ލީގު ބުރުގެ ފަހު މެޗުގައި ނޭޕާލް އަތުންވެސް ރާއްޖެ ބަލިވެއްޖެ

ކާވާ ވިމެންސް ނޭޝަންސް ލީގުގައި ރާއްޖެ ކުޅުނު ފަހު މެޗުގައި މުބާރާތް ބާއްވާ ނޭޕާލް އަތުންވެސް ބަލިވެއްޖެ އެވެ

ނޭޕާލް މެޗާ ކުރިމަތިލިއިރު ވެސް ރާއްޖެ އޮތީ މުބާރާތުން ކަޓާފައެވެ. އަދި ނޭޕާލް ވަނީ ސެމީން ޖާގަ ހޯދާފައެވެ.

ނޭޕާލް އަތުން ރާއްޖެ ބަލިވެފައިވަނީ ސީދާ ތިން ސެޓުންނެވެ. މި ނަތީޖާއާއެކު ލީގުގެ ދެ ވަނައިގައި ނޭޕާލް އޮތީ ކުޅުނު 4 މެޗުން 3 މެޗުން މޮޅުވެ 1 މެޗުން ބަލިވެ 9 ޕޮއިންޓާއެކުއެވެ.

ސެމީފައިނަލުގައި ނޭޕާލް ނުކުންނާނީ ތިން ވަނައިގައި އޮތް އީރާނާ ދެކޮޅަށެވެ. ސެމީގެ އަނެއް މެޗުގައި އެއްވަނައިގައި އޮތް އިންޑިއާ ނުކުންނާނީ ހަތަރު ވަނައިގައި އޮތް ސްރީލަންކާއާ ދެކޮޅަށެވެ.

ލީގު ބުރުގެ ފަހު މެޗުގައި ނޭޕާލުން ރާއްޖެ ބަލިކުރީ ފުރަތަމަ ސެޓުގައި އެންމެ އަށް ޕޮއިންޓުންނެވެ. ނޭޕާލް ވަނީ ރާއްޖެ އަތުން 25-8 އިން މި ސެޓު ކާމިޔާބުކޮށްފައެވެ.

ދެވަނަ ސެޓުގައި ނޭޕާލުގެ ކޯޗު ޖަގްދީޝް ބަޓާ ވަނީ މުހިއްމު ބައެއް ކުޅުންތެރިން ބަދަލުކޮށްފައެވެ. އޭގެ ފަހުން ދެވަނަ ސެޓު ތަންކޮޅެއް ވާދަވެރިވެގެން ދިޔަ އެވެ.

ދެވަނަ ސެޓުގައި ދިވެހި ޓީމުގެ ފަރާތުން މޮޅު ކުޅުމެއް ފެނުނެވެ. އަދި ނޭޕާލުގެ މައްޗަށް ކުރިހޯދިތަން ފެނުނެވެ. ނަމަވެސް ނިރުތާ ތަގުނާ ކޯޓަށް ވަދެ، ނޭޕާލުން ސެޓު 25-19 އިން ކާމިޔާބުކޮށް 2-0 ގެ ލީޑެއް ނެގި އެވެ. ތިން ވަނަ ސެޓު ނޭޕާލުން ކާމިޔާބުކުރީ 25-18 އިންނެވެ.

އިއްޔެގެ މެޗުން އިންޑިއާ މޮޅުވީ ސްރީލަންކާ އަތުން 25-13، 25-21، 25-20 އިންނެވެ. ތިންވަނަ މޮޅާއެކު އިންޑިއާ އޮތީ 10 ޕޮއިންޓާއެކު އެއް ވަނައިގަ އެވެ. ދެވަނައިގައި އޮތް ނޭޕާލް އަށް ލިބިފައިވަނީ 9 ޕޮއިންޓް 7 ޕޮއިންޓެވެ.