ކަތުމަންޑޫ (އޯގަސްޓު 4) - ކަތުމަންޑޫގައި މިހާރު ކުރިއަށްދާ ކަވާ ވިމެންސް ނޭޝަންސް ލީގު ވޮލީބޯޅަ ޗެމްޕިއަންޝިޕްގައި ރާއްޖެ ބަލިކޮށް ސްރީ ލަންކާ އިން ފުރަތަމަ މޮޅެއް ހޯދައިފިއެވެ.
ހަތަރުވަނަ މެޗުގައި އާދީއްތަ ދުވަހުގެރޭ ކުޅުނު ފުރަތަމަ މެޗުގައި ރާއްޖެ އަތުން ލަންކާ މޮޅުވެފައިވަނީ ސީދާ ތިން ސެޓުންނެވެ.
ޓްރިޕޫރޭޝްވަރުގައި ހުންނަ ނޭޝަނަލް ސްޕޯޓްސް ކައުންސިލް ހޯލްގައި ކުޅުނު މެޗުން ސްރީލަންކާ މޮޅުވި މެޗުގެ ސެޓުތައް ކާމިޔާބުކޮށްފައިވަނީ 25-22، 25-12، 25-12 އިންނެވެ.
މި ނަތީޖާއާއެކު ރާއްޖެއަށް ވަނީ މުބާރާތުގެ ސެމީއަށް ދިއުމުގެ ފުރުސަތު ވަނީ ބަންދުވެފައެވެ. ލީގު ބުރުގެ ފަހު މެޗުގައި ރާއްޖެ ކުޅޭނީ ނޭޕާލާއެވެ. ލީގުގައި ނޭޕާލް އަތުން މޮޅުވި ނަމަވެސް ސެމީ ފައިނަލަށް ރާއްޖެ ނުދާނެއެވެ.
ސްރީލަންކާއާއެކު އިންޑިއާ، ނޭޕާލް އަދި އީރާން ވަނީ ސެމީ ފައިނަލަށް ދަތުރުކޮށްފައެވެ. އެއްވަނައިގައި ހަތް ޕޮއިންޓާއެކު އިންޑިއާ އޮތްއިރު، ފަސް ޕޮއިންޓާއެކު އީރާނާއި ނޭޕާލް އަދި ހަތަރު ޕޮއިންޓާއެކު ސްރީ ލަންކާ އޮތީ ހަތަރު ޕޮއިންޓާއެކު އެވެ. ރާއްޖެ އޮތީ ޕޮއިންޓެއް ނުލިބިއެވެ. ސެމީ ފައިނަލުގައި ވާދަކުރާނީ ލީގުގެ އެއްވަނަ ޓީމާއި ހަތަރުވަނަ ޓީމު އަދި ދެވަނަ އަދި ތިންވަނަ ޓީމެވެ.