ސްޕެއިނުން ޔޫރަޕްގެ ޗެމްޕިއަންކަން ހަތަރުވަނަ ފަހަރަށް ކާމިޔާބުކުރުމަށްފަހު ބޭއްވި އުފާ ފާޅުކުރުންތަކުގެ ތެރޭގައި ޖިބްރޯލްޓާއާ ގުޅޭގޮތުން، އެ ޓީމުގެ ކެޕްޓަން، އަލްވާރޯ މޮރާޓާ އާއި މިޑްފީލްޑަރު، ރޮޑްރީ ދެއްކި ވާހަކަތަކާ ގުޅިގެން އެ ދެ ކުޅުންތެރިން އެއްމެޗަށް ސަސްޕެންޑްކޮށްފައިވާ ކަމަށް ޔުއެފާ އިން ބުނެފިއެވެ.
މިދިޔަ ޖުލައި މަހުގެ 15 ވަނަ ދުވަހު ކުޅެވުނު ޔޫރޯ ފައިނަލްގައި އިންގްލެންޑް އަތުން 1-2 އިން ސްޕެއިން މޮޅުވި މެޗަށްފަހު، ޖެހިގެންއައި ދުވަހު ބޭއްވި ހަފްލާއެއްގައި އުފާ ފާޅުކުރުމުގެ ތެރެއިން، "ޖިބްރޯލްޓާ އަކީ ސްޕެއިނުގެ ބައެއް" މިފަދަ ގޮތަކަށް އިބްރާތްތަކެއް ބޭނުންކޮށްގެން މޮރާޓާ އާއި ރޮޑްރީ ވަނީ ލަވައެއް ކިޔައިފައެވެ.
ސްޕެއިނުގެ ދެކުނު ބިތުގައި އިންވާ ގޮތަށް އޮންނަ ޖިބްރޯލްޓާ އަކީ 18 ވަނަ ގަރުނުން ފެށިގެން އިނގިރޭސިންގެ ބާރުގެ ދަށުގައި އޮތް ތަނެކެވެ. އެކަމަކު ޒަމާނުއްސުރެ ސްޕެއިނުން ބުނަނީ އެއީ އެ ގައުމަށް ނިސްބަތްވާ ތަނެއް ކަމަށެވެ.
ޔުއެފާ އިން ބުނީ، އެ މައްސަލައިގައި ރޮޑްރީ އާއި މޮރާޓާ އަށް އަދަބުދޭން ނިންމާފައިވަނީ، ސުލޫކީ މިންގަނޑުގެ އެންމެ އަސާސީ ގަވާއިދުތަކާ ހިލާފުވުމުން ކަމަށެވެ. އަދި އެ މައްސަލައިގައި އެ ދެ ކުޅުންތެރިންގެ މައްޗަށް އުފުލާފައިވާ ދައުވާތަކުގެތެރޭގައި، ފުޓްބޯޅައަށާއި، ޔުއެފާގެ އަބުރަށް ހުތުރުވާ ފަދަ ގޮތަކަށް އަމަލުތައް ބެހެއްޓުން ހިމެނޭކަމަށެވެ.
މޮރާޓާ އާއި ރޮޑްރީ ސަސްޕެންޑްކޮށްފައިވުމުން ސްޕެއިނާއެކު ކުރިއަށް އޮތް ޔުއެފާގެ ބައިނަލްއަގުވާމީ މެޗުގައި އެ ދެ ކުޅުންތެރިންނަށް ވެސް ނުކުޅެވޭނެ އެވެ.