ރެއާލް މެޑްރިޑްގެ ކޯޗު، ކާލޯ އަންޗެލޮޓީ ވަނީ، މިހާރު އެ ކްލަބާއެކު ހަދާފައިވާ އެއްބަސްވުން ހަމަވުމުން ދެން އިތުރު ޓީމާކާ ހަވާލުނުވާނެ ކަމަށާއި، އަދި ގައުމީ ފުޓްބޯޅަ ޓީމަކަށް އިރުޝާދު ދިނުމުގެ ޝައުގުވެރިކަން ނެތް ކަމަށް ބުނެފައެވެ.
އަންޗެލޮޓީ، 65، އާއެކު ރެއާލުން ހަދާފައިވާ އެއްބަސްވުން ހަމަވާން ބާކީ ދެ އަހަރު އެބައޮތެވެ.
ފާއިތުވި ސީޒަނުގައި، ބްރެޒިލްގެ ގައުމީ ފުޓްބޯޅަ ޓީމުން އަންޗެލޮޓީ ގެންދިއުމަށް މަސައްކަތްކުރިއެވެ. ނަމަވެސް، ކްލަބެއް ދޫކޮށް ގައުމީ ޓީމަކަށް ބަދަލުވުމުގެ ވިސްނުމާމެދު ޝައުގުވެރި ނުވާ ކަމަށް އަންޗެލޮޓީ ވަނީ ބުނެފައެވެ.
ޗެލްސީގެ ކުރީގެ މިޑްފީލްޑަރު، ޖޯން އޮބީ މިކޭލްގެ ޕޮޑްކާސްޓްގައި ވާހަކަ ދައްކަމުން އަންޗެލޮޓީ ވަނީ، ރެއާލްގެ އެއްބަސްވުމަކީ އޭނާގެ އެންމެ ފަހު ކޮންޓްރެކްޓް ކަމަށް ބުނެފައެވެ. އެކަމަކު، ގައުމީ ޓީމަކަށް އިރުޝާދުދިނުމުގެ ހުށަހެޅުމެއް ލިބިއްޖެނަމަ ނިންމާނެ ގޮތެއް މިވަގުތު ބުނަން ނޭނގޭކަމަށް ވެސް އަންޗެލޮޓީ ބުންޏެވެ.
"އަހަރެންނަށް ވިސްނޭ ގޮތުގައި ރިއަލް މެޑްރިޑް އަކީ އަހަރެންގެ އެންމެ ފަހުގެ ކްލަބް"
"ގައުމީ ޓީމަކަށް ފުރުސަތެއް ލިބިއްޖެނަމަ، އަހަރެންނަކަށް ނޭނގެ. އަންޗެލޮޓީ ބުންޏެވެ.
އަންޗެލޮޓީ އިތުރަށް ބުނީ، ގައުމީ ޓީމަކަށް ކޯޗުކޮށްދިނުމަށް މާބޮޑު ޝައުގުވެރިކަމެއް ނެތް ކަމަށާއި، އެކަމުގެ ސަބަބުން ދުވަހުން ދުވަހަށް އޭނާ ކުރާ، އެންމެ ލޯބިވާ މަސައްކަތް ގެއްލިގެންދާނެތީވެ ކަމަށެވެ. އަދި މިހާރު ކުރާ މަސައްކަތާ މެދު ވަރަށް އުފާވާ ކަމަށް ވެސް އަންޗެލޮޓީ ވަނީ ބުނެފައެވެ.
"މިއީ އަހަރެންގެ ކޯޗުކަމުގެ 29 ވަނަ ސީޒަން. ތެދެއް، އަހަރެން ވަރަށް ގިނަ ކާމިޔާބީ ހާސިލްކޮށްފައިވާނެ. އެކަމަކު އަހަރެންނަށް ގެއްލުނު ތަށިތަކުގެ އަދަދު ވިސްނާލާ." އަންޗެލޮޓީ ބުންޏެވެ.
އަންޗެލޮޓީ އަކީ ޔޫރަޕްގެ އެންމެ ވަރުގަދަ ފަސް ލީގުގެ ގައުމުތަކުގެ ޑޮމެސްޓިކް މުބާރާތްތައް ކާމިޔާބުކުރި ފުރަތަމަ ކޯޗެވެ. އަދި އޭނާއަކީ ޗެމްޕިއަންސް ލީގުގެ ތާރީޚުގައި އެންމެ ކާމިޔާބު ކޯޗެވެ. އެގޮތުން، ރެއާލް އާއެކު ދެ ފަހަރެއްގެ މަތީން، 2014، 2022 އަދި 2024 ގައި އެ މުބާރާތް ކާމިޔާބުކުރިއިރު އޭސީ މިލާނާއެކު 2003 އަދި 2007 ގައި ޗެމްޕިއަންކަން ހޯދާފައިވެއެވެ.