ކުޅިވަރު

އޭސީ މިލާންގެ ވިމެންސް ޓީމުގެ މާބަނޑު ކުޅުންތެރިންގެ އެއްބަސްވުން އައުކޮށްދޭނެކަމުގެ ޔަޤީންކަން ދީފި


އިޓަލީގެ އޭސީ މިލާންގެ ވިމެންސް ޓީމުގައި ހިމެނޭ ކުޅުންތެރިންގެ ތެރެއިން އެ ކްލަބާއެކު ހަދާފައިވާ ކޮންޓްރެކްޓް ހަމަވާން ކައިރިވެފައިވަނިކޮށް މާބަނޑުވާ ކުޅުންތެރިންގެ އެއްބަސްވުން އޮޓޮމެޓިކުން އައުކޮށްދޭނެކަމުގެ ޔަޤީންކަން ދީފިއެވެ.

މިކަމަކީ "ޔޫރަޕުގެ ފުޓުބޯޅައިގެ އެންމެ މަތީ ފަންތީގެ ކުލަބުތަކުގެ ތެރެއިން ފުރަތަމަ ފަހަރު" ކަމަށް ބުނެ، މިލާނުން ބުނެފައިވަނީ އެއްބަސްވުން އަމިއްލައަށް އައުކޮށްދެވޭނީ އެއް އަހަރު ދުވަހަށް ކަމަށާއި، އޭގައި ހިމެނޭ މާއްދާތައް ހުންނާނީ ކުރީގެ އެއްބަސްވުމާ އެއްގޮތަށް ކަމަށެވެ.

މިލާންގެ އަންހެނުންގެ ފުޓުބޯޅަ ޓީމުގެ ވެރިޔާ، އެލިސަބެތު ސްޕީނާ ވިދާޅުވީ، "އަޅުގަނޑުމެން މިހާރު މިތިބީ އައު ސީޒަނެއް ފެށުމުގެ ކައިރީގައި. އެ ސީޒަނުގައި އަޅުގަނޑުމެން މަސައްކަތް ކުރާނީ ދަނޑުމަތީގައި އާއި ދަނޑު ބޭރުގައި މުހިންމު ލަނޑުދަނޑިތަކެއް ހާސިލުކުރުމަށް"

"އަޅުގަނޑުމެންގެ އައު ޕޮލިސީ ތަޢާރަފުކުރުމާއެކު އާ ސީޒަނާ ކުރިމަތިލުމަށް ވަރަށް ޝައުޤުވެރިވެ، ކެތްމަދުވެފައި މިތިބީ." ސްޕީނާ ވިދާޅުވިއެވެ.

މިލާނުން ބުނީ، މި އައު ޕޮލިސީގެ ދަށުން އެކްލަބުގެ ކުޅުންތެރިންގެ އިތުރުން ހުރިހާ އަންހެން މުވައްޒަފުންގެ ކޮންޓްރެކްޓް ވެސް އޮޓޮމެޓިކުން އާކުރެވިގެންދާނެ ކަމަށެވެ.