ދަރަނި އަދާކުރުމަށް ދައުލަތަށް ލިބޭ އާމްދަނީ އިތުރުކުރުމުގެ ޕްލޭންތަކެއް ދަނީ ހަދަމުން: މާލީ ވަޒީރު

ދަރަނިތައް އަދާކުރުމަށް ދައުލަތަށް ލިބޭ އާމްދަނީ އިތުރަން ޖެހޭކަމަށާއި، އެކަމާއި ގުޅޭ މުހިންމު މަސައްކަތްތަކެއް ކުރައްވަމުން ގެންދަވާކަމަށް މާލީ ވަޒީރު ޑރ. މުޙައްމަދު ޝަފީޤު ވިދާޅުވެއްޖެއެވެ. ވަޒީރު މިހެން ވިދާޅުވީ ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަފުޅުދައްކަވަމުންނެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގައި، 2025 އިން 2027 ވަނަ އަހަރަށް ދައުލަތުގެ މެދު ރާސްތާގެ ފިސްކަލް އަދި ދަރަނީގެ ސިޔާސަތުގެ ތަފުސީލުތައް ދެއްވަމުން މާލީ ވަޒީރު ޑރ. މުޙައްމަދު ޝަފީޤު ވިދާޅުވީ ބޮޑެތި ދަރަނިތަކެއް ދައްކަން ޖެހިފައިވާއިރު، އެކަމަށް ފުރިހަމައަށް ތައްޔާރުވެފައި ނުވާކަމަށެވެ.

ރާއްޖޭގެ ބޮޑު ދަރަނީގެ މައްސަލައިގައި ހުރި ކަންބޮޑުވުންތައް ހިއްސާކުރައްވަމުން މާލީ ވަޒީރު ވިދާޅުވީ މިހާރު ލިބޭ އާމްދަނީގެ 28 އިންސައްތަ ޚަރަދުކުރަން ޖެހެނީ ދަރަނީގެ އިންޓްރެސްޓު އަދާކުރަން ކަމަށެވެ. މީގެ ސަބަބުން މަޝްރޫޢުތައް ހިންގުމަށާއި، ސަރުކާރުން ދޭން ޖެހޭ އެހެން ޚިދުމަތްތައް ދިނުމުގައި ދަތިވާކަމަށް ވަޒީރު ވިދާޅުވިއެވެ. މީގެއިތުރުން ބޮޑެތި ދަރަނިތައް އަދާކުރުމަށް މުހިންމު ފިޔަވަޅުތަކެއް އެޅުމަށް ނިންމާފައިވާ ކަަމަށްވެސް ވަޒީރު ވިދާޅުވިއެވެ.

"ކްރެޑިބަލް ފައިނޭންސިންގް ޕްލޭނެއް އެކުލަވާލައި، 2025ވަނަ އަހަރު، އެއްފަހަރާ 100 މިލިއަން ޑޮލަރު އަދި 2026ވަނަ އަހަރު 1 ބިލިއަން ޑޮލަރު ދައްކަންޖެހޭ. ދަރަނި އަނބުރާ ދެއްކުމުގެ ގާބިލްކަން އިތުރުކުރަންޖެހޭ. އެގޮތުން ސޮވްރެން ފަންޑަށް ޖަމާކުރާ ފައިސާ އިތުރުކުރެވޭނެ ގޮތްތައް ހޯދަން ޖެހޭ." މާލީ ވަޒީރު ޑރ. މުޙައްމަދު ޝަފީޤު ވިދާޅުވިއެވެ.

ދައުލަތަށް އާމްދަނީ އިތުރުކުރުމަށް ގިނަ މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވާ މާލީ ވަޒީރު ޑރ. މުޙައްމަދު ޝަފީޤް ވިދާޅުވީ، އިޤްތިސާދު ސިންދަފާތުކުރުމަށް ގިނަ ކަންތައްތަކެއް ރާވައި ތަންފީޒްކުރައްވަމުން ގެންދަވާކަމަށެވެ. އެގޮތުން ސޮވެރިން ޑިވެލޮޕްމަންޓް ފަންޑަށް ސަރުކާރުން ދަނީ ފައިސާ ޖަމާކުރަމުންނެވެ. ޖުލައި މަހުގެ ނިޔަކަށް 65 މިލިއަން ޑޮލަރު ސަރުކާރުން ވަނީ އެފަންޑަށް ޖަމާކޮށްފައެވެ.