ބެންފީކާ އަށް ކުޅެމުންއައި ޕޯޗުގަލްގެ ޒުވާން ޑިފެންސިވް މިޑްފީލްޑަރު، ޔާއޯ ނެވޭސް ޕީއެސްޖީ އަށް ބަދަލުވެއްޖެއެވެ.
ނެވޭސް، 19، ވަނީ ޕީއެސްޖީއާއެކު ފަސް އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ. މީޑިއާ ހަބަރުތައް ބުނާގޮތުން، ޕީއެސްޖީން ވަނީ ބެންފީކާ އަށް ގާތްގަނޑަކަށް 60 މިލިއަން ޔޫރޯ (66 މިލިއަން ޑޮލަރު) ދިނުމަށާއި، ބޯނަހުގެ ގޮތުގައި އިތުރު 10 މިލިއަން ޔޫރޯ ދޭން އެއްބަސްވެފައެވެ.
ނެވޭސްއާ ގުޅޭގޮތުން ޕީއެސްޖީގެ ރައީސް، ނާސިރު އަލް-ހެލައިފީ ނެރުނު ބަޔާނެއްގައިވަނީ، އޭނާ އަކީ ބައިނަލްއަގުވާމީ ފުޓްބޯޅައިގެ އިތުރުން ޕޯޗުގަލް އަށް ބެލިޔަސް އެންމެ ހުނަރުވެރި ކުޅުންތެރިންގެ ތެރެއިން އެއް ކުޅުންތެރިޔާ ކަމަށެވެ.
ހެލައިފީ އިތުރަށް ބުނީ، ޕީއެސްޖީ އަށް ބަދަލުވުމަށް އޮތް ޝައުގުވެރިކަމާއެކު އޭނާ ހުރީ އެ ކްލަބުގެ ޖާޒީގައި ރަނގަޅު ކުޅުމެއް ދެއްކުމަށް އަމާޒުހިފައިގެން ކަމަށެވެ. އަދި، އެއީ އެ ޓީމުގެ ހުރިހާ ކުޅުންތެރިންގެ ކިބައިން ވެސް އުންމީދުކުރާ ކަންތައް ކަމަށް ވެސް ހެލައިފީގެ ވާހަކައިގައި ފާހަގަކުރިއެވެ.
ބެންފީކާ އެކަޑެމީން ވިދާލި ނެވޭސް، ވަނީ އެ ކުލަބަށް ހުރިހާ މުބާރާތްތަކެއްގައި 75 މެޗު ކުޅެފައެވެ. އަދި ޕޯޗުގަލް ޤައުމީ ޓީމަށް 9 މެޗު ކުޅެދީފައެވެ. އޭނާ ވަނީ 2022-23 ވަނަ އަހަރުގެ ޕޯޗުގީޒް ލީގާއި، މިދިޔަ އަހަރުގެ ޕޯޗުގީޒް ސުޕަ ކަޕް ކާމިޔާބުކޮށްފައެވެ.