ކޮސްޓަ ރިކާގެ ކޯޗުގެ މަގާމުން އާޖެންޓީނާގެ ގުސްޓާވޯ އަލްފާރޯ އިސްތިޢުފާ ދީފައިވާ ކަމަށް އެ ގައުމުގެ ފުޓްބޯޅަ ފެޑެރޭޝަނުން ބުނެފިއެވެ.
އަލްފާރޯ، 61، ކޮސްޓަ ރިކާގެ ކޯޗުކަމުގައި ނުވަ މަސްދުވަހު މަސައްކަތްކުރުމަށްފަހު އިސްތިއުފާދީފައިމިވަނީ އެންމެ ފަހުގެ ކޮޕާ އެމެރިކާ ފުޓްބޯޅަ މުބާރާތުގައި އެ ޓީމުގެ ނަތީޖާތައް ދަށްވުމުން ކަމަށް ބެލެވެއެވެ. އެ މުބާރާތުން ކޮސްޓަ ރިކާ ކެޓީ ގްރޫޕް ސްޓޭޖުންނެވެ.
ދާދިފަހުން، ކޮސްޓަ ރިކާގެ ކޯޗުގެ މަގާމުން އަލްފާރޯ އިސްތިއުފާ ދީފައިވާކަން އޭނާގެ ޓީމުން ވެސް ވަނީ ކަށަވަރުކޮށްދީފައެވެ.
އަލްފާރޯ މަގާމުން އިސްތިއުފާދިނުމާ ގުޅިގެން ކޮސްޓަ ރިކާގެ ފުޓްބޯޅަ ފެޑެރޭޝަނުން އިން ނެރުނު ބަޔާނެއްގައިވަނީ، އެ ގައުމުގެ ފުޓްބޯޅަ އަށް މިދިޔަ ދުވަސްތަކުގައި އަލްފާރޯ އާއި އޭނާގެ ޓީމުން ކޮށްދީފައިވާ މަސައްކަތްތަކަށް ޝުކުރު އަދާކުރާކަމަށެވެ.
އެންމެ ފަހުގެ ފީފާ ވޯލްޑް ކަޕަށް އެކުއޭޑޯ ގެންގޮސްދިން އަލްފާރޯ އަކީ ޕެރަގުއޭގެ ކޯޗުގެ މަގާމަށް ދެން ގެންނާނެ ކަމަށް ބެލެވޭ ފަރާތްކަމަށް ފަހުގެ މީޑިއާ ހަބަރުތައް ބުނެއެވެ. އެންމެ ފަހުގެ ކޮޕާ އެމެރިކާ އަށް ފަހު އޭރުގެ ޕެރަގުއޭ ކޯޗު، ޑެނިއަލް ގާނާރޯ ވަނީ މަގާމުން ދުރުކޮށްފައެވެ.