޯނަރެއްގެ އެހީގައި އެ ޓީމަށް ކުޅެމުންއަންނަ ކޮސޮވޯގެ ފޯވާޑް، ވެދާތު މުރީގީ މި ލަނޑުޖެހީ ބޮލުންނެވެ. މަޔޯކާ އިން އެއްވަރުކުރިތާ ކުޑައިރުކޮޅެއްގެ ތެރޭގައި މުރީގީ ވަނީ އެ ޓީމަށް ލީޑްނަގައިދިނުމަށް ލިބުނު ފުރުޞަތެއް ބޭކާރުކޮށްލާފައެވެ. މުރީގީ ފޮނުވާލި މި ބޯޅަ ރެއާލްގެ ކީޕަރު، ކޯޓުއާ ވަނީ މަތަކޮށްފައެވެ.

އޭގެފަހުން، ރެއާލަށް އަލުން ލީޑްނަގައިދޭން އެ ޓީމުގެ ފޯވާޑް، އެމްބާޕޭ އަށް ލިބުނު ފުރުޞަތުގައި ފޮނުވާލި ބޯޅަ އަމާޒުވީ ގޯލްގެ ހުރަސްދަނޑިއަށެވެ. އަދި އޭގެފަހުން، މެޗު ނިމެންދަނިކޮށް އިތުރުވަގުތުގެ ތެރޭގައި ރެއާލްގެ ފްރާންސް ފުލްބެކް، ފާލެންޑް މެންޑީ އަށް ވަނީ ސީދާ ރަތެއް ދައްކާ ދަނޑުން ފޮނުވާލުމުން އެ ޓީމުން މެޗު ނިންމާލީ އެއްކުޅުންތެރިއަކު މަދުކޮށެވެ. މެންޑީ އަށް ރަތް ކާޑު ދެއްކީ މަޔޯކާގެ ފޯވާޑް، މުރީގީ އަށް ކުރި ނުރައްކާތެރި ޓެކުލަކާ ގުޅިގެންނެވެ.

މި މުބާރާތުގައި ރޭ ކުޅުނު އަނެއް މެޗުގައި ރެއާލް ސޮސިއެޑާޑްގެ ދަނޑުގައި ރަޔޯ ވަޔެކާނޯ ވަނީ 1-2 އިން މޮޅުވެފައެވެ މި މެޗުގައި ފެނިގެންދިޔަ ހުރިހާ ގޯލެއްވެސް ކާމިޔާބުކުރީ ފަހު ހާފުގައެވެ ވަޔެކާނޯގެ ލަނޑުތައް ޖަހައިދިނީ ޖޯގް ޑެ ފްރޫޓޯސް އާއި ސާޖިއޯ ކަމޭއޯ އެވެ ސޮސިއެޑާޑްގެ ހަމައެކަނި ލަނޑު، އިތުރުވަގުތުގެ ތެރޭގައި ކާމިޔާބުކޮށްދިނީ ސްޕެއިނުގެ މިޑްފީލްޑަރު، މާޓިން ޒުބިމެންޑީ އެވެ

ލީގުގައި ރެއާލަށް ދެން އޮތީ މި މަހުގެ 25 ވާ އާދީއްތަ ދުވަހުގެ ރޭގަނޑު ރާއްޖޭގަޑިން 8 ޖަހާއިރު އަމިއްލަ ދަނޑުގައި ރެއާލް ވަޔަޑޮލިޑާ ދެކޮޅަށް ކުޅޭ މެޗެވެ