ބާސެލޯނާގެ އައު ކޯޗު، ހަންސީ ފްލިކްގެ އިރުޝާދުގެ ދަށުން، އެ ޓީމު ކުޅުނު ފުރަތަމަ މެޗުގައި ރޭ ރަށުން ބޭރުގައި ރޮބަޓް ލެވަންޑޯސްކީ ކާމިޔާބުކުރި ލަނޑުތަކުން ބާސެލޯނާ އިން ފަހަތުންއަރައި 2-1 އިން ވެލެންސިއާ އަތުން މޮޅުވެއްޖެއެވެ.
މިމެޗަށް ނިކުތްއިރު އަނިޔާގެ ސަބަބުން ބާސެލޯނާގެ މުހިއްމު ބައެއް ކުޅުންތެރިން ކަމަށްވާ، އިލްކާއި ގުންޑޮއާން، ޕެޑްރީ، ގާވީ، ރޮނާލްޑް އަރައޫހޯ، ފްރެންކީ ޑި ޔޯން އަދި އަންސޫ ފާޓީ ނުކުޅެވުނެވެ. މީގެއިތުރުން، އައު ސީޒަނަށް އެ ޓީމުން ގެނައި ސްޕެއިނުގެ މިޑްފީލްޑަރު، ޑަނީ އޯލްމޯ ވެސް ލީގުގައި އެ ޓީމުގެ ކުޅުންތެރިއެއްގެ ގޮތުގައި ރަޖިސްޓްރީކުރެވޭ ގޮތްނުވުމުން ސްކޮޑަށް ނުނެގުނެވެ.
މެޗު ފެށިގެން ވެލެންސިއާ އިން ޑޮމިނޭޓްކުރަމުންދިޔައިރު، ކުރީކޮޅު ލަނޑުޖެހުމަށް އެ ޓީމުގެ ފޯވާޑް، ރަފާ މިރް އަށް ރަނގަޅު ދެ ފުރުޞަތުލިބި ވަނީ ބޭކާރުވެފައެވެ. އޭގެފަހުން، ވެލެންސިއާގެ އަންދްރޭ އަލްމޭޑާ އާއި ޑިއޭގޯ ލޮޕޭޒް ފޮނުވާލި ހަމަލާތައް ހުއްޓުވަން ކުރި މަސައްކަތުގެ ތެރެއިން ބާސެލޯނާގެ ޒުވާން ޑިފެންޑަރު، ޕައޫ ކުބާސީ އަތުން ބައިކޮޅަށް ލަނޑުނުޖެހުނީ ހަމަކިރިޔާ އެވެ.
ފުރަތަމަ ހާފު ނިމެން މިނެޓަކަށްވެފައިވަނިކޮށް ވެލެންސިއާ އިން ލީޑްނެގީ ހޫގޯ ޑޫރޯ ކާމިޔާބުކުރި ގޯލުންނެވެ. އޭގެ މިނެޓެއްފަހުން، ވެލެންސިއާގެ ފޯވާޑް، މިރް އަށް އެ ޓީމުގެ ލީޑްފުޅާކޮށްދޭން ލިބުނު ފުރުޞަތު ނާކާމިޔާބުކޮށްލުމުގައި ބާސެލޯނާގެ ޑިފެންޑަރު، ކުބާސީ ވަނީ ހުށިޔާރުކަން ސާބިތުކޮށްދީފައެވެ.
ބާސެލޯނާ އިން އެއްވަރުކުރި ލަނޑު، ފުރަތަމަ ހާފުގެ އިތުރުވަގުތުގެ ފަސްވަނަ މިނެޓުގައި ކާމިޔާބުކޮށްދިނީ ލެވަންޑޯސްކީ އެވެ. ލެވަންޑޯސްކީ މި ލަނޑުޖެހީ އެންމެ ފަހުގެ ޔޫރޯ ފުޓްބޯޅަ މުބާރާތުގައި މޮޅު ކުޅުމެއްދެއްކި ސްޕެއިނުގެ ޒުވާން ވިންގް، ލަމީން ޔަމާލް ނަގައިދިން ހުރަހަކުންނެވެ. މިއާއެކު، ފުރަތަމަ ހާފު ނިމުނީ 1-1 އިން އެއްވަރުވެގެންނެވެ.
ދެވަނަ ހާފު ފެށިގެން ހަތަރުވަނަ މިނެޓުގައި ބާސެލޯނާ އިން މި މެޗުގައި ފުރަތަމަ ފަހަރަށް ލީޑްނެގި ލަނޑުޖަހައިދިނީ ވެސް ލެވަންޑޯސްކީ އެވެ. މިއީ ޕެނަލްޓީއޭރިޔާ ތެރެއިން ބާސެލޯނާގެ ބްރެޒިލް ވިންގް، ރަފީނިއާ އަށް ވެލެންސިއާގެ ޑިފެންޑަރު، ކްރިސްތިއަން މޮސްކޭރާ ކުރި ފައުލަކަށް ރެފްރީ ދިން ޕެނަލްޓީއަކުން ލެވަންޑޯސްކީ ކާމިޔާބުކުރި ގޯލެކެވެ.
މި މުބާރާތުގައި ރޭ ކުޅުނު އަނެއް މެޗުގައި އޮސަސޫނާއާ ލެގަނޭސް ވަނީ 1-1 އިން އެއްވަރުވެފައެވެ. ފުރަތަމަ ހާފުގެ 22 ވަނަ މިނެޓުގައި ލެގަނޭސްގެ ލަނޑުޖަހައިދިނި ހުއާން ކްރޫޒް އެވެ. މި މެޗުގައި އޮސަސޫނާ އިން އެއްވަރުކުރި ލަނޑަކީ، މެޗު ނިމެން 11 މިނެޓަށްވެފައިވަނިކޮށް ލެގަނޭސްގެ ގޯލްކީޕަރު، ހުއާން ސޮރިއާނޯ އަތުން ބައިކޮޅަށް ވަތް ގޯލެކެވެ.
އައު ސީޒަނުގެ ލީގުގައި އެންމެ ފަހުގެ ޗެމްޕިއަން، ރެއާލް މެޑްރިޑުން ކުޅޭ ފުރަތަމަ މެޗުގައި ނިކުންނާނީ ރަށުން ބޭރުގައި ރެއާލް މަޔޯކާއާ ދެކޮޅަށެވެ. މި މެޗު ފަށާނީ ރާއްޖޭގަޑިން މިރޭ 12:30 ގައެވެ.