ވުލްވަހެމްޕްޓަން ވޮންޑަރާސް އަށް ކުޅެމުންއައި ޕޯޗުގީޒް ވިންގް، ޕެޑްރޯ ނެޓޯގެ ސޮއި ހޯދުމަށް ޗެލްސީ އިން އެއްބަސްވުމަކަށް އައިސްފައިވާ ކަމަށް ފަހުގެ މީޑިއާ ޚަބަރުތައް ބުނެފިއެވެ.
އެގޮތުން، ޗެލްސީ އިން ވަނީ ނެޓޯ، 24، ގަތުމަށް ވުލްވްސް އާއެކު 54 މިލިއަން ޕައުންޑާ ގާތްކުރާ އަދަދެއްގެ ޓްރާންސްފާ ފީއަކަށް އެއްބަސްވެފައެވެ.
މި ޑީލުގެ ތެރެއިން، ޗެލްސީ އިން އެންމެ ފުރަތަމަ 51.3 މިލިއަން ޕައުންޑް ދޭން އެއްބަސްވެފައިވާއިރު، ބޯނަހުގެ ގޮތުގައި އިތުރު 2.6 މިލިއަން ޕައުންޑް ވުލްވްސް އަށް ދޭނެ އެވެ. ޗެލްސީ އިން ވުލްވްސް އާއެކު އެއްބަސްވުމަކަށް އާދެވިފައިމިވަނީ ދެ ފަހަރުމަތީން ކުރި ބިޑެއް އެ ކްލަބުން އަނބުރާ ފޮނުވާލާފައިވަނިކޮށެވެ.
އެންމެ ފުރަތަމަ، ޗެލްސީން ވަނީ ނެޓޯ ހޯދުމުގެ މަސައްކަތުގެ ތެރެއިން ކުޅުންތެރިންތަކަކާއެކު ފައިސާ ދޭގޮތަށް ބިޑެއް ހުށަހަޅައިފައެވެ. ޗެލްސީން ބަދަލުގައި ހުށަހެޅީ ކުޅުންތެރިންނަކީ، ޑޭވިޑް ޑަޓްރޯ ފޮފާނާ އާއި ޓްރެވޯ ޗަލޯބާ އެވެ. އެ ބިޑު އަނބުރާ ވުލްވްސް ފޮނުވާލުމުން، ދެވަނަ ފަހަރަށް ޗެލްސީން ހުށަހެޅި ހަމައެކަނި ފައިސާގެ އޮފާއެއް ހިމެނޭ ޑީލަށް ވެސް ވުލްވްސް އިން އެއްބަހެއްނުވިއެވެ.
އިޓަލީގެ ލާޒިއޯ އިން 2019 ވަނަ އަހަރު ވުލްވްސް އަށް ބަދަލުވެ، ނެޓޯ ވަނީ މިހާތަނަށް 135 މެޗުގައި އެ ޓީމަށް 14 ލަނޑުޖަހައިދީފައެވެ. މިދިޔަ ދެ ސީޒަނުގައި ވެސް އަނިޔާގެ ގިނަ މައްސަލަތަކެއް ކުރިމަތިވި ނެޓޯ، ޗެލްސީގެ ކުޅުންތެރިއެއްގެ ގޮތުގައި ރަސްމީކޮށް ދައްކާލުމުގެކުރީން މެޑިކަލް ޓެސްޓް ހެދުމަށް ވަނީ ހަމަޖެހިފައެވެ.
ނެޓޯގެ ޓްރާންސްފާ އާއެކު މި ފަހަރުގެ ސީޒަނުގައި ޗެލްސީން ކުޅުންތެރިން ގަތުމަށް ކުރި ހޭދައިގެ އަދަދު 200 މިލިއަން ޕައުންޑް ފަހަނައަޅައިދާނެ އެވެ. އަދި، މި ޑީލް ފުރިހަމަކުރެވިއްޖެނަމަ ވެގެންދާނީ ވުލްވްސް އަށް މިހާތަނަށް ކުޅުންތެރިއަކު ވިއްކާލައިގެން އެންމެ ބޮޑު އާމްދަނީއެއް ލިބޭނެ ޑީލަށެވެ.
މީގެކުރީން، ކުޅުންތެރިއަކު ވިއްކާލައިގެން ވުލްވްސް އަށް އެންމެ ބޮޑު އާމްދަނީއެއް ލިބިފައިވަނީ ނިމިދިޔަ ސީޒަނުގައި 47 މިލިއަން ޕައުންޑްގެ ޑީލެއްގައި ސައުދީ ޢަރަބިއްޔާގެ އަލް ހިލާލް އަށް ބަދަލުވި ޕޯޗުގަލްގެ މިޑްފީލްޑަރު، ރުބެން ނެވޭސް އަށެވެ.