އޭޝިއަން ސާފިން ޗެމްޕިއަންޝިޕް 2024 ކ. ތުލުސްދޫގައި ފެށިގެން ކުރިއަށްދާއިރު، އޯޕަން ބައިގެ ފުރަތަމަ ބުރުގެ ހީޓުތައް މިއަދު ވަނީ ފަށާފައެވެ.
މި ފަހަރުގެ މުބާރާތުގައި 20 ގައުމަކުން 100 އަށްވުރެ ގިނަ އެތުލީޓުން ބައިވެރިވެފައިވާއިރު، އޭގެ ތެރޭގައި ރާއްޖޭގެ ދެ ޓީމުވެސް ހިމެނެއެވެ. ރާއްޖޭގެ ދެވަނަ ޓީމަަަށް ނަން ދެވިފައިވަނީ، ތުލުސްދޫ ޓީމުގެ ނަމުންނެވެ.
މުބާރާތުގެ އޯޕަން ބައިގެ ފުރަތަމަ ބުރުގެ ހީޓުތައް މިއަދު ފެށިއިރު، ހީޓު ދޭއްގައި ރާއްޖޭގެ ބީ ޓީމުގެ އިސްމާޢީލް ރަޝީދު (ސްމައިލީ) ވަނީ ވާދަކޮށްފައެވެ. މި ހީޓުގައި ހަތަރު އެތުލީޓެއް ވާދަކުރިއިރު، ސްމައިލީ ދިޔައީ ހީޓުގެ ތިންވަނައަށެވެ. އެގޮތުން މި ހީޓުގައި ސްމައިލީއަށް ސްކޯ ކުރެވުނީ 9.27 އެވެ. އަދި ހީޓު ދޭއްގައި ބީ ޓީމުގައި ހިމެނޭ އަޙްމަދު ހިޝާމް ޝަހީމް ވާދަކުރިއިރު، އޭނާ ދިޔައީ ހީޓުގެ ދެވަނައަށެވެ. އެގޮތުން މި ހީޓުގައި ހިޝާމް ވަނީ 8.66 ގެ ސްކޯއެއް ހަދާފައެވެ.
މީގެ އިތުރުން ފުރަތަމަ ބުރުގެ ހީޓު ހަތަރެއްގައި ސީނިއާ ޓީމުގެ ކެޕްޓަން އަޙްމަދު އާގިލް (އައްމަޑޭ) ވާދަކުރިއިރު، އޭނާވެސް ދިޔައީ ހީޓުގެ ތިންވަނައަށެވެ. އެގޮތުން މި ހީޓުގައި އައްމަޑޭއަށް ސްކޯކުރެވުނީ 8.83 އެވެ. ފުރަތަމަ ބުރުގެ ހީޓު ނުވައެއްގައި ސީނިއާ ޓީމުގައި ހިމެނޭ އިސްމާޢީލް މިގުލާލް ވާދަކުރިއިރު، އޭނާ ދިޔައީ ހީޓުގެ ތިންވަނައަށެވެ. އަދި މި ހީޓުގައި މިގުލާލަށް ސްކޯ ކުރެވުނީ 4.97 އެވެ.
މިއަދުގެ ހީޓުތަކުގައި ރާއްޖޭގެ ހަތަރު އެތުލީޓެއް ވާދަކުރިއިރު، އައްމަޑޭ އާއި ސްމައިލީ ވަނީ އޯޕަން ބައިގެ ދެވަނަ ބުރުން ޖާގަ ހޯދާފައެވެ. އަދި ހީޓު ދޭއްގައި ވާދަކުރި ހިޝާމް ވަނީ ތިންވަނަ ބުރުން ފުރުސަތު ހޯދާފައެވެ.
އޭޝިއަން ސާފިން ޗެމްޕިއަންޝިޕުގެ ހީޓުތައް މިއަދު ފެށިއިރު، އިއްޔެ ހަވީރު ވަނީ މުބާރާތް ފެށުމަށް ކުލަގަދަ ރަސްމިއްޔާތެއް ބާއްވާފައެވެ. ކ. އަތޮޅު ތައުލީމީ މަރުކަޒުގައި މުބާރާތް ހުޅުވުމުގެ ގޮތުން ދިވެހި ސަގާފީ ހަރަކާތްތައް ހިމެނޭ ގޮތަށް، ކުލަގަދަ ރަސްމިއްޔާތެއް ބޭއްވިއިރު، މި ރަސްމިއްޔާތުގައި މުބާރާތުގައި ބައިވެރިވި ޓީމުތަކުގެ އެތުލީޓުންނާއި އޮފިޝަލުން ވަނީ ބައިވެރިވެފައެވެ. މި ރަސްމިއްޔާތު ޝަރަފުވެރިކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުالله ރާފިޢުއެވެ. މީގެ އިތުރުން މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ ރައީސް މުޙައްމަދު އަބްދުއްސައްތާރު (ޗަމްޕީ) އާއި، މޯލްޑިވްސް ސާފިން އެސޯސިއޭޝަން (އެމްއެސްއޭ) ގެ ހިންގުންތެރިން ބައިވެރިވެވަޑައިގެންފައެވެ.
އޭޝިއަން ސާފިން ޗެމްޕިއަންޝިޕްގައި ވާދަކުރާ ރާއްޖޭގެ ސާފިން މެންސް އޭ ޓީމާއި ޖޫނިއާ އޭ ޓީމު ވާދަކުރާނީ 2026 ވަނަ އަހަރުގެ އޭޝިއަން ގޭމްސް ކޮލިފައިން ބުރުގައެވެ. އަދި ބީ ޓީމުތަށް ކޮލިފައިން ބުރުގައި ވާދަނުކުރި ނަމަވެސް ބީ ޓީމުތައްވެސް ރޭންކް ކުރެވިގެންދާނެއެވެ.
އޭޝިއަން ސާފިން ޗެމްޕިއަންޝިޕް އެންމެ ފުރަތަމަ ރާއްޖޭގައި ބާއްވާފައިވަނީ މިދިޔަ އަހަރެވެ. މިދިޔަ އަހަރުވެސް މި މުބާރާތް ބާއްވާފައިވަނީ ތުލުސްދޫގައެވެ. މިދިޔަ އަހަރުގެ އޭޝިއަން ސާފިން ޗެމްޕިއަންޝިޕުގައި ރާއްޖެއަށް އޭޝިއަން ރޭންކިންގެ ރިހި މެޑެލް ލިބިފައިވާއިރު، ޓީމު އިވެންޓުން ލޯ މެޑެލްވެސް ރާއްޖެއަށް ވަނީ ލިބިފައެވެ. އަދި މީގެ އިތުރު މެންސް އޯޕަން ކެޓެގަރީން ލޯ މެޑެލް ރާއްޖޭގެ ހުސެއިން އަރީފު (އިބޫ) އަށް ވަނީ ލިބިފައެވެ. އިބޫ އަކީ މި ފަހަރު ރާއްޖޭގެ ޓީމުގެ ކޯޗެވެ.