ލިވަޕޫލުން ގެނައުމަށް މަސައްކަތްކުރަމުންދިޔަ، ރެއާލް ސޮސިއެޑާޑްގެ ސްޕެއިން މިޑްފީލްޑަރު، މާޓިން ޒުބިމެންޑީ އެ ކްލަބުގައި މަޑުކުރަން ނިންމައިފިއެވެ.
އެންމެ ފަހުގެ މީޑިއާ ރިޕޯޓްތައް ބުނާގޮތުން، ލިވަޕޫލުން ޒުބިމެންޑީ އާއެކު އެއްބަސްވުމަކަށް އައުމަށް މަސައްކަތްކުރަމުންދިޔައިރު އޭނާގެ ކްލަބުން އުއްމީދުކުރީ އެ ޑީލް ކުރިއަށްދާނެ ކަމަށެވެ. ނަމަވެސް، ޒުބިމެންޑީ ވަނީ ލިވަޕޫލްގެ ހުށަހެޅުމަށް ފުރަގަސްދިނުމަށްފަހު ސޮސިއެޑާޑްގައި މަޑުކުރުމަށް ނިންމާފައެވެ.
ޒުބިމެންޑީ، 25، ގެ ސޮއި ހޯދުމުގައި ކުރިމަތިވީ އެންމެ ބޮޑު ގޮންޖެހުމަކީ އޭނާގެ ކޮންޓްރެކްޓް އުވާލުމަށް ދައްކަންޖެހޭ 60 މިލިއަން ޔޫރޯ (63.4 މިލިއަން އެމެރިކާ ޑޮލަރު) އެއްފަހަރާ ދައްކަންޖެހުމެވެ.
ސޮސިއެޑާޑްގެ އެކަޑެމީން ވިދާލި ޒުބިމެންޑީ ވަނީ ސީނިއާ ޓީމަށް ކުޅެން ފެށިފަހުން މިހާތަނަށް 187 މެޗު ކުޅެދީފައެވެ. އަދި ސްޕެއިނުގެ ގައުމީ ޓީމަށް މިހާތަނަށް 10 މެޗު ހަމަކޮށްފައިވާ ޒުބިމެންޑީ ވަނީ ނިމިދިޔަ ޔޫރޯ ފުޓްބޯޅަ މުބާރާތުގައި އެ ޓީމަށް ހަތަރު މެޗު ކުޅެފައެވެ. އެގޮތުން، އެ މުބާރާތުގެ ފައިނަލް މެޗުގައި އިންގްލެންޑާ ދެކޮޅަށް ފަހު ހާފުގައި އޭނާ ވަނީ މޮޅު ކުޅުމެއްދައްކާފައެވެ.
ނިމިދިޔަ ސީޒަނުގެ ސްޕެނިޝް ލީގުގައި ސޮސިއެޑާޑް ހަވަނަ ހޯދައިދިނުމުގައި މުހިއްމު ދައުރެއް އަދާކުރި އެއް ކުޅުންތެރިޔާ ކަމަށްވާ، ސްޕެއިނުގެ ޑިފެންޑަރު، ރޮބިން ލެ ނޯމަންޑް ވަނީ އެ ކްލަބު ދޫކޮށް އެތުލެޓިކޯ މެޑްރިޑަށް ބަދަލުވެފައެވެ. މީގެއިތުރުން، ސްޕެއިނަށް ޔޫރޯ ކާމިޔާބުކޮށްދިނުމުގައި މުހިއްމު ދައުރެއް އަދާކުރި އެ ޓީމުގެ މިޑްފީލްޑަރު، މިކޭލް މަރީނޯ ހޯދުމުގެ މަސައްކަތް އާސެނަލުން ދަނީ ކުރަމުންނެވެ.
މީގެކުރީން، އާސެނަލް އާއި ބާސެލޯނާ ފަދަ ކްލަބުތަކުން ވެސް ވަނީ ޒުބިމެންޑީ ގެނައުމަށް ޝައުގުވެރިކަން ފާޅުކޮށްފައެވެ.