މެންޗެސްޓާ ޔުނައިޓެޑްގެ ކޮންޓްރެކްޓް ހަމަވުމުން އެއްވެސް ޓީމަކާ ނުގުޅެ ގާތްގަނޑަކަށް 15 ވަރަކަށް މަސްދުވަހު ކުޅުމާ ދުރުގައި ހުރުމަށްފަހު، ސްޕެއިނުގެ ގޯލްކީޕަރު، ޑޭވިޑް ޑެ ހެއާ، އިޓަލީގެ ފިއޮރެންޓީނާ އަށް ސޮއިކޮށްފިއެވެ.
ޑެ ހެއާ، 33، ފިއޮރެންޓީނާއާ ގުޅުނީ އެއްއަހަރު ދުވަހުގެ ކޮންޓްރެކްޓެއްގައެވެ. އެ ޓީމާއެކު ޑެ ހެއާ ވެފައިވާ އެއްބަސްވުމުގެ ދަށުން، އިތުރު އަހަރަކަށް ކޮންޓްރެކްޓް އައު ކުރުމުގެ ފުރުޝަތު ލިބިގެންވެއެވެ.
ޔުނައިޓެޑްގެ ހޭދަކުރީ 12 ވަރަކަށް އަހަރުގެ ތެރޭގައި ޑެ ހެއާ ވަނީ، 545 މެޗު އެ ޓީމަށް ކުޅެދީ، އެ ކްލަބުގެ ލެޖެންޑް ޕީޓާ ޝުމައިކަލްގެ ކްލީން ޝީޓް ރެކޯޑް މުގުރާލައިފައެވެ. މި މުއްދަތުގެ ތެރޭގައި ޑެ ހެއާ ވަނީ ޔުނައިޓެޑާއެކު ފަސް ޓްރޮފީ ހޯދައިފައެވެ.
ޑެ ހެއާ އެންމެ ފަހުން ވާދަވެރި މެޗެއްގައި ކުޅެފައިވަނީ 2023 ވަނަ އަހަރުގެ އެފްއޭ ކަޕް ފައިނަލްގައި މެންޗެސްޓާ ސިޓީ އަތުން ޔުނައިޓެޑް ބަލިވި މެޗުގައެވެ. މީގެއިތުރުން، ގައުމީ ޓީމަށް ޑެ ހެއާ އެންމެ ފަހުން ކުޅުނީ 2020 ވަނަ އަހަރުއެވެ. އޭނާ ވަނީ މިހާތަނަށް ސްޕެއިނަށް ޖުމުލަ 45 މެޗު ހަމަކޮށްފައެވެ.
ފިއޮރެންޓީނާ އިން ނިމިދިޔަ ސީޒަނުގެ އިޓާލިއަން ސެރިއޭގައި ނިންމާލީ އަށްވަނައިގައި އޮވެގެންނެވެ. އެ ޓީމުން ވަނީ ޔުއެފާ ކޮންފަރެންސް ލީގުގެ ފައިނަލްގައި ގްރީސްގެ އޮލިމްޕިއާކޯސް އަތުން ބަލިވެފައެވެ.
އައު ސީޒަނުގެ ލީގުގައި ފިއޮރެންޓީނާ ކުޅޭ ފުރަތަމަ މެޗުގައި މި އޮގަސްޓް މަހުގެ 17 ވަނަ ދުވަހު ރަށުން ބޭރުގައި ނިކުންނާނީ ޕާމާއާ ދެކޮޅަށެވެ.