ކުޅިވަރުގެ ޚިދުމަތްތެރިޔާ މައްލާ ޅަތުއްތުގެ ޖަނާޒާ ބާއްވައިފި

ރާއްޖޭގައި އުފެދުނު އެންމެ މޮޅު އެއް ފުޓުބޯޅަ ރެފްރީ މައްލާ ޅަތުއްތުގެ ޖަނާޒާ ބާއްވައިފިއެވެ.

މައްލާ ޅަތުއްތު އަވަހާރަވީ އިންޑިއާގެ ޓްރިވެންޑްރަމްގެ ހޮސްޕިޓަލެއްގައި އައިސީޔޫގައި ފަރުވާދެމުންދަނިކޮށް މިދިޔަ ބުރާސްފަތި ދުވަހުގެ މެންދުރުގެ ވަގުތެއްގައެވެ. މައްލާ ޅަތުއްތުގެ ހަށިގަނޑު ރާއްޖެ ގެނެސް، މޫނު ދެއްކުން ކުރިއަށްގެންދިޔައީ މިއަދު މެންދުރުފަހު 14:30 ގައި އިސްލާމީ މަރުކަޒުގައެވެ. މައްލާ ޅަތުއްތުގެ މޫނުފުޅު ދެކެވަޑައިގަތުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވެސް ވަޑައިގެންނެވިއެވެ. އަދި ވަޒީރުންނާއި ދައުލަތުގެ އިސްވެރިންވެސް، މައްލާގެ މޫނު ދެކެވަޑައިގަތުމަށް ވަޑައިގެންނެވިއެވެ.

މައްލާ ޅަތުއްތުގެ މައްޗަށް ކަށުނަމާދުކޮށްފައިވަނީ މަޣުރިބު ނަމާދަށްފަހު، އިސްލާމީ މަރުކަޒުގައެވެ. މައްލާގެ މައްޗަށް އިމާމްވެ ކަށުނަމާދު ކުރެއްވީ އިސްލާމީ މަރުގެ އިސް އިމާމު ފަޟީލަތުއްޝައިޚް މުޙައްމަދު ލަޠީފެވެ. ކަށުނަމާދަށްފަހު މައްލާ ޅަތުއްތު ފަސްދާނުލާފައިވަނީ ގަލޮޅު ސަހަރާގައެވެ.

މައްލާ ޅަތުއްތަކީ ރާއްޖޭގެ ކުޅިވަރުގެ ދާއިރާގައި ފާހަގަކޮށްލެވޭ ގިނަ ޚިދުމަތްތަކެއްކޮށްދެއްވި ޝަޚުޞިއްޔަތެކެވެ. އޭނާއަކީ ފީފާ ބެޖު ޙާސިލްކުރެއްވި ފުރަތަމަ ދިވެހި ރެފްރީއެވެ. އޭނާވަނީ 1969 އިން 1995 އާ ހަމައަށް ރެފްރީކަން ކުރައްވާފައެވެ. ދިވެހި ކުޅިވަރަށް ޚިދުމަތްކުރުމުގެ ރޮނގުން ޝަރަފުވެރިކަމުގެ ޤައުމީ އިނާމު، 2021 ވަނަ އަހަރު މައްލާއަށް ލިބިވަޑައިގެންފައިވެއެވެ.

މައްލާ ޅަތުއްތަކީ ރެފްރީކަން ކުރެއްވުމުގެ އިތުރުން ރެފްރީން ބިނާކުރުމުގައިވެސް މަސައްކަތްކުރެއްވި ޚިދުމަތްތެރިއެކެވެ. އެގޮތުން އޭނާ ވަނީ 1975 އިން ފެށިގެން ރެފްރީން ބިނާކުރުމުގައި މަސައްކަތްކުރައްވާފައެވެ. މާލެއާއި އަތޮޅު ތެރޭގައި ރެފްރީން ތަމްރީންކުރުމުގެ ކޯސްތައް މައްލާ ހިންގެވިއެވެ. އަދި ރާއްޖޭގައި ފުރަތަމަ ފަހަރަށް އަންހެން ރެފްރީން ބިނާކުރުމަށް، 2019 ވަނަ އަހަރު އިސްވެ މަސައްކަތް ފެއްޓެވީވެސް މައްލާ ޅަތުއްތެވެ.

ރާއްޖޭގެ ފުޓްބޯޅަ ރެފްރީންގެ ބެޖެއް، އެންމެ ފުރަތަމަ 1969 ގައި، ފަރުމާކުރެއްވީ މައްލާ ޅަތުއްތުއެވެ. އަދި އޭގެފަހުންވެސް ރެފްރީންގެ ހުރިހާ ބެޖެއް ފަރުމާ ކުރެއްވީ މައްލާ ޅަތުއްތުއެވެ. 1982 ވަނަ އަހަރު ފުޓްބޯލް އެސޯސިއޭޝަން އޮފް މޯލްޑިވްސް، އެފްއޭއެމް އުފެދުމުން، އެ އެސޯސިއޭޝަންގެ ލޯގޯ ފަރުމާކުރެއްވީވެސް މައްލާ ޅަތުއްތެވެ.

އެފްއޭއެމްގެ އެންމެ ފުރަތަމަ ޖެނެރަލް ސެކްރެޓެރީގެ މަގާމު އަދާކުރެއްވީ މައްލާ ޅަތުއްތުއެވެ. އޭގެ ފަހުން، އެފްއޭއެމްގެ ރެފްރީޒް ކޮމިޓީގެ ސެކްރެޓަރީކަމާއި ވައިސް ޗެއަރމަންކަމާއި ޗެއަރމަންކަންވެސް ކުރެއްވިއެވެ. އަދި ފުޓްބޯލް އެސޯސިއޭޝަން އޮފް މޯލްޑިވްސްގެ ޕްރެޒިޑެންޓްގެ އެޑްވައިޒަރުގެ މަގާމުވެސް ވަނީ އަދާކުރައްވާފައެވެ.

ވަރުބަލިވުމެއްނެތި، ދިވެހި ކުޅިވަރުގެ ތަރައްޤީއަށް މައްލާ ޅަތުއްތު ވަނީ 52 އަހަރު އަގުހުރި ޚިދުމަތްތަކެއް ކުރައްވާފައެވެ. މިއަދު ދުނިޔެ ދޫކުރައްވާ މައްލާ ވަޑައިގެންނެވުމަކީ ރާއްޖޭގެ ކުޅިވަރުގެ ދާއިރާއަށް ފޫނުބެއްދޭވަރުގެ އުނިކަމެއް ލިބުނުކަމެއްކަމަށް ޚުދު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވެއެވެ.