އޮލިމްޕިކް ގޭމްސްއަށް ރާއްޖޭގެ އެތުލީޓަކު ކޮލިފައިވުމާއެކު ފުރަތަމަ ފިޔަވަޅު އެޅިއްޖެ ކަމަށާއި، ދެވަނަ ފިޔަވަޅަކީ "ޕޯޑިއަމް ފިނިޝް" އަކާ ހަމައަށް ދިޔުން ކަމަށް ކުޅިވަރާއި ހަށިހެޔޮަކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ފްރާންސްގެ ވެރިރަށް ޕެރިހުގައި ކުރިއަށްދިޔަ މި ފަހަރުގެ އޮލިމްޕިކްސްގައި ވާދަކުރި ރާއްޖޭގެ ކޮންޓިންޖެންޓް އެނބުރި މާލެ އައުމުން ވަނީ ހޫނު މަރުހަބާއެއް ކިޔާފައެވެ. މި ފަހަރުގެ އޮލިމްޕިކްސް އަކީ ރާއްޖެއަށް ތާރީޚީ ފަަހަރެކެވެ. އެ ގޮތުން ދިވެހި އެތުލީޓަކު ވަނީ ފުރަތަމަ ފަހަރަށް ކޮލިފައިން ބުރެއް ފަހަނައަޅައި ގޮސް އޮލިމްޕިކްސްގައި ވާދަކޮށްފައެވެ. އެ ޝަރަފު ހޯދާފައިވަނީ ޓީޓީ ތަރި ފާތިމަތު ދީމާ އަލީއެވެ.
ވެލާނާ އިންޓަރނޭޝަނަލް އެއާޕޯޓުގައި ހުންނަވައި "ޕީއެސްއެމް ސްޕޯޓްސް" އަށް ދެއްވި އިންޓަވިއުއެއްގައި ކުޅިވަރާ ބެހޭ ވަޒީރު ރާފިޢު ވިދާޅުވީ ފުރަތަމަ ފަހަރަށް ދިވެހި އެތުލީޓެއް އޮލިމްޕިކްސްއަށް ކޮލިފައިވުމަކީ ޚާއްސަ ކަމެއް ކަމަށާއި، އެއާއެކު ފުރަތަމަ ފިޔަވަޅު އެޅިއްޖެ ކަމަށެވެ. އަދި ދެން އޮތީ ދެވަނަ ފިޔަވަޅު އެޅުން ކަމަށާއި، އެގޮތުން "ޕޯޑިއަމް ފިނިޝް" އަކާ ހަމައަށް ދިޔުމަކީ މާ ދުރުގައި އޮތް ކަމެއް ނޫން ކަމަށްވެސް ވަނީ ވިދާޅުވެފައެވެ. ވަޒީރު ވިދާޅުވީ މެޑެއްޔަކާ ހަމައަށް ދިޔުމަށް ހުރި މަގުތައް ކޮށައި، ވީހާވެސް ބޮޑަށް އެސޯސިއޭޝަންތަކާއި، މޯލްޑިވްސް އޮލިމްޕިކް ކޮމިޓީ ގުޅިގެން މަސައްކަތްކޮށް، މެޑެއްޔާ ހަމައަށް ވާސިލުވެވޭނެ މަގެއް އެތުލީޓުންނަށް ދައްކަން ޖެހޭ ކަމަށެވެ.
"ބައިވެރިވި އެތުލީޓުންނަށްވެސް އަޅުގަނޑުމެން އިތުރު ހިތްވަރެއް ދޭން ބޭނުންވާ ސަބަބަކީ، މިއީ ފުރަތަމަ ފިޔަވަޅުކަން ކޮލިފައިވުމަކީ. ދެން އޮތީ އަޅުގަނޑުމެން މި ޕޯޑިއަމްއާ ހަމައަށް ދަތުރުކުރަން އޮތް ފުރުސަތުކަން، ދަތުރުކުރަން އޮތް ރާސްތާ އެބައޮތްކަން. އެހެންމާ ފުރަތަމަ ފިޔަވަޅު އަޅުގަނޑުމެންނަށް މި ނެގުނީ. ދެވަނަ ފިޔަވަޅު ދެން އޮތީ ނެގުން. އެހެންމާ މާ ދުރަކު ނޫންކަން މިތިބީ ޕޯޑިއަމްއަށް." ވަޒީރު ވިދާޅުވިއެވެ.
ވަޒީރު އިތުރަށް ވިދާޅު މިހާރުގެ އަމާޒަކީ ވީބައިވެރިވާ މުބާރާތަކުން، އެ ބައިވެރިވާ އެތުލީޓުންގެ ލިމިޓަކީ ކޮބައިތޯ ބަލައި، އެ ލިމިޓް ފަހަނައަޅައި ދިޔުމަށް ކަމަށެވެ. އަދި އެ މުބާރާތަކަށް ތައްޔާރުވާއިރު މިހާރު އެތުލީޓުން ބަލަނީ އެ މުބާރާތުގައި ބައިވެރިވާ އެހެން އެތުލީޓުންނަށް ވުރެ ރަނގަޅު ކުޅުމެއް ދެއްކުމަށް ކަމަށާއި، އިންޑިވިޖިއުލް އަދި ޓީމު ކުޅިވަރުތަކުގައި އަމާޒަކީ ޕޯޑިއަމް ފިނިޝް އަކާ ހަމައަށް ދިޔުން ކަމަށްވެސް ވިދާޅުވިއެވެ.
"އެހެންވީމާ އަޅުގަނޑުމެންގެ ވިޝަން ބަދަލުވެއްޖެ، އެ އަމާޒު ބަދަލުވެއްޖެ. އެހެންވީމާ އެ ކުރިއެރުން އަޅުގަނޑުމެންގެ ތެރޭގައި ފެންނަމުން މި ދަނީ. އެހެންވީމާ އިންޑިވިޖިއުލް އަދި ޓީމު ކުޅިވަރުތަކުގައި އަމާޒަކީ ޕޯޑިއަމް ފިނިޝް އަކާ ހަމައަށް ދިޔުން." ވަޒީރު ވިދާޅުވިއެވެ.
މި ފަހަރުގެ އޮލިމްޕިކްސްގައި ރާއްޖޭގެ ފަސް އެތުލީޓެއް ވާދަކުރިއިރު، މިއީ ރާއްޖޭގެ ކުޅިވަރު ތާރީޚުގައިވެސް އޮލިމްޕިކްސްއަށް އެންމެ ގިނަ ކުޅިވަރުގެ ބައިވެރިވުމާއެކު، ބޮޑު ކޮންޓިންޖެންޓެއް ދިޔަ ފަހަރެވެ. އެގޮތުން ފުރަތަމަ ފަހަރަށް މި ފަހަރުގެ އޮލިމްޕިކްސްގައި ރާއްޖެއިން ހަތަރު ކުޅިވަރެއްގައި ވާދަކުރިއިރު، އެ ކުޅިވަރުތަކީ ބެޑްމިންޓަނާއި، އެތުލެޓިކްސް އާއި، ސްވިމިން އަދި ޓޭބަލް ޓެނިހެވެ.