ޖަރުމަނުގެ އަހަރުގެ މޮޅު ކުޅުންތެރިޔާގެ މަގާމަށް ކްރޫސް، އެންމެ މޮޅު ކޯޗަކަށް ހޮވުނީ އަލޮންސޯ

ދާދިފަހުން ފުޓްބޯޅައިން ރިޓަޔާކުރި، ޖަރުމަނު އަދި ރެއާލް މެޑްރިޑްގެ ކުރީގެ މިޑްފީލްޑަރު، ޓޯނީ ކްރޫސް އަށް މިދިޔަ އަހަރުގެ ޖަރުމަނުގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމު ލިބިއްޖެއެވެ.

މިއީ ކްރޫސް އަށް މޮޅު ކުޅުންތެރިޔާގެ މަގާމު ލިބުނު ދެވަނަ ފަހަރެވެ. މީގެކުރީން، 2018 ވަނަ އަހަރުގެ މޮޅު ކުޅުންތެރިޔާގެ މަގާމަށް ހޮވުނީ ވެސް ކްރޫސް އެވެ.

މިދިޔަ އަހަރުގެ އެންމެ މޮޅު ކޯޗުގެ މަގާމަށް ހޮވުނީ، ނިމިދިޔަ ސީޒަނުގެ ޖަރުމަނުގެ ބުންޑެސްލީގާ ކާމިޔާބުކުރި ބަޔާ ލެވަކޫސަންގެ ޒާބީ އަލޮންސޯ އެވެ.

ކްރޫސް، 34، އަށް މޮޅު ކުޅުންތެރިޔާގެ މަގާމު ލިބުނީ، ޖަރުމަނުގެ ކުޅިވަރު ނޫސް މަޖައްލާއެއް ކަމަށްވާ، "ކިކާ" އިން ނެގި ވޯޓަކުން އެންމެ ކުރިހޯދައިގެންނެވެ.

ކްރޫސް އަށް އެއްވަނަ ލިބުނީ ވޯޓުލީ މީހުންގެ ތެރެއިން 285 ވޯޓު ހޯދައިގެންނެވެ. ދެވަނަ މަގާމަށް ދިޔައީ ފްލޮރިއަން ވާޓްޒް އެވެ. އޭނާ އަށް ލިބުނީ 246 ވޯޓެވެ. ތިންވަނަ މަގާމަށް ދިޔަ ސްވިޒަލޭންޑްގެ ކެޕްޓަން، ގްރޭނިޓް ޒާކާ އަށް ލިބުނީ 66 ވޯޓެވެ.

ފަހަކަށްއައިސް ފެނުނު އެންމެ މޮޅު މިޑްފީލްޑަރުންގެ ތެރޭގައި ހިމެނޭ، ކްރޫސްގެ ކުޅުމުގެ ކެރިއަރު ނިންމާލީ އެންމެ ފަހުގެ ޔޫރޯ ފުޓްބޯޅަ މުބާރާތުގެ ކުއާޓާ ފައިނަލްގައި ސްޕެއިން އަތުން ޖަރުމަނު ބަލިވި މެޗުންނެވެ. އޭނާ ވަނީ ނިމިދިޔަ ސީޒަނުގެ ޔުއެފާ ޗެމްޕިއަންސް ލީގާއި، ސްޕެނިޝް ލީގު ކާމިޔާބުކުރި ރެއާލްގައި އިސް ދައުރެއް އަދާކޮށްފައެވެ.

އެންމެ މޮޅު ކޯޗުގެ މަގާމަށް ހޮވުނު އަލޮންސޯ ވަނީ، މިދިޔަ 11 އަހަރުގެ ތެރޭގައި ބަޔާން މިއުނިކުން މެދުކެނޑުމެއްނެތި ޖަރުމަނު ލީގުގައި ކުރަމުންއައި ރަސްކަން ހުއްޓުމަކަށް ގެނެސް، ލެވަކޫސަނުން މެޗަކުން ބަލިނުވެ، ޗެމްޕިއަންކަން ހޯދައިދިނުމުގައި މުހިއްމު ރޯލެއް ކުޅެފައެވެ. އޭނާ ވަނީ ޖަރުމަން ކަޕް ވެސް ލެވަކޫސަން އާއެކު ކާމިޔާބުކޮށްފައެވެ.