އޮލިމްޕިކްސްގެ ފިރިހެނުންގެ ފުޓްބޯޅަ އިވެންޓްގައި 32 އަހަރަށް ފަހު ސްޕެއިނުން ރަން މެޑެލް ހާސިލްކޮށްފިއެވެ.
އޮލިމްޕިކްސްގެ ފިރިހެނުންގެ ފުޓްބޯޅައިގައި ސްޕެއިނުން އެންމެ ފަހުން ރަން މެޑެލް ހޯދީ 1992 ވަނަ އަހަރު ބާސެލޯނާގައި ބޭއްވި ގޭމްސްގައެވެ. މީގެއިތުރުން، ސްޕެއިންގެ ޓީމަކުން އޮލިމްޕިކްސްގެ އެއްވެސް ކުޅިވަރެއްގެ ރަން މެޑެލް އެންމެ ފަހުން ހާސިލްކުރީ 1996 ވަނަ އަހަރު އެޓްލާންޓާގައި ބޭއްވުނު އޮލިމްޕިކްސްގައެވެ. އެފަހަރުގެ ގޭމްސްގައި ފިރިހެނުންގެ ވޯޓަރ ޕޯލޯ ޓީމުން ވަނީ ރަން މެޑެލް ހާސިލްކޮށްފައެވެ.
ޕާކް ޑެސް ޕްރިންސަސްގައި ކުޅުނު ފައިނަލް މެޗުގައި ސްޕެއިނުން ވަނީ ފަހަތުންއަރައި، 5-3 އިން ފްރާންސް ބަލިކޮށްފައެވެ.
މި މެޗު ފެށިގެން 11 ވަނަ މިނެޓުގައި ކުރީން ލީޑްނެގީ ފްރާންސުންނެވެ. އެ ޓީމަށް މިލަނޑުޖަހައިދިނީ އެންޒޯ މިލޮޓް އެވެ. އޭގެފަހުން، މެޗުގެ 18 ވަނަ މިނެޓުގައި ފާމިން ލޮޕޭޒް ކާމިޔާބުކުރި ގޯލާއެކު ސްޕެއިނުން ނަތީޖާ އެއްވަރުކުރިއެވެ. އަދި އޭގެފަހުން، ތިން މިނެޓުގެ ތެރޭގައި ކާމިޔާބުކުރި ދެލަނޑާއެކު ސްޕެއިނުން ފުރަތަމަ ހާފު ނިންމާލީ 3-1 އިން ކުރީގަ އޮވެގެންނެވެ.
ސްޕެއިނުން ފުރަތަމަ ފަހަރަށް ލީޑްނެގި ލަނޑު، 25 ވަނަ މިނެޓުގައި ޖަހައިދިނީ ވެސް ފާމިން ލޮޕޭޒް އެވެ. މިއީ މި ފަހަރުގެ ގޭމްސްގައި އޭނާ ޖެހި ހަވަނަ ގޯލެވެ. އޭގެ ތިން މިނެޓުފަހުން، ސްޕެއިނުގެ ތިންވަނަ ލަނޑުޖަހައިދިނީ އަލެކްސް ބައެނާ އެވެ. އޭނާ މި ލަނޑުޖެހީ ލިބުނު ހިލޭޖެހުމަކުންނެވެ.
މެޗުގެ 79 ވަނަ މިނެޓުގައި ފްރާންސްގެ ދެވަނަ ލަނޑުޖަހައިދިނީ މަގްނެސް އަކްލިއުޝޭ އެވެ. މިއީ އެ ޓީމުގެ މައިކަލް އޮލީސޭ ފޮނުވާލި ހިލޭޖެހުމެއްގެ އެހީގައި އޭނާ ކާމިޔާބުކުރި ގޯލެކެވެ. އޭގެފަހުން، މެޗުގެ އިތުރުވަގުތުގެ ތެރޭގައި ފްރާންސުން އެއްވަރުކުރީ ލިބުނު ޕެނަލްޓީއަކުން ޖީން-ފިލިޕް މަޓޭޓާ ކާމިޔާބުކުރި ގޯލުންނެވެ. މިއީ ޕެނަލްޓީއޭރިޔާ ތެރެއިން އެ ޓީމުގެ އާނައު ކަލިމުއެންޑޯ އަށް ސްޕެއިނުގެ ހުއާން މިރަންޑާ ކުރި ފައުލަކަށް ވީއޭއާރް އިން ބެލުމަށްފަހު ރެފްރީ ދިން ޕެނަލްޓީއެކެވެ.
މެޗުގެ ފުރިހަމަވަގުތު ހަމަވިއިރު ދެ ޓީމު 3-3 އިން އެއްވަރުވުމުން، ދެން ކުޅެވުނު އިތުރުވަގުތުގެ 15 މިނެޓުގެ ދެ ހާފުގެ ތެރެއިން ފުރަތަމަ ހާފު ނިމެންދަނިކޮށް ސްޕެއިނުން އަލުން ލީޑްނެގީ ސާޖިއޯ ކަމޭޔޯ ކާމިޔާބުކުރި ހިތްގައިމު ގޯލުންނެވެ. ސްޕެނިޝް ލީގުގެ ރަޔޯ ވަޔެކާނޯ އަށް ކުޅެމުންއަންނަ ކަމޭޔޯ ކުޅެން ނިކުތީ ފަހު ހާފުގެ ފަހުބައިގައެވެ.
އޭގެފަހުން، މެޗުގެ އިތުރުވަގުތުގެ 15 މިނެޓުގެ ތެރެއިން ފަހު ހާފުގެ ކުޅުމަށްފަހު ރެފްރީ ދެއްކި އިތުރުވަގުތުގެ ތެރޭގައި ސްޕެއިނުގެ ފަސްވަނަ ލަނޑުޖަހައިދިނީ ވެސް ކަމޭޔޯ އެވެ. އޭނާ މި ލަނޑުޖެހީ އެ ޓީމުގެ ގޯލްކީޕަރު، އާނައު ޓެނާސްގެ އެސިސްޓަކުންނެވެ.
މިއީ މިއަހަރުގެ ތެރޭގައި ސްޕެއިނުގެ ގައުމީ ފުޓްބޯޅަ ޓީމަކުން ކާމިޔާބުކުރި ހަތަރުވަނަ މުބާރާތެވެ. މި އަހަރުގެ ޔޫރަޕިއަން ޗެމްޕިއަންޝިޕް ސްޕެއިނުގެ ސީނިއާ ޓީމުން ކާމިޔާބުކުރިއިރު، އެ ގައުމުގެ އަންހެން އަދި ފިރިހެން ޓީމުން ވަނީ 19 އަހަރުން ދަށުގެ ޔޫރަޕިއަންޝިޕް ކާމިޔާބުކޮށްފައެވެ.
މީގެއިތުރުން، ކުލަބުތަކުގެ މެދުގައި ކުޅެމުންއަންނަ ޔުއެފާގެ އެންމެ ޝަރަފުވެރި މުބާރާތް ކަމަށްވާ، ޔުއެފާ ޗެމްޕިއަންސް ލީގުގެ ތަށި މި ފަހަރު ކާމިޔާބުކުރީ ވެސް ސްޕެއިނަށް ނިސްބަތްވާ ކްލަބުތަކުންނެވެ. އެގޮތުން، ފިރިހެނުންގެ ޗެމްޕިއަންސް ލީގުގެ ޗެމްޕިއަންކަން ރެއާލް މެޑްރިޑް ހޯދިއިރު، އަންހެނުންގެ މެދުގައި ކުޅޭ ވިމެންސް ޗެމްޕިއަންސް ލީގެ ތަށި އުފުލާލީ ބާސެލޯނާ ވިމެންސް ޓީމެވެ.