ރަށުން ބޭރުގައި 2-0 ގެ ނަތީޖާއަކުން ޗެލްސީ ބަލިކޮށް، އެންމެ ފަހުގެ ޗެމްޕިއަން މެންޗެސްޓާ ސިޓީން މޮޅަކާއެކު އައު ސީޒަނުގެ އިނގިރޭސި ޕްރިމިއަރ ލީގު ފަށައިފިއެވެ.
ސްޓެމްފޯޑް ބްރިޖްގައި ކުޅުނު މި މެޗު ޗެލްސީން ރަނގަޅަށް ފެށިނަމަވެސް، ކުރީން ލީޑްނެގީ ސިޓީންނެވެ. މެޗުގެ 18 ވަނަ މިނެޓުގައި ސިޓީ އަށް މި ލަނޑު ކާމިޔާބުކޮށްދިނީ ނޯވޭގެ ފޯވާޑް، އަލިން ބްރައުޓް ހާލަންޑް އެވެ. އޭނާ މި ލަނޑުޖެހީ ޕެނަލްޓީއޭރިޔާ ތެރެއިން ޗެލްސީގެ ދެ ޑިފެންޑަރުން ކަމަށްވާ، ލެވީ ކޯލްވިލް އާއި މާކް ކުކުރޭޔާ ކައިރިން ދެމިގަތުމަށްފަހު އެ ޓީމުގެ ގޯލްކީޕަރު، ރޮބަޓް ސަންޗޭޒްގެ ބޯމަތިން ގޯލްގެތެރެއަށް ބޯޅަ ފޮނުވާލައިގެންނެވެ. ރެފްރީ މި ލަނޑު ބަލައިގަންނަން ނިންމީ ވީއޭއާރް އިން ބެލުމަށްފަހު އެވެ. މިއީ ސިޓީ އަށް ހާލަންޑް ކުޅެދިން 100 ވަނަ މެޗުގައި ޖަހައިދިން 91 ވަނަ ގޯލެވެ.
ފުރަތަމަ ހާފު ނިމެންދަނިކޮށް، ޗެލްސީގެ ފޯވާޑް ނިކޮލަސް ޖެކްސަން ގޯލެއް ކާމިޔާބުކުރިނަމަވެސް ރެފްރީ ވަނީ އޮފްސައިޑްކަމަށް ނިންމައި، އެލަނޑު ބަލައިނުގަންނަން ނިންމާފައެވެ.
ދެވަނަ ހާފުގެ ކުރީކޮޅު، ޗެލްސީ އަށް އެއްވަރުކޮށްދޭން ޖެކްސަން އަށް ލިބުނު ފުރުޞަތުގައި ވޮލީއަކުން ފޮނުވާލި ބޯޅަ ސިޓީގެ ކީޕަރު، އެޑަސަން މޮރައެސް މަތަކުރިއެވެ. މި ހާފުގައި ދާދިފަހުން ޗެލްސީ އަށް ބަދަލުވި ޕޯޗުގީޒް ވިންގް، ޕެޑްރޯ ނެޓޯ ވަނީ އެ ޓީމަށް ގޯލެއްޖަހައިދިނުމާ ގާތަށް ޖެހިލައިފައެވެ. މި މެޗުގައި ޗެލްސީގެ ކެޕްޓަން ބޭންޑް އަޅައިގެން ކުޅުނު އެންޒޯ ފެނާންޑޭޒް ނަގައިދިން ހުރަހަކުން ގޯލްގެދަނޑިކައިރިން ދިޔަ ބޯޅަ ނެޓޯ އަށް ލިބޭގޮތެއްނުވިއެވެ. ސިޓީގެ ރިކޯ ލުވިސް އެ ބޯޅަ ވަނީ ސަލާމަތްކޮށްފައެވެ.
މި މެޗުގައި ސިޓީން ޖެހި ދެވަނަ ލަނޑު، 84 ވަނަ މިނެޓުގައި ކާމިޔާބުކޮށްދިނީ ކުރީން ޗެލްސީ އަށް ކުޅުނު ކްރޮއޭޝިއާގެ މިޑްފީލްޑަރު، މަޓެއޯ ކޮވެސިޗް އެވެ. އޭނާ މި ލަނޑުޖެހީ ޗެލްސީގެ ހާފްގެ ތެރެއިން ހޯދި ބޯޅައެއްގައި ޕެނަލްޓީއޭރިޔާ ބޭރުން ފޮނުވާލި ހަމަލާއަކުންނެވެ. މި ބޯޅަ ގޮސް ގޯލްގެތެރެއަށް ވަނީ ޗެލްސީގެ ކީޕަރު، ސަންޗޭޒް އަތުގައި ޖެހި، ގޯލްގެ ދަނޑީގައިޖެހިފައެވެ.
މި މުބާރާތުގައި ކުޅުނު އަނެއް މެޗުގައި ބްރެންޓްފޯޑުން ވަނީ އަމިއްލަ ދަނޑުގައި 2-1 އިން ކްރިސްޓަލް ޕެލަސް ބަލިކޮށްފައެވެ. ފުރަތަމަ ހާފުގެ 29 ވަނަ މިނެޓުގައި ބްރެންޓްފޯޑުން ލީޑްނެގީ ބްރަޔަން އެމްބުއެމޯ ކާމިޔާބުކުރި ގޯލުންނެވެ.
ޕެލަސް އިން މި މެޗުގައި ޖެހި ހަމައެކަނި ލަނޑަކީ، ދެވަނަ ހާފުގެ ކުޅުން ފެށިގެން 11 ވަނަ މިނެޓުގައި ބްރެންޓްފޯޑްގެ އީތަން ޕިނޮކް އަތުން ބައިކޮޅަށް ވަތް ގޯލެކެވެ. އޭގެފަހުން، މެޗު ނިމެން 14 މިނެޓަށްވެފައިވަނިކޮށް ބްރެންޓްފޯޑް މޮޅުވި ލަނޑުޖަހައިދިނީ ޔޮއާން ވިއްސަ އެވެ.