އެފްއޭއެމް ނޯމަލައިޒިން ކޮމިޓީއަކާ ހަވާލުކުރުމަކީ ހެޔޮ ބަދަލަކަށް ލިބިގެންދާ އަލިކަމެއް: ވަޒީރު
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ހިންގުން ނޯމަލައިޒިން ކޮމިޓީއަކާ ހަވާލުކުރަން ނިންމި ނިންމުމަކީ ހެޔޮ ބަދަލަކަށް ލިބިގެންދާ އަލިކަމެއްގެ ގޮތުގައި ދެކޭ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.
ޕީއެސްއެމް ސްޕޯޓްސްއަށް ދެއްވި އިންޓަވިއެއްގައި ވަޒީރު ވިދާޅުވީ ފުޓްބޯޅައަށް ދިމާވެފައިވާ މައްސަލައަކީ ވަރަށް ގިނަ ދުވަސް ވެގެންދިޔަ އިރު ވެސް ހައްލުވެގެން ނުގޮސް އޮތް މައްސަލައެއް ކަމަށާއި އެހެން ކަމުން މިކަމުގައި ހައްލުތަކެއް ބޭނުންވާ ކަމަށެވެ.
އެފްއޭއެމްގެ ހިންގުން ނޯމަލައިޒިން ކޮމިޓީއަކާ ހަވާލުކުރުމުން ދިގުދެމިގެން ގޮސްފައިވާ މި މައްސަލަ ހައްލުކުރުމުގެ ދޮރު ހުޅުވިގެން ގޮސްފައިވާ ކަމަށާއި ފުޓްބޯޅައިގެ ދިގު ރާސްތާއަށް ބަލާއިރު މިކަމުގެ ފައިދާ ކުރާނެ ކަމަށް ވަޒީރު ވިދާޅުވިއެވެ.
ފީފާއިން އެކުލަވާލާ ކޮމިޓީ އާއި އެކު ވީހާ ވެސް އަވަހަކަށް އިންތިހާބުގެ ކަންކަން ކުރިޔަށްދާތަން ފެންނަން ބޭނުންވާ ކަމަށާއި އެކު ފުޓްބޯޅައިގެ ޕްރޮގްރާމުތަކާއި އެކު ކުރިޔަށްދާން ފަސޭހަ ވެގެންދާނެ ކަމަށް ވެސް ވަޒީރު ވިދާޅުވިއެވެ.
ފީފާ އިން މިދިޔަ ހަފްތާގައި ނެރުނު ބަޔާނުގައި ބުނެފައިވަނީ އެފްއޭއެމް، ނޯމަލައިޒިން ކޮމިޓީއެއްގެ ދަށުން ކުރިއަށްގެންދަން ނިންމާފައިވަނީ، އެ އެސޯސިއޭޝަންގެ ގަވަނަންސްގެ މައްސަލަތަކާއި މާލީ ގޮތުން އިންތިހާ އަށް ދަށަށް ގޮސްފައިވާތީ، އެކަންކަން ހައްލުކޮށް ރަނގަޅުކުރުމުގެ ބޭނުމުގައި ކަމަށެވެ.
އަންނަ އަހަރުގެ ޖުލައި 31 އަށް ނޯމަލައިޒިން ކޮމިޓީ އަށް މުއްދަތު ދީފައިވީ ނަމަވެސް، އެ ކޮމިޓީއާ ހަވާލުކުރެވޭ މެންޑޭޓްގެ ތެރެއިން ކަންތައްތައް ފުރިހަމަވިހާ އަވަހަކަށް ކޮމިޓީގެ ދައުރު ހަމަވާނެ ކަމަށް ބުނެފައި ވީ ނަމަވެސް އެކަން ކުރަން އެންމެ ފަހުގެ މުހުލަތަކީ، އަންނަ އަހަރުގެ ޖުލައި 31 ކަމަށް ފީފާއިން ވަނީ ކަނޑައަޅާފައެވެ.
ނޯމަލައިޒިން ކޮމިޓީގެ މެމްބަރުން ނިންމާނީ ފީފާއާއި މިކަމާ ގުޅުންހުރި އެކި ފެޑެރޭޝަންތަކުން އެކަށީގެންވާ ރަނގަޅު ރިވިއުއެއް ކުރުމަށްފަހު ކަމަށް ފީފާއިން ބުނެފައިވާއިރު، އެކަމުގެ މަޝްވަރާތައް މިހާރު ވަނީ ފަށާފައެވެ.
ރާއްޖޭގެ ފުޓްބޯޅަ އެސޯސިއޭޝަން މީގެކުރިންވެސް ވަނީ ނޯމަލައިޒްކޮށްފަ އެވެ. އެފަހަރު އެފްއޭއެމް ނޯމަލައިޒް ކުރަން ނިންމީ، އެފްއޭއެމް ކޮންގްރެސްގައި ހިނގައިދިޔަ ކަންތައްތަކާ ހެދި އާއި ހިންގާ ކޮމިޓީގެ ގިނަ މެމްބަރުންތަކެއް އިސްތިއުފާ ދިނުމުންނެވެ.
އެފަހަރު، ފީފާއިން ވަނީ ފަސް މެމްބަރުންގެ ނޯމަލައިިޒިން ކޮމިޓީއަކާ އެފްއޭއެމް ހިންގުން ހަވާލުކޮށްފައެވެ. އެއީ، ޗެއާމަނެއްގެ ގޮތުގައި، މުހައްމަދު ޝަވީދު، ޑެޕިއުޓީ ޗެއާމަނަކަށް އަބްދުލްހަމީދު އަބްދުލްގަފޫރު (އައްޑޯ)، މެމްބަރުންގެ ގޮތުގައި، މުހައްމަދު ނިޒާމް، އަލީ އުމަރު އަދި ފަސީހު ޒާހިރުއެވެ.
މި ފަހަރު، އެފްއޭއެމް ހަވާލުކުރާނެ ކަމަށް ވެސް ބެލެވެނީ ފަސް މެމްބަރުންގެ ނޯމަލައިޒިން ކޮމިޓީއަކާ އެވެ.