މެންޗެސްޓާ ސިޓީ އަށް ކުޅެމުން އަންނަ އާޖެންޓީނާގެ ފޯވާޑް، ހޫލިއަން އަލްވަރޭޒް ގަތުމަށް އެތުލެޓިކޯ މެޑްރިޑުން އެ ކްލަބާއެކު އެއްބަސްވުމަށް އައިސްފައިވާ ކަމަށް ފަހުގެ މީޑިއާ ހަބަރުތައް ބުނެފިއެވެ.
އެގޮތުން، އަލްވަރޭޒް، 24، ގެ ސޮއި ހޯދުމަށް އެތުލެޓިކޯ އިން ބޯނަހާއެކު 81.5 މިލިއަން ޕައުންޑްގެ ޓްރާންސްފާ ފީއެއް ދޭން ވަނީ އެއްބަސްވެފައެވެ.
މި ޑީލުގެ ތެރެއިން، އެތުލެޓިކޯ އިން އެންމެ ފުރަތަމަ 64.4 މިލިއަން ޕައުންޑު (75 މިލިއަން ޔޫރޯ) އާއި ބޯނަހުގެ ގޮތުގައި އިތުރު 17.1 މިލިއަން ޕައުންޑު (20 މިލިއަން ޔޫރޯ) ދޭނެއެވެ.
މިއީ މިހާތަނަށް ކުޅުންތެރިއަކު ވިއްކާލައިގެން ސިޓީ އަށް ލިބުނު އެންމެ ބޮޑު ޓްރާންސްފާ ފީ އެވެ. މީގެކުރީން، ސިޓީ އަށް ކުޅުންތެރިއަކު ވިއްކާލައިގެން ލިބުނު އެންމެ ބޮޑު ޓްރާންސްފާ ފީ އަކީ، 2022 ގައި ޗެލްސީ އިން ރަހީމް ސްޓާލިންގ އަށް ދެއްކި 50 މިލިއަން ޕައުންޑެވެ.
މީގެ ދުވސްކޮޅެއް ކުރީން އަލްވަރޭޒް ބުނީ، އޭނާގެ މުސްތަގުބަލާ ގުޅޭގޮތުން، ގޮތެއް ނިންމާނީ މިހާރު ކުރިއަށްދާ އޮލިމްޕިކްސް ގޭމްސް ނިމުމުން ކަމަށެވެ. އެގޮތުން، އެންމެ ފުރަތަމަ ކުޑަ ބްރޭކެއް ނަގާނީ ކަމަށާއި، ގޮތެއް ނިންމާނީ އޭގެފަހުން ކަމަށް ވެސް އަލްވަރޭޒް ބުނެފައިވެއެވެ. ގޭމްސްގައި ފްރާންސް އަތުން ބަލިވެ، އާޖެންޓީނާ ވަނީ ކަޓައިފައެވެ.
ދާދިފަހުން އަލްވަރޭޒްގެ މުސްތަގުބަލާ ގުޅޭގޮތުން، ސިޓީގެ ކޯޗު ޕެޕް ގާޑިއޯލާ ވަނީ އަލްވަރޭޒް ބަހައްޓަން ބޭނުންވާ ކަމަށް ބުނެފައެވެ. އަދި މި މަހުގެ ކުރީކޮޅު ސީޒަން ފެށުމަށް ހަމަޖެހިފައިވާއިރު އަލްވަރޭޒް އަށް ވަރަށް ބޮޑަށް ބަރޯސާވާނެ ކަމަށް ވެސް ގާޑިއޯލާ ވަނީ ބުނެފައެވެ.
ނަމަވެސް، ކުރިން އިލްކާއި ގުންޑޮގަން، ރިޔާދް މާރޭޒް އަދި އައިމެރިކް ލަޕޯޓް ފަދަ ކުޅުންތެރިންނާއެކު ވެސް ދިމާވި ފަދައިން، އެ ކުލަބު ދޫކޮށް ދާން ބޭނުންވާ ކުޅުންތެރިއަކަށް ސިޓީއިން ހުރަސް ނާޅާނެކަމަށް ގާޑިއޯލާ ބުންޏެވެ.
މީގެ ދެ އަހަރެއްހާ ދުވަސްކުރީން، އާޖެންޓީނާގެ ރިވާ ޕްލޭޓް އިން ސިޓީ އަށް ބަދަލުވެ، އަލްވަރޭޒް ވަނީ އެ ޓީމަށް މިހާތަނަށް 103 މެޗު ކުޅެދީ، 36 ލަނޑުޖަހައިފައެވެ. އަލްވަރޭޒް ވަނީ، ސިޓީ އާއެކު، ޕްރިމިއާ ލީގު ދެ ފަހަރު، ޗެމްޕިއަންސް ލީގާއި އެފްއޭ ކަޕާއި ކްލަބް ވޯލްޑް ކަޕްގެ އިތުރުން ޔުއެފާ ސުޕަ ކަޕް އެއްފަހަރު ކާމިޔާބުކޮށްފައެވެ.
ސިޓީ އާއެކު ހޭދަކުރީ ފުރަތަމަ ސީޒަނުގައި އަލްވާރޭޒް ވަނީ ޓްރެބަލް ހާސިލްކޮަށްފައެވެ. އަދި އެފަހަރުގެ ސީޒަނުގެ މެދުތެރެއިން ގަތަރުގައި ބޭއްވި 2022 ވަނަ އަހަރުގެ ފީފާ ވޯލްޑް ކަޕް އާޖެންޓީނާ އަށް ކާމިޔާބުކޮށްދިނުމުގައި މުހިއްމު ދައުރެއް އަދާކުރިއެވެ.