މެންޗެސްޓާ ސިޓީ އަށް ކުޅެމުންއައި އާޖެންޓީނާގެ ފޯވާޑް، ހޫލިއަން އަލްވަރޭޒް، އެ ޓީމު ދޫކޮށްލުމަށްފަހު ސްޕެއިނުގެ އެތުލެޓިކޯ މެޑްރިޑާ ގުޅެން ބޭނުންވީ އައު ޗެލެންޖެއް ނެގުމުގެ ގޮތުން ކަމަށް ކޯޗު، ޕެޕް ގާޑިއޯލާ ބުނެފިއެވެ.
އަލްވަރޭޒް، 24، ގެ ސޮއި ހޯދުމަށް އެތުލެޓިކޯ އިން ވަނީ ބޯނަހާއެކު ގާތްގަނޑަކަށް 81.5 މިލިއަން ޕައުންޑްގެ ޓްރާންސްފާ ފީއެއް ދެއްކުމަށް ސިޓީ އާއެކު އެއްބަސްވުމަކަށް އައިސްފައެވެ.
ދާދިފަހުން އަލްވަރޭޒްގެ މުސްތަގުބަލާ ގުޅޭގޮތުން، ގާޑިއޯލާ ވަނީ އަލްވަރޭޒް ބަހައްޓަން ބޭނުންވާ ކަމަށް ބުނެފައެވެ. އަދި މި މަހުގެ ކުރީކޮޅު ސީޒަން ފެށުމަށް ހަމަޖެހިފައިވާއިރު އަލްވަރޭޒް އަށް ވަރަށް ބޮޑަށް ބަރޯސާވާނެ ކަމަށް ވެސް ގާޑިއޯލާ ވަނީ ބުނެފައެވެ.
އެހެންނަމަވެސް، އެ ކްލަބު ދޫކޮށް ދާން ބޭނުންވާ ކުޅުންތެރިއަކަށް ސިޓީން ހުރަސްނާޅާނެ ކަމަށް ގާޑިއޯލާ ވަނީ ބުނެފައެވެ. އަނެއްކޮޅުން، މީގެ ދެ އަހަރެއްހާ ދުވަސްކުރީން، 2022 ގައި އާޖެންޓީނާގެ ރިވާ ޕްލޭޓް އިން 17 މިލިއަން ޕައުންޑްގެ ޑީލެއްގައި ސިޓީއާ ގުޅުނު އަލްވަރޭޒް ގަތުމަށް އެތުލެޓިކޯ އިން ބޮޑު އަގެއް ހުށަހަޅާފައިވުމުން އެ ޑީލު ވެގެންދާނީ ވަރަށް ފައިދާ ބޮޑު ޑީލަކަށެވެ.
ސިޓީން އަލްވަރޭޒް ވިއްކާލުމަށްފަހު ބަދަލުގައި އެހެން ކުޅުންތެރިއަކު ހޯދާނެ ކަމާމެދު މާބޮޑު ޔަގީންކަމެއް ދެވެން ނެތް ކަމަށް ގާޑިއޯލާ ބުނެފައިވާއިރު، އެ ޓީމު ދޫކޮށްލިނަމަވެސް އަލްވަރޭޒް ދަނީ ކްލަބުގެ އެންމެ ހެޔޮއެދުންތަކާއެކުގައި ކަމަށެވެ.
"އޭނާ އާއެކު މަސައްކަތްކުރުމަކީ ލިބުނު އުފަލެއް،" ގާޑިއޯލާ ބުންޏެވެ.
އަލްވަރޭޒް ދާން ބޭނުންވާ ސަބަބާ ބެހޭގޮތުން އިތުރަށް ސުވާލުކުރުމުން، ގާޑިއޯލާ ބުނީ، "އޭނާ ޤަބޫލުކުރަނީ މި ކްލަބާއެކު އޭނާގެ ދަތުރު ނިމުނީ ކަމަށް، އެހެންވީމާ ދެ ކްލަބުން އެއްބަސްވުމަކަށް އާދެވުނީ."
ގާޑިއޯލާ އިތުރަށް ބުނީ، އަލްވަރޭޒްގެ ރަނގަޅު އަޚްލާގުގެ ސަބަބުން އޭނާ އަކީ ކްލަބުގެ އެންމެންގެ މެދުގައި މަގްބޫލް އަދި ވަރަށް ބޮޑު ލޯތްބެއް ލިބިފައިވާ ކުޅުންތެރިއެއް ކަމަށެވެ. މީގެކުރީން، އެތައް ކުޅުންތެރިންނާ ގުޅޭގޮތުން ބުނެފައިވާ ފަދައިން، އަލްވަރޭޒް ވެސް ސިޓީ ދޫކޮށް ދާން ބޭނުންވަނީ އައު ޗެލެންޖެއް ނެގުމުގެ ގޮތުން ކަމަށް ގާޑިއޯލާ ބުންޏެވެ.