ރާއްޖޭގައި ހަރަކާތްތެރިވާ ކުލަބުތަކުން ވިސްނަންވާނީ ހަމައެކަނި ކުރިއަށް އޮތް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބަށް އެކަނި ނޫން ކަމަށާއި، އެ އެސޯސިއޭޝަނުގެ އަސާސީ ގަވާއިދާ މެދު ވަރަށް ބޮޑަށް ވިސްނަންޖެހޭ ކަމަށްވެސް ގައުމީ ޓީމުގެ ކުރީގެ ގޯލްކީޕަރު އަދި ކާމިޔާބު ކޯޗު މައުރޫފް އަޙްމަދު (މާއްޓޭ) ވިދާޅުވެއްޖެއެވެ.
ދިވެހިރާއްޖޭގެ އަޑުން ގެނެސްދިން "ސްޕޯޓްސް ބަޒް" ޕްރޮގްރާމުގައި ވާހަކަދައްކަވަމުން ސްޕޯޓްސް ކޯޕަރޭޝަންގެ މެނޭޖިން ޑިރެކްޓަރުކަން އެންމެ ފަހުން އަދާކުރެއްވި މާއްޓޭ ވިދާޅުވީ އަސާސީ ގަވާއިދު އޮންނަ ގޮތުން ހުދުމުހުތާރު ކަންކަންކުރަން ފަހިވާ ކަމަށެވެ. އަދި މީގެ ކުރިން ތަޖުރިބާކުރެވިފައިވާ ގޮތުން އަސާސީ ގަވާއިދަކީ ކުލަބުތަކުގެ މިލްކެއްގެ ގޮތުގައި ސިފަވާ ގޮތަށް މަސައްކަތް ކުރެވިފައިވާ ކަމަށްވެސް މާއްޓޭ ވިދާޅުވިއެވެ.
މާއްޓޭ ވިދާޅުވީ ރާއްޖޭގައި ބޯޅައަށް ބަސް ބުނެވޭނީ ހަމައެކަނި އެފްއޭއެމްގެ ހިންގާ ކޮމިޓީ ތަމްސީލުކުރަމުންދާ ކުލަބުތަކަށް އެކަނި ނޫން ކަމަށާއި، މުޅި ރާއްޖެ ޝާމިލުވާ ގޮތަށް ހުރިހާ ކުލަބަކުން އެފްއޭއެމްގެ އަސީސީ ގަވާއިދާ މެދު ވިސްނަންޖެހޭ ކަމަށެވެ.
"ތިމަންނަމެންގެ ވޮއިސް، ވާހަކައަކީ އެފްއޭއެމްގެ ހިންގާ ކޮމިޓީ ނުވަތަ އެކްސްކޯ ހޮވުމުގައި ތިމަންނަމެންގެ ބަސް ބުނެވޭނެ ގޮތަކަށް އޭތި ބައްޓަންވާންޖެހޭ." މާއްޓޭ ވިދާޅުވިއެވެ.
ދުނިޔޭގެ މައި ފުޓްބޯޅަ އިދާރާ (ފީފާ) އިން އެފްއޭއެމްގެ ރައީސް ބައްސާމް އަދީލް ޖަލީލް، ނުވަ މަސް ދުވަހަށް ސަސްޕެންޑް ކޮށްފައިވާއިރު، އެ އިދާރާގެ ހިންގުން ނޯމަލައިޒިން ކޮމިޓީއަކާ ހަވާލުކުރަންވެސް ވަނީ ނިންމާފައެވެ.
މާއްޓޭ ވިދާޅުވީ ނޯމަލައިޒޭޝަން ކޮމިޓީގެ މަސައްކަތްތައް ފެށިގެން އަންނައިރު، މިއީ ވަރަށް މުހިންމު މަރުހަލާއެއް ކަމަށާއި، ކޮންމެވެސް ގޮތަކުން މެސެޖު ފޯރުކޮށްދީގެންވީ ނަމަވެސް ކުލަބުތަކުގެ ހައްގު ނޯމަލައިޒޭޝަން ކޮމިޓީން ހޯދައިދޭން ޖެހޭ ކަމަށެވެ. އަދި މި ބަދަލުތަކަށް މަސައްކަތް ނުކޮށްފި ކަމަށްވާނަ، އަނެއްކާވެސް އެފްއޭއެމް އިން ފެނިގެންދާނީ ހުދުމުހުތާރު ސިފަތަކެއް ކަމަށްވެސް ވިދާޅުވިއެވެ.
މާއްޓޭ ވިދާޅުވީ ބާރުތައް މުށުތެރެއަށް ލުމަކީ އެންމެ ނުރައްކާތެރިކަން ކަމަށާއި، އެ ފަދަ ފިޔަވަޅުތަކެއް ނޭޅި ހިނގައްޖެނަމަ އެގޮތަށް އެފްއޭއެމް ބައްޓަންވެގެން ދިޔުމުގެ ފުރުސަތު އެބައޮތް ކަމަށެވެ. އަދި އެސޯސިއޭޝަންތަކަށް ދޫކޮށްފައިވާ ރައްޔިތުންގެ ބިންތަކުން އެންމެ ރަނގަޅު މަގުސަދު ހާސިލުނުވާ ކަމަށްވެސް ވަނީ ވިދާޅުވެފައެވެ.
"ދައުލަތުން އެ ތަންތަން ދޫކޮށްފައި ހުންނަ މަގުސަދު ހާސިލެއް ނުވޭ. އެހެންވީމަ އެބަޖެހޭ ވަރަށް ވަރުގަދަ އޮޑިޓެއް ކުރަން. ކޮންގޮތަކަށްތޯ މިހާރު އެތަންތަން ބޭނުން ކުރަނީ." މާއްޓޭ ވިދާޅުވިއެވެ.
މީގެ އިތުރުން އެ ތަންތަނުން މަންފާކުރަމުންދަނީ ކޮންބަޔަކަށްތޯ ބަލަންޖެހޭ ކަމަށާއި، އެފަދަ ތަންތަނުގައި ހުރީ ގުދަނެއްތޯ، ނޫނީ ކާރު ޕާކުކުރާ ތަނެއްތޯ ބަލަންޖެހޭ ކަމަށްވެސް މާއްޓާ ވަނީ ވިދާޅުވެފައެވެ.