މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމުކޮށްގެން ބޭއްވި 10 ބޯލް ޗެމްޕިއަންޝިޕުގެ ޗެމްޕިއަންކަން ހުސެއިން ފަޔާޒް އާއި ދީނާ އަޙްމަދު ހޯދައިފިއެވެ.
ފިރިހެން ބައިގެ ޗެމްޕިއަންކަން ފަޔާޒް ހޯދީ ހޮނިހިރު ދުވަހުގެރޭ ކުޅުނު ފައިނަލް މެޗުގައި އިސްމާޢީލް ސުވައިދާ ބައްދަލުކޮށް 11-10 ފްރޭމުން މެޗު ކާމިޔާބުކޮށްގެންނެވެ. މި މުބާރާތުގެ ފިރިހެން އެންމެ މޮޅު އަށް ކުޅުންތެރިންގެ ތެރޭގައި ހިމެނެނީ ޗެންޕިއަން ފަޔާޒް އާއި، ރަނަރަޕް ސުވައިދުގެ އިތުރުން މުޙައްމަދު ސާހިލް ހަމީދާއި، އަހުސަން ހާޝިމާއި، ހަސަން ޝާޒް މުޙައްމަދާއި، ފަތުހުﷲ ޖަމީލާއި، އަލީ ފަޔާޒް އަދި މޫސާ ޝާމިއުއެވެ.
މި އަހަރުގެ މުބާރާތުގެ އަންހެން ބައިގެ ޗެމްޕިއަންކަން ދީނާ ހޯދީ ހޮނިހިރު ދުވަހުގެރޭ ކުޅުނު ފައިނަލް މެޗުގައި އައިޝަތު އަލީއާ ވާދަކޮށް 7-2 ފްރޭމުން މެޗު ކާމިޔާބުކޮށްގެންނެވެ. އަންހެން ބައިގެ ރޭންކިންގެ އެންމެ ކުރީގައި ދީނާ އާއި އައިޝަތު އަލީ ހިމެނޭއިރު، ތިންވަނަ ހޯދީ ފަގީހާ އިބްރާހީމެވެ. އަދި ހަތަރުވަނައިގައި ހިމެނުނީ މިދިޔަ އަހަރުގެ ޗެމްޕިއަން އައިމިނަތު އަޒްރާއެވެ.
މި މުބާރާތުގެ ކާމިޔާބީއާއެކު އެމްޕީބީއޭއިން ތައްޔާރުވަނީ އަންނަ މަހު ބޭއްވުމަށް ހަމަޖެހިފައިވާ 9 ބޯލް ޗެމްޕިއަންޝިޕަށެވެ. އަދި އޭގެ ފަހުން މި އަހަރުގެ އޮކްޓޯބަރު މަހުގެ ތެރޭގައި ގައުމީ ބިލިއާޑް ޗެމްޕިއަން ބޭއްވުމަށް ހަމަޖެހިފައިވާއިރު، ނޮވެމްބަރު މަހު 9 ބޯލް އެސޯސިއޭޝަން ކަޕް ބޭއްވުމަށްވެސް ވަނީ ތާވަލުކޮށްފައެވެ.