ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) ހިންގުން ކުޅިވަރާ ބެހޭ ގައުމީ މަޖިލީހަށް ހަވާލުކޮށްފައިވާ ކަމަށް ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ޠަލާލް ވިދާޅުވީ ބެޑްމިންޓަން އެސޯސިއޭޝަންގެ ހިންގުން ވަގުތީ ގޮތުން އެ އެސޯސިއޭޝަންގެ މުއައްސިސް (ކުޅިވަރާ ބެހޭ ގައުމީ މަޖިލިސް) އާ ހަވާލު ކުރުމަށް ނިންމައި، އެކަން އެ އެސޯސިއޭޝަނަށް މިއަދު އަންގާފައިވާ ކަމަށެވެ. އަދި އެސޯސިއޭޝަންގެ އައު ހިންގާ ކޮމިޓީ އިންތިޚާބު ކުރުމަށްޓަކައި ކުރަންޖެހޭ މަސައްކަތްތައް ކުޅިވަރާ ބެހޭ ގައުމީ މަޖިލީހުގެ މަޝްވަރާއާއެކު ފަށާފައިވާ ކަމަށްވެސް ވިދާޅުވިއެވެ.
ބެޑްމިންޓަން އެސޯސިއޭޝަންގެ ހިންގާ ކޮމިޓީގެ މުއްދަތު ހަމަވެފައި އޮންނަތާ ފަސް މަހަށް ވުރެ ގިނަ ދުވަސް ވެފައިވާއިރު، އެ އެސޯސިއޭޝަނުން އެންމެ ފަހުން ހިންގާ ކޮމިޓީ އިންތިހާޚާބުކޮށްފައިވަނީ 2021 ވަަނަ އަހަރުގެ ފެބްރުއަރީ މަހުގެ 24 ވަނަ ދުވަހެވެ. އަދި އެ ކޮމިޓީ ކޮމިޝަނަރ އޮފް ސްޕޯޓްސްގައި ރަޖިސްޓްރީ ކޮށްފައިވަނީ އެ އަހަރުގެ މާޗު މަހުގެ 11 ގައެވެ.
މިދިޔަ މަހުގެ މެދު ތެރޭގައި ބެޑްމިންޓަން އެސޯސިއޭޝަންގެ ރައީސްގެ މަގާމުން މޫސާ ނާޝިދު (މޫސަ) ވަނީ އިސްތިއުފާ ދެއްވާފައެވެ. ނަމަވެސް އެ އެސޯސިއޭޝަނުގެ ރައީސްކަން މިދިޔަ ތިން ދައުރުގައި ކުރެއްވި މޫސަ އިސްތިއުފާދެއްވާފައިވަނީ މަގާމުގެ މުއްދަތު ހަމަވިތާ ހަތަރު މަސް ފަހުންނެވެ.
ބެޑްމިންޓަން އެސޯސިއޭޝަނުން މި އަހަރުގެ މާޗު މަހުގެ 22 ވަނަ ދުވަހުގެރޭ އައްޑޫ ސިޓީގައި އިންތިޚާބެއް ބާއްވަން އެންމެ ފުރަތަމަ މަސައްކަތްކުރި ނަމަވެސް، އެ އިންތިޚާބު ފަސްކުރަން ޖެހުނީ އެންޓި ކޮރަޕްޝަން ކޮމިޝަން (އޭސީސީ) ގެ އެންގުމަކާއެކުއެވެ. އަދި އޭގެ ކުރިން އެ އިންތިޚާބުގެ ކަންކަން މަޑުޖައްސާލަން ސްޕޯޓްސް ކޮމިޝަނަރުވެސް ވަނީ ދެ ފަހަރެއްގެ މަތިން އަންގަވާފައެވެ. އެގޮތުން އެންގެވީ އިންތިޚާބުގައި ވޯޓު ދޭ މެންބަރުންގެ ސައްހަ ކަމާމެދު ސުވާލު އުފެއްދެވުމަށްފަހުއެވެ. އަދި އަސާސީ ގަވާއިދު އިސްލާހު ކުރުމަށް ފަހު ނޫނީ އިންތިޚާބުގެ ކަންކަން ކުރިއަށް ނުގެންދިޔުމަށްވެސް އެ ފަހަރު ވަނީ އަންގަވާފައެވެ. ނަމަވެސް އަސާސީ ގަވާއިދު އިސްލާހުކުރުމުގެ މަސައްކަތް އެ އެސޯސިއޭޝަނުން ކޮށްފައެއް ނުވެއެވެ.