ރާއްޖޭގެ ރިސޯޓުތަކުގެ މެދުގައި ކުރިއަށްދާ އެންމެ ބޮޑު ފުޓްސަލް މުބާރާތް ކަމަށްވާ ރިސޯޓް ލީގުގެ ސައުތު މާލޭ ޒޯނުގެ ސެމީ ފައިނަލަށް ކްރޮސްރޯޑްސް އާއި ވޮލްޑޯފް އެސްޓޯރިއާ ދަތުރުކޮށްފިއެވެ.
މުބާރާތުގެ ސެމީއަށް ކްރޮސްރޯޑްސް ދަތުރުކޮށްފައިވަނީ ކުއާޓާ ފައިނަލުގައި އޯޒެން ލައިފް މާދޫ ބަލިކޮށްގެންނެވެ. ކްރޮސްރޯޑްސް އިން މާދޫ ބަލިކުރީ 5-1 ގެ ނަތީޖާއަކުންނެވެ.
މެޗު ފެށިގެން ދެ ޓީމުގެ ފަރާތުން ވާދަވެރި ކުޅުމެއް ފެނިފައިވީނަމަވެސް، މެޗުގެ 17 ވަނަ މިނެޓުގައި ޝައްފާން ހަލީމް ވަނީ ލަނޑެއް ޖަހައި ކްރޮސްރޯޑްސް އަށް ކުރިހޯދަދީފަ އެވެ. ފުރަތަމަ ހާފު ނިމެން މިނެޓަކަށް ވެފައިވަނިކޮށް ހަސަން ލައުހު ވަނީ ލަނޑެއް ޖަހައި ކްރޮސްރޯޑްސް އަށް ލީޑު ފުޅާކޮށްދީފައެވެ. އަދި އިތުރު ވަގުތުގައި އެ ޓީމުގެ ނޫހު އިބްރާހިމް ވަނީ ލަނޑެއް ޖަހާފައެވެ. ކްރޮސްރޯޑްސް އިން ފުރަތަމަ ހާފު ނިންމާލީ ތިން ލަނޑުގެ ފަރަގަކާއެކު އެވެ.
ދެވަނަ ހާފު ފެށިގެން ފަސްވަނަ މިނެޓުގައި މާދޫ ޓީމުގެ މުހައްމަދު އައްޒާމް ވަނީ ލަނޑެއް ޖަހައި، އެ ޓީމަށް އުއްމީދެއް ހޯދަދީފަ އެވެ. ނަމަވެސް، އޭނާ ލަނޑު ޖެހިތާ މިނެޓެއް ނުވަނީސް ލައުހު ވަނީ އޭނާގެ ދެވަނަ ލަނޑު ޖަހާފަ އެވެ. އަދި މެޗު ނިމެން ތިން މިނެޓަށް ވެފައިވަނިކޮށް ކްރޮސްރޯޑްސްގެ ޝައްފާން ވަނީ އޭނާގެ ދެވަނަ ލަނޑު ޖަހައި، އެ ޓީމަށް ލީޑު ފުޅާކޮށްދީފަ އެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ކްރޮސްރޯޑްސްގެ ލައުހު އެވެ.
ވޮލްޑޯފް އެސްޓޯރިއާ ސެމީއަށް ދަތުރުކޮށްފައިވަނީ ކުއާޓާ ފައިނަލުގައި ފަހަތުން އަރައި ސޯ މޯލްޑިވްސް ބަލިކޮށްގެންނެވެ. ވޮލްޑޯފް ކުއާޓާގެ ޖާގަ ހޯދީ ޕްލޭއޮފް ކާމިޔާބު ކުރުމަށްފަހު އެވެ. ގުރޫޕު ސްޓޭޖުގައި މި ދެ ޓީމު ބައްދަލުކުރި މެޗު، 4-2 ގެ ނަތީޖާއަކުން ކާމިޔާބުކުރީ ސޯ މޯލްޑިވްސް އެވެ. ވޮލްޑޯފް އިން ވަނީ ބަދަލުހިފާ ކުއާޓާ ގައި 3-2 ގެ ނަތީޖާއަކުން ސޯ މޯލްޑިވްސް ބަލިކޮށްފަ އެވެ.
ހޮނިހިރު ދުވަހު ހަވީރު ކްރޮސްރޯޑްސް ގައި ކުޅުނު މެޗުގައި ފުރަތަމަ ލަނޑު ޖަހައި ކުރިހޯދީ ސޯ މޯލްޑިވްސް އިންނެވެ. މެޗުގެ އަށްވަނަ މިނެޓުގައި އެ ޓީމަށް ލަނޑު ޖަހައިދިނީ އަބްދުﷲ އަލީ އެވެ. ވޮލްޑޯފް އިން ވަނީ ހާފުގެ ފަހު މިނެޓުގައި ލަނޑެއް ޖަހައި ނަތީޖާ ހަމަހަމަކޮށްފަ އެވެ. އެ ޓީމުގެ ފުރަތަމަ ލަނޑު ޖެހީ ހަސަން ޔާސިރު އަދުނާނެވެ. މިއާއެކު ފުރަތަމަ ހާފު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.
ދެވަނަ ހާފުގެ މެޗުގެ 30 ވަނަ މިނެޓުގައި ޔާސިރު ވަނީ އިތުރު ލަނޑެއް ޖަހައި، ފުރަތަމަ ފަހަރަށް ވޮލްޑޯފަށް ކުރިހޯދަދީފަ އެވެ. އަދި މެޗު ނިމެން މިނެޓަކަށް ވެފައިވަނިކޮށް ވޮލްޑޯފްގެ ކެޕްޓަން، އަބްދުﷲ ރަބާހު ވަނީ ލަނޑެއް ޖަހައި އެ ޓީމަށް ލީޑު ފުޅާކޮށްދީފައެވެ. މެޗުގެ ފަހު މިނެޓުގައި ސޯ މޯލްޑިވްސްގެ ކެޕްޓަން، އިސްމާއިލް ވަހީދު ލަނޑެއް ޖެހިކަމުގައިވިޔަސް، އެ ޓީމަށް ނަތީޖާ އެއްވަރު ކުރެވިފައެއް ނުވެއެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ވޮލްޑޯފްގެ ޔާސިރު އެވެ.