ޗެލްސީ އަށް ކުޅެމުން އަންނަ އިނގިރޭސި ފުލްބެކް، ބެން ޗިލްވެލް އަށް އެކަށީގެންވާ ވަރަށް ކުޅުމުގެ ފުރުޞަތު ނުލިބޭތީވެ، މިވަގުތަށް އެންމެ ރަނގަޅު ގޮތަކީ އެހެން ކްލަބަކަށް ބަދަލުވުން ކަމަށް އެ ޓީމުގެ އައު ކޯޗު، އެންޒޯ މަރެސްކާ ބުނެފިއެވެ.
މަރެސްކާ މިހެން ބުނެފައިވަނީ، އެންމެ ފަހުގެ ޗެމްޕިއަން މެންޗެސްޓާ ސިޓީއާ ދެކޮޅަށް ޗެލްސީ ނިކުތުމަށް ހަމަޖެހިފައިވާ މެޗުގެ ކުރިން ބޭއްވި ފަރިތަކުރުންތަކަށްފަހު ނޫސްވެރިންނާ ވާހަކަދައްކަމުންނެވެ.
އެގޮތުން، މަރެސްކާ ވަނީ، ޗެލްސީގައި މިވަގުތު ގިނަ ކުޅުންތެރިންތަކެއް ތިބުމުން ޗިލްވެލް އަށް ކުޅުމުގެ ފުރުޞަތު ހޯދުމުގެ ދަތިތަކެއް އެބަހުރި ކަމަށާއި، އެހެންވެ އޭނާ އަށް އެ ކްލަބު ދޫކޮށްލުމުގެ ފުރުޞަތު ލިބިގެންވާ ކަމަށް ފާހަގަކޮށްފައެވެ.
"ވޭތުވެދިޔަ ދުވަސްތަކުގައި ޗިލީ (ޗިލްވެލް) ތަމްރީނަށް ނުނިކުމެ ހުރީ ބަލިވެގެން،" މަރެސްކާ ނޫސްވެރިންނާ ވާހަކަދައްކަމުން ބުންޏެވެ.
މަރެސްކާ ބުނީ، ޗިލްވެލް އަށް ދިމާވެގެން އުޅޭ ގޮތް ވަރަށް ސާފުކޮށް އެނގޭ ކަމަށާއި، އޭނާ އަށް ކަމުދާ ކުޅުންތެރިއަކަށްވިޔަސް ޗިލްވެލް އަށް އެންމެ އެކަށީގެންވާ މަގާމުގައި ކުޅުމަށް ދަތިތަކާއި ގޮންޖެހުންތައް ކުރިމަތިވެފައިވާ ކަމަށެވެ.
"މިއަދު ހެނދުނު ބޭއްވި ފަރިތަކުރުންތަކުގައި 22 ކުޅުންތެރިން ބައިވެރިވި. އެ ހުރިހާ ކުޅުންތެރިންނާ ސުވާލުކޮށްފިއްޔާ، އެމީހުން ބުނާނީ އާދިއްތަ ދުވަހު ސިޓީއާ ދެކޮޅަށް ކުޅެން ބޭނުންވާ ވާހަކަ. އެކަމަކު، އެއީ ވާނެ ކަމެއް ނޫން." އިއްޔެ ނޫސްވެރިންނާ ވާހަކަދައްކަމުން މަރެސްކާ ބުންޏެވެ.
މީގެ ހަތަރުވަރަކަށް އަހަރުކުރީން، 2020 ވަނަ އަހަރު ލެސްޓާ ސިޓީން ޗެލްސީ އަށް ބަދަލުވުމަށްފަހު މިހާތަނަށް 106 މެޗު ކުޅެދީފައެވެ. އެ ކްލަބާއެކު ޗިލްވެލް ވަނީ ޖެހިގެންއައި ސީޒަނުގައި ޔުއެފާ ޗެމްޕިއަންސް ލީގު ކާމިޔާބުކޮށްފައެވެ.
ޗެލްސީ އަށް ބަދަލުވެ، އެންމެ ފުރަތަމަ ޗިލްވެލް ކުޅެމުންއައީ ވާތްފަރާތުގެ ފުލްބެކްގެ މަގާމަށެވެ. ނަމަވެސް، 2022 ވަނަ އަހަރު ސްޕެއިނުގެ މާކް ކުކުރޭޔާ އައުމާއެކު އޭނާ އަށް ކުޅުމުގެ މާގިނަ ފުރުޞަތެއް ނުލިބެއެވެ. މީގެއިތުރުން، ފަހަކަށްއައިސް އަނިޔާގެ ގިނަ މައްސަލަތަކެއް ކުރިމަތިވެފައިވާ ޗިލްވެލް އަށް ނިމިދިޔަ ސީޒަނުގައި ވެސް ހުރިހާ މުބާރާތެއް އެއްކޮށް ކުޅެވިފައިވަނީ އެންމެ 21 މެޗެވެ.