ޔުއެފާ ޔުރޮޕާ ލީގުގެ ކޮލިފައިންގެ ތިންވަނަ ބުރުގައި ރޭ ނެދަލެންޑްސްގެ އަޔެކްސް އެމްސްޓެޑަމްއާ ގްރީސްގެ ޕެނަތިނައިކޯސް ބައްދަލުކުރި މެޗުގައި ފެނިގެންދިޔަ ރެކޯޑް 34 ޕެނަލްޓީއަށްފަހު، 13-12 އިން އަޔެކްސް އެ މެޗު ކާމިޔާބުކޮށް، ޕްލޭ-އޮފް ބުރަށް ދަތުރުކޮށްފިއެވެ.
މީގެ ކުރިން ޕެނަލްޓީ ޝޫޓްއައުޓެއްގެ ރެކޯޑަކީ 2007 ވަނަ އަހަރުގެ 21 އަހަރުން ދަށުގެ ޔޫރަޕިއަން ޗެމްޕިއަންޝިޕްގެ ސެމީފައިނަލްގައި ނެދަލޭންޑްސްއިން އިނގިރޭސިވިލާތް 13-12 އިން ބަލިކުރުމަށް ޖެހި 32 ޕެނަލްޓީއެވެ.
މިހާތަނަށް ފެނިގެންގޮސްފައިވާ އެންމެ ދިގުދެމިގެންދިޔަ ޕެނަލްޓީ ޝޫޓްއައުޓުގެ ރެކޯޑު ކަނޑައެޅުނީ މިއަހަރުގެ މޭ މަހު އިޒްރޭލްގެ ތިންވަނަ ޑިވިޝަންގެ ދެ ކުލަބު ކަމަށްވާ އެސްސީ ޑިމޯނާ އާއި ޝިމްޝޯން ޓެލް އަވީވްގެ ޕްރޮމޯޝަން ޕްލޭއޯފް ސެމީފައިނަލް މެޗުގައި ޖެހުނު 56 ޕެނަލްޓީއެވެ.
އަޔެކްސްއާ ޕެނަތިނައިކޯސް މެދުގައި މިދިޔަ ހަފްތާގައި ޕެނަތިނައިކޯސްގެ ދަނޑުގައި 0-1 އިން އަޔެކްސް މޮޅުވިއިރު، ރޭގެ މެޗުގެ 89 ވަނަ މިނެޓުގައި ޕެނަތިނައިކޯސް މޮޅުވި ލަނޑުޖަހައިދިނީ ޓެޓޭ އެވެ.
ޔޯހާން ކްރައިފް އެރީނާގައި ރޭ ކުޅުނު މި މެޗުގެ ފުރިހަމަވަގުތު ހަމަވިއިރު އެގްރިގޭޓުން 1-1 އިން ދެ ޓީމު އެއްވަރުވުމުން ދެން ކުޅެވުނު އިތުރުވަގުތުގެ 15 މިނެޓުގެ ދެ ހާފުގެ ކުޅުމަށްފަހު ނަތީޖާ ނެރުމަށް ދެން ޖެހުނީ ޕެނަލްޓީ ޖަހާށެވެ.
މި މެޗުގެ ތަރިއަކަށްވީ، އުމުރުން 40 އަހަރުގެ އަޔެކްސް ގޯލްކީޕަރު، ރެމްކޯ ޕަސްވީރް އެވެ. ޕަސްވީރް ވަނީ ފަސް ޕެނަލްޓީ މަތަކޮށް، އޭނާގެ ޕެނަލްޓީވެސް ގޯލަކަށް ބަދަލުކޮށްލާފައެވެ.
ޕެނަލްޓީ ޝޫޓްއައުޓްގައި ދެ ޓީމުން ފޮނުވާލި ފުރަތަމަ ފަސް ޕެނަލްޓީގެ ތެރެއިން ކާމިޔާބުކުރެވުނީ ހަތަރު ޕެނަލްޓީ އެވެ. މެޗުގެ ނަތީޖާ ކަނޑައެޅުނީ ދެ ޓީމުން ވެސް ފޮނުވާލި 17 ވަނަ ޕެނަލްޓީ އިންނެވެ. ޝޫޓްއައުޓްގައި ނެދަލޭންޑްސްގެ ގައުމީ ޓީމުގެ ކުޅުންތެރިއެއް ކަމަށްވާ ބްރަޔަން ބްރޮބީ ދެ ޕެނަލްޓީ މިސްކޮށްލިއެވެ. އަޔެކްސް މޮޅުވި ޕެނަލްޓީ ކާމިޔާބުކޮށްދިނީ އެންޓޯން ގާއީ އެވެ.
"އަހަރެން ޕެނަލްޓީ ސޭވުކުރަން ފަހެއް އެއީ ވަރަށް ގިނަ އަދަދެއް، އެކަމަކު މިހާ ބޮޑު ކަމެއް ދިމާވާނެ ކަމަކަށް ހިއެއްނުކުރަން،" މެޗަށްފަހު އަޔެކްސްގެ ކީޕަރު، ޕަސްވީރް ބުންޏެވެ.
މި މަހުގެ ފަހުކޮޅު ކުޅުމަށް ހަމަޖެހިފައިވާ ޔުރޮޕާ ލީގުގެ ޕްލޭ-އޮފް ބުރުގައި އަޔެކްސް ނިކުންނާނީ ޕޮލެންޑްގެ ޖަގިއެލޯނިއާ ބިއަލިސްޓޮކްއާ ދެކޮޅަށެވެ.