އިންޑޮނޭޝިއާގެ ބަތަމްގައި މިހާރު ކުރިއަށްދާ 56 ވަނަ އޭޝިއާ ބޮޑީބިލްޑިން އެންޑް ފިޒީކް ޗެމްޕިއަންޝިޕުގެ 60 ކިލޯ ކެޓަގަރީގައި ވާދަކޮށް ރާއްޖޭގެ ޝާހީން އިބްރާހިމް ދީދީ ރިހި މެޑަލެއް ހޯދައިފި އެވެ.
ޝާހިލް ރިހި މެޑަލް ހޯދި މި ކެޓަގަރީން އެއްވަނަ ހޯދާފައިވަނީ އިންޑިއާގެ ތަންގަދުރާޖް ޖަޔަޕްރަކާޝް އެވެ. ދެވަނައަށް ޝާހީން ދިޔައިރު، ތިންވަނަ ހޯދީ އިންޑިއާގެ ސޯރާ އަލްމާން އެވެ. އަދި ދެން ވާދަކުރި މެލޭޝިއާގެ މުހައްމަދު ހަމްރުއްދީން ދިޔައީ ހަތަރުވަނަ އެވެ.
މިއީ އޭޝިއާގެ މުބާރާތަކުން ޝާހީން އަށް ލިބުނު ދެވަނަ މެޑަލް އެވެ. މީގެކުރިން ޝާހީން ވަނީ، 2017 ވަނަ އަހަރުގެ އޭޝިއާ ބޮޑީބިލްޑިން އެންޑް ފިޒީކް ޗެމްޕިއަންޝިޕުން ރަންމެޑަލް ހޯދާފައެވެ. އެއާއެކު، އޭނާ ވެފައިވަނީ އޭޝިއާ ބައްރުގެ މުބާރާތަކުން ރަން މެޑަލެއް ހޯދައިދިން ރާއްޖޭގެ ފުރަތަމަ އެތުލީޓަށެވެ.
އޭގެ ކުރިން، ޝާހީން ވަނީ 2014 ވަނަ އަހަރު މަކާއޫގައި ބޭއްވި އޭޝިއަން ބޮޑީބިލްޑިން އެންޑް ފިޒީކް ޗެމްޕިއަންޝިޕުގެ 160 ސެންޓިމީޓަރު ފިޓްނަސް ކެޓަގަރީން ލޯ މެޑަލް ހޯދައިފަ އެވެ.
ޝާހީންގެ އިތުރުން، އޭޝިއާ މުބާރާތަކުން ދެން ރާއްޖެ އަށް ރަން މެޑަލް ހޯދައިދިނީ، މުހައްމަދު މޫސާ އެވެ. އެއީ، ކ. މާފުށީގައި 2022 ވަނަ އަހަރު ހޯސްޓްކުރި އޭޝިއާ ބޮޑީބިލްޑިން މުބާރާތުގެ 55 ކިލޯ ކެޓަގަރީންނެވެ. މުބާރާތުގައި ރާއްޖޭގެ އަޒްނީން ރަޝާދުވެސް ދަނީ ރަނގަޅު ކުރިއެރުންތަކެއް ހޯދަމުންނެވެ.