ޗެލްސީ އަށް ކުޅެމުންއައި އިނގިރޭސި މިޑްފީލްޑަރު، ކޮނާ ގަލަގާ، އެތުލެޓިކޯ މެޑްރިޑަށް ބަދަލުވާން އެއްބަސްވެއްޖެއެވެ.
ގަލަގާ، 24، ގެނައުމަށް އެތުލެޓިކޯ އިން ކުރަމުންއައި މަސައްކަތުގެ ތެރެއިން މިދިޔަ ހަފްތާގައި ޗެލްސީން ވަނީ 33 މިލިއަން ޕައުންޑްގެ އޮފާއެއް ގަބޫލުކޮށްފައެވެ. އޭރު ހަމައެކަނި މަދުވެފައިވަނީ އެކަމުގައި ގަލަގާގެ ރުހުން އެކަންޏެވެ. ނަމަވެސް، އިއްޔެގެ ވަގުތެއްގައި ގަލަގާ، އެތުލެޓިކޯ އަށް ބަދަލުވާން ތައްޔާރަށްހުރި ކަމަށް އެ ކްލަބުގެ އޮފިޝަލުންނަށް ކަށަވަރުކޮށްދީފައިވުމުން އެ ޑީލު ނިންމާލީ ކަމަށް ވެސް ހަބަރުތައް ބުނެއެވެ.
އެތުލެޓިކޯ އިން ބުނީ، ގަލަގާ ވަރަށް އަވަހަށް ސްޕެއިނަށް ދަތުރުކޮށް މެޑިކަލް ޓެސްޓު ހެދުމަށްފަހު އެ ކްލަބާއެކު ކޮންޓްރެކްޓްގައި ސޮއިކުރުމަށް ހަމަޖެހިފައިވާ ކަމަށެވެ. މިއާއެކު، ސްޓެމްފޯޑް ބްރިޖްގައި މިދިޔަ 18 އަހަރެއްހާ ދުވަސް ހޭދަކޮށްފައިވާ ގަލަގާގެ ޗެލްސީ ކެރިއަރަށް ނިމުމެއް އަންނާނެ އެވެ.
މިދިޔަ ޔޫރޯގައި ވާދަކުރި އިނގިރޭސި ސްކޮޑުގައި ހިމެނި އެ ޓީމަށް އެ މުބާރާތުގައި ފަސް މެޗު ކުޅެދީފައިވާ ގަލަގާގެ ކޮންޓްރެކްޓް އާކުރުމުގެ މަސައްކަތް ޗެލްސީން ކޮށްފައިވީނަމަވެސް، އެ ކްލަބުން ހުށަހެޅި އިތުރު ދެ އަހަރުގެ އައު ކޮންޓްރެކްޓްގައި ސޮއިކުރަން އޭނާ އާއެކު އެއްބަސްވުމަކަށް އާދެވޭގޮތެއްނުވިއެވެ. ޗެލްސީ އާއެކު އޭނާ ހަދާފައިވާ ކޮންޓްރެކްޓް ހަމަވާން ބާކީ އެއް އަހަރު އެބައޮތެވެ.
މީގެއިތުރުން، ޗެލްސީގެ އައު ކޯޗު، އެންޒޯ މަރެސްކާގެ ޕޮޒެޝަން ބޭސްޑް ކުޅުމުގެ ސްޓައިލަށް ގަލަގާ ނުފެތޭނެކަމަށް ބެލެވުމާއި، މަރެސްކާގެ އިރުޝާދުގެ ދަށުން ގަވާއިދުން އެ ޓީމުގައި ކުޅުމުގެ ފުރުޞަތު ލިބޭނެކަމުގެ ޔަގީންކަން ނެތުމުން ދެ ފަރާތުން އެއްބަސްވެ، ގަލަގާ އަށް އެންމެ ރަނގަޅު ގޮތަކީ ޗެލްސީ ދޫކޮށްލުން ކަމަށް މީޑިއާ ރިޕޯޓްތައް ބުނެއެވެ.
އަދި، ޗެލްސީ އިން ވެސް އިނގިރޭސި ލީގުގެ ކްލަބަކަށް ގަލަގާ ވިއްކާލުމުގެ ބަދަލުގައި ބޭނުންވަނީ އެހެން ލީގެއްގެ ޓީމަކަށް ވިއްކާލުމަށް ކަމަށްވީހިނދު، އެތުލެޓިކޯ އަށް ކުޑަ އަގެއްގައި ވެސް ދޫކޮށްލުމަށް އެ ކްލަބުން އެއްބަސްވީ ކަމަށް ވެސް އެ ގައުމުގެ މީޑިއާ ހަބަރުތައް ބުނެއެވެ.