އާސެނަލްގެ ބުކާޔޯ ސަކާ އާއި ޗެލްސީގެ ކޯލް ޕާމާ އަދި މެންޗެސްޓާ ޔުނައިޓެޑްގެ މިޑްފީލްޑަރު، ކޮބީ މައިނޫ ޕްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިން ހޮވާ މެންސް ޔަންގް ޕްލެއާ އޮފް ދި އިޔާގެ އެވޯޑަށް ނޮމިނޭޓްވެއްޖެއެވެ.
2022-23 ވަނަ އަހަރުގެ ސީޒަނުގައި މި އެވޯޑް ހާސިލްކުރި ސަކާ ވަނީ މިދިޔަ ސީޒަނުގެ ހުރިހާ މުބާރާތެއްގައި ވަނީ ޖުމްލަ 20 ލަނޑުޖަހައި، އިތުރު 14 ގޯލްޖެހުމަށް އެހީތެރިވެދީފައެވެ. އަދި ނިމިދިޔަ ޔޫރޯ ފުޓްބޯޅަ މުބާރާތުގެ ފައިނަލަށް އިންގްލެންޑް ދަތުރުކުރިއިރު ސަކާ ވަނީ މޮޅު ކުޅުމެއްދައްކާފައެވެ.
މި ފަހަރުގެ އެވޯޑާ ސަކާއާ އެންމެ ގާތުން ވާދަކުރާ، ޕާމާ ވަނީ، މެންޗެސްޓާ ސިޓީ އިން 42.5 މިލިއަން ޕައުންޑަށް ޗެލްސީއަށް ބަދަލުވުމަށްފަހު އޭނާގެ ފުރަތަމަ ސީޒަންގައި ފާހަގަކޮށްލެވޭ މޮޅު ކުޅުމެއްދައްކާފައެވެ. މިހާތަނަށް ޗެލްސީ އަށް ކުޅެދިން 52 މެޗުގައި 25 ލަނޑުޖަހައި، އިތުރު 15 ގޯލްޖެހުމަށް އެހީތެރިވެދީފައެވެ. އޭނާ ވަނީ މިހާތަނަށް ގިނަ އެވޯޑުތަކެއް ހޯދާފައެވެ.
މި އެވޯޑަށް ނޮމިނޭޓްވެފައިވާ ހަ ކުޅުންތެރިންގެ ޝޯޓްލިސްޓުގެ ތެރޭގައި ދެން ހިމެނެނީ، ޔުނައިޓެޑްގެ އާޖެންޓީނާ ވިންގް، އަލެހަންދްރޯ ގަނާޗޯ އާއި ކުރީން ކްރިސްޓަލް ޕެލަސް އަށް ކުޅުނު މައިކަލް އޮލީސޭގެ އިތުރުން ބްރައިޓަން ހޯވަން އެންޑް އެލްބިއަންގެ ފޯވާޑް، ޖޮއާއޯ ޕެޑްރޯ އެވެ.
ފަހަކަށްއައިސް އިނގިރޭސި ގައުމީ ޓީމުން ގަވާއިދުން ޖާގަ ހޯދަމުން އަންނަ އުމުރުން 19 އަހަރުގެ މައިނޫ ވަނީ ނިމިދިޔަ ސީޒަނުގައި ޔުނައިޓެޑްގެ ފުރަތަމަ އެގާރައިގައި ހިމެނިގެން ގިނަ މެޗުތަކެއް ކުޅެ، ތަފާތު ދައްކާފައެވެ. އެގޮތުން، އޭނާ ވަނީ އެފްއޭ ކަޕްގެ ފައިނަލް މެޗު އެ ޓީމަށް ކާމިޔާބުކޮށްދިނުމުގައި އިސް ދައުރެއް އަދާކޮށް ލަނޑުވެސް ޖަހައިފައެވެ.
މައިނޫ އާއެކު ޔުނައިޓެޑަށް ކުޅެމުން އަންނަ ގަނާޗޯ ވަނީ އެ ޓީމާއެކު މޮޅު ކުޅުމެއްދައްކައި ހުރިހާ މުބާރާތެއްގައި ޖުމްލަ 10 އަށްވުރެ ގިނަ ލަނޑުޖަހައިދީފައެވެ. އެގޮތުން، ޔުނައިޓެޑުން ނިމިދިޔަ ސީޒަނުގައި ޔޫރަޕްގެ މުބާރާތެއްގައި ކުޅުމުގެ ފުރުޞަތު ހޯދިއިރު ގަނާޗޯ ވަނީ އެފްއޭ ކަޕްގެ ޗެމްޕިއަންކަން ހޯދައިދިނުމަށް ލަނޑުޖަހައިދީފައެވެ.
ދާދިފަހުން، ޖަރުމަނުގެ ބަޔާން މިއުނިކަށް ބަދަލުވި ފްރާންސްގެ އޮލީސޭ ވަނީ ޕެލަސް އާއެކު ނިމިދިޔަ ސީޒަނުގައި ކުރިމަތިވީ އަނިޔާގެ މައްސަލަތަކާއެކު ކުޅުނު 19 މެޗުގައި 10 ލަނޑުޖަހައި، އިތުރު ހަ ގޯލްޖެހުމަށް އެހީތެރިވެދީފައެވެ.
ފޯވާޑްލައިންގެ ގިނަ މަގާމުތަކަށް ކުޅެވޭ ބްރައިޓަންގެ ބްރެޒިލް ފޯވާޑް، ޕެޑްރޯ ވަނީ ހުރިހާ މުބާރާތެއްގައި އެ ޓީމަށް ކުޅުނު 40 މެޗުގައި 20 ލަނޑުޖަހައި، އިތުރު ތިން ގޯލްޖެހުމަށް އެހީތެރިވެދީފައެވެ.
ޕީއެފްއޭ ވިމެންސް ޔަންގް ޕްލެއާ އޮފް ދި އިޔާ އަށް ވާދަކުރާ ކުޅުންތެރިންގެ ޝޯޓްލިސްޓު ވެސް އިއްޔެ ވަނީ ހާމަކޮށްފައެވެ. މި ފަހަރުގެ އެވޯޑަށް ނޮމިނޭޓްވެފައިވާ ކުޅުންތެރިންނަކީ، ޓޮޓެންހަމް ހޮޓްސްޕާގެ ގްރޭސް ކްލިންޓަން، ސިޓީގެ ކިއާރާ ކީޓިންގ އާއި ޖެސް ޕާކްގެ އިތުރުން ޔުނައިޓެޑްގެ މާޔާ ލެ ޓިސިއާ އަދި ޗެލްސީގެ ލޯރެން ޖޭމްސް އާއި އެގީ ބީވަރ-ޖޯންސް އެވެ.
މި އަހަރުގެ ޕީއެފްއޭ އެވޯޑްސް ހަފްލާ ބޭއްވުމަށް ހަމަޖެހިފައިވަނީ މި އޮގަސްޓް މަހުގެ 20 ވާ އަންގާރަ ދުވަހު އެވެ.