ކްރިސްޓަލް ޕެލަސްގެ އިނގިރޭސި ޑިފެންޑަރު، މާކް ގޭހީ، 24، ގަތުމަށް ނިއުކާސަލް ޔުނައިޓެޑުން ތިންވަނަ ބިޑެއް ހުށަހަޅާފައިވާ ކަމަށް ފަހުގެ މީޑިއާ ރިޕޯޓްތައް ބުނެފިއެވެ. އަދި މި ބިޑަކީ 60 މިލިއަން ޕައުންޑާ ގާތްކުރާ އަދަދެއް ކަމަށް ބެލެވެއެވެ.
އެގޮތުން، ނިއުކާސަލުން ހުށަހެޅި ތިންވަނަ ބިޑް އެކުލެވިގެންވަނީ، އެންމެ ފުރަތަމަ 55 މިލިއަން ޕައުންޑް ދިނުމަށްފަހު، ބޯނަހުގެ ގޮތުގައި އިތުރު 5 މިލިއަން ޕައުންޑް ދިނުމަށެވެ.
ދާދިފަހުން، ގޭހީގެ ސޮއި ހޯދުމަށް ނިއުކާސްލުން ކުރި ދެވަނަ ބިޑަކީ 50 މިލިއަން ޕައުންޑަށްވުރެ ކުޑަކޮށް ދަށް އަދަދެއް ކަމަށް ވެސް މީޑިއާ ހަބަރުތައް ބުނެއެވެ.
ނަމަވެސް، ޕެލަސްއިން ގޭހީ ވިއްކާލަން ކަނޑައަޅާފައިވަނީ 70 މިލިއަން ޕައުންޑާ ގާތްކުރާ އަދަދެއް ކަމަށް ހަބަރުތައް ބުނެއެވެ. ގޭހީ ވަނީ ނިމިދިޔަ ޔޫރޯ ފުޓްބޯޅަ މުބާރާތުގެ ފައިނަލަށް އިންގްލެންޑް ދަތުރުކުރިއިރު މޮޅު ކުޅުމެއްދައްކާފައެވެ.
މީގެ ތިން އަހަރެއްހާ ދުވަސްކުރީން، 2021 ގައި ޗެލްސީ އިން ޕެލަސް އަށް ބަދަލުވެ، މިހާތަނަށް އެ ޓީމަށް 111 މެޗު ކުޅެދީފައިވެއެވެ. މިދިޔަ އަހަރުތަކުގައި ދެއްކި މޮޅު ކުޅުމުގެ ސަބަބުން ބޮޑެތި ކްލަބުތަކުން އަންނަނީ އޭނާ އަށް ފާރަލަމުންނެވެ.
ޕެލަސް އާއެކު ގޭހީ ހަދާފައިވާ އެއްބަސްވުން ހަމަވާން ބާކީ ދެ އަހަރަށްވުރެ ކުރު މުއްދަތެއް އޮތްއިރު، އެންމެ މުހިއްމު އެއްކުޅުންތެރިޔާ ހިލޭ ޓްރާންސްފާއެއްގައި ދޫކޮށްލުމަކީ އެކްލަބުން ކުރަން ބޭނުންވާކަމެއް ނޫނެވެ.