ނެޓްބޯޅަ އެސޯސިއޭޝަން އޮފް މޯލްޑިވްސް އިން ކުރިޔަށްގެންދާ އިންޓަ ސްކޫލް ނެޓްބޯޅަ މުބާރާތް 17 ސްކޫލަކުން 43 ޓީމާއި އެކު ފަށައިފިއެވެ.
މިއަދު ހަވީރު ފެށި މި މުބާރާތް ޝަރަފްވެރިކޮށްދެއްވީ ރައީސުލްޖުމްހޫރިއްޔާގެ ނާއިބްގެ އަނބިކަބަލުން އާއިޝަތު އަފްރީން މުޙައްމަދު އެވެ.މުބާރާތް ފެއްޓެވުމުގެ ގޮތުން ނާއިބު ރައީސް އަބިކަނބަލުން އަފްރީން ވަނީ މުބާރާތުގެ ރަސްމީ ބޯޅަ އަންޕެޔަރުންނާ ހަވާލުކޮއްދެއްވާފައެވެ.
މުބާރާތުގެ ފުރަތަމަ މެޗުގައި މިއަދު ހަވީރު ބައްދަލުކުރީ ޖަމާލުއްދީން ސްކޫލާއި އިމާދުންދީން ސްކޫލެވެ. މިމެޗު 22-11 އިން ކާމިޔާބު ކުރީ ޖަމާލުއްދީން ސުކޫލެވެ. މިއަދު މުބާރާތް ފެށީ 15 އަހަރުންދަށުގެ އުމުރުފުރާއިންނެވެ. މެޗުގެ ކުއީން އޮފްދަ މެޗަށް ހޮވުނު ޖަމާލުއްދީން ސުކޫލުގެ ޒުބީ އަހުމަދު ސައުދަށް އިނާމް ހަވާލުކޮއްދެވީ މުބާރާތުގެޝަރަފްވެރި މެހްމާނު ރައީސުލްޖުމްހޫރިއްޔާގެ ނާއިބްގެ އަނބިކަބަލުން އާއިޝަތު އަފްރީން މުޙައްމަދުއެވެ.
މިއަދުން ފެށިގެން މި މަހުގެ 25 ވަނަ ދުވަހަށް ކުރިޔަށްދާ މި މުބާރާތް މިއަހަރު ކުރިޔަށްދަނީ ތިން އުމުރުފުރާ ހިމެނޭގޮތަށެވެ. އެއީ 13 އަހަރުން ދަށް، 15 އަހަރުން ދަށް، އަދި 17 އަހަރުން ދަށުގެ އުމުރުފުރައެވެ. 13 އާއި 15 އަހަރުން ދަށުގެ އުމުރުފުރާގައި 16 ޓީމު ވާދަކުރާއިރު 17 އަހަރުން ދަށުގެ އުމުރުފުރާގައި 12 ޓީމު ވާދަކުރެއެވެ.
13 އާއި 15 އަހަރުން ދަށުގެ އުމުރުފުރާގައި މެޗުތައް ކުޅުމަށް ހަމަޖެހިފައި ވަނީ ހަތަރު ގްރޫޕްކަށް ބަހާލައިގެންނެވެ. ކޮންމެ ގްރޫޕަކުން އެއްމެ މޮޅު ޓީމުތައް ކުއާޓައަށް ދަތުރު ކުރާނެ އެވެ. އެއަށް ފަހު ސެމީއިން ފައިނަލަށް ދަތުރު ކުރާގޮތަށެވެ. 17 އަހަރުން ދަށުގެ އުމުރުފުރާގެ މެޗުތައް ކުރިޔަށްދާނީ ސެމީފައިނަލް ކުޅުމަށް ފަހު ފައިނަލަށް ދަތުރު ކުރާގޮތަށެވެ.
