އަންނަ އަހަރުގެ ޕީއެސްއައިޕީ މަޝްރޫޢުތަކުގެ %50 ޚާއްސަކުރަނީ ބޯހިޔާވަހިކަމަށް: ވަޒީރު ޝަފީޤު

އަންނަ އަހަރުގެ ބަޖެޓުގައި ޕީއެސްއައިޕީ މަޝްރޫޢުތަކުގެ 50 އިންސައްތަ ބޯހިޔާވަހިކަމަށް ޚާއްސަކުރުމަށް ރައީސުލްޖުމްހުރިއްޔާ ޑރ. މުޙައްމަދު މުޢިއްޒު އިރުޝާދުދެއްވާފައިވާ ކަމަށް މާލީ ވަޒީރު ޑރ. މުޙައްމަދު ޝަފީޤު ވިދާޅުވެއްޖެއެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގައި މެމްބަރުންގެ ސުވާލުތަކަށް ޖަވާބުދެއްވަމުން މާލީ ވަޒީރު ޑރ. މުޙައްމަދު ޝަފީޤު ވިދާޅުވީ މިދައުރު ނިމޭއިރު، ބޯހިޔާވަހިކަމުގެ މައްސަލައަށް ހައްލެއް ހޯދުމަށް ސަރުކާރުން ބޭނުންވާ ކަމަށެވެ.

ސަބަބަކީ ރާއްޖޭގައި ދިމާވާ އިޖުތިމާޢީ ހުރިހާ މައްސަލަތަކުގެ މައިގަނޑު ސަބަބަކީ ބޯހިޔާވަހިކަމުގެ ދަތިކަން ކަމަށް ވަޒީރު ވިދާޅުވިއެވެ. އެހެންކަމުން މިކަމަށް ހައްލު ގެނައުމަށް ސަރުކާރުން ޚާއްސަ އިސްކަމެއް ދެއްވާ ކަމަށެވެ.

"ހައުސިންއަށް ޓޯޓަލް ސޮލޫޝަންއެއް ހޯދައިދޭން ސަރުކާރުން ބޭނުންވޭ، އިޖުތިމާޢީ މައްސަލަތަކުގެވެސް ރޫޓު ކޯސްއަކީ ގެދޮރުގެ ދަތިކަން،" ވަޒީރު ޝަފީޤު ވިދާޅުވިއެވެ.

ވަޒީރު ވިދާޅުވީ އެކި ކަހަލަ ފެސިލިޓީތަކުގެ އެހީގައިވެސް ބޯހިޔާވަހިކަމުގެ މަޝްރޫޢުތައް ހިންގުމަށް ސަރުކާރުން ބޭނުންވާ ކަމަށެވެ. އެގޮތުން އިންޑިއާގެ ލައިން އޮފް ކްރެޑިޓު ފެސިލިޓީގެ ދަށުން މިއަހަރު 4000 ހައުސިން ޔުނިޓުގެ މަސައްކަތް ފެށުމަށް ބޭނުންވާ ކަމަށްވެސް ވަޒީރު ވިދާޅުވިއެވެ.

"މިހާރު ލިބިފައި ހުރި ފައިނޭންސިން ފެސިލިޓީތައްވެސް ހައުސިންގއަށް ފޯކަސްކޮށްގެން ކުރިއަށްގެންދިޔުމަށް ނިންމާފައިވަނީ، ލައިން އޮފް ކްރެޑިޓުގެ 300 މިލިއަން ޑޮލަރާއި ގާތްކުރާ އަދަދެއް އެވެއިލަބަލް ކުރެވޭނެ ހައުސިންގއަށް،" ވަޒީރު ޝަފީޤު ވިދާޅުވިއެވެ.

ބޯހިޔާވަހިކަމުގެ މައްސަލައަށް ސަރުކާރުން ޚާއްސަ އިސްކަމެއް ދެއްވާ ކަމަށް ވަޒީރު ޝަފީޤު ވިދާޅުވެފައިވާއިރު، މިހަފްތާގައި މަޖިލީހުގައި ވާހަކަދައްކަވަމުން ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވަޒީރު ޑރ. އަލީ ހައިދަރު އަޙްމަދުވެސް ވަނީ މިއަހަރު ނިމުމުގެ ކުރިން ބޯހިޔާވަހިކަމުގެ ބޮޑު މަޝްރޫޢެއް ފައްޓަވާނެ ކަމަށް ވިދާޅުވެފައެވެ. އެގޮތުން މިިދައުރު ނިމުމުގެ ކުރިން މުޅި ރާއްޖޭގައި 85000 ހައުސިންގ ޔުނިޓް ގާއިމުކުރައްވާނެ ކަމަށްވެސް ވަޒީރުވަނީ ވިދާޅުވެފައެވެ.