މިލާން އަތުން ބަލިވި މެޗުގައި ރެއާލްގެ އެންޑްރިކް ދެއްކި ކުޅުމަށް އަންޗެލޮޓީ ތައުރީފުކޮށްފި
ދާދިފަހުން ރެއާލް މެޑްރިޑާ ގުޅުނު ބްރެޒިލްގެ އުމުރުން 18 އަހަރުގެ ފޯވާޑް، އެންޑްރިކްގެ ފަރާތުން އޭސީ މިލާނާ ދެކޮޅަށް ކުޅުނު އެކުވެރިކަމުގެ މެޗުގައި ދެއްކި ކުޅުމަށް އެ ޓީމުގެ ކޯޗު، ކާލޯ އަންޗެލޮޓީ ތައުރީފުކޮށްފިއެވެ.
މިލާނާ ދެކޮޅަށް ކުޅުނު މެޗަށްފަހު ދެއްކި ވާހަކައިގައި އަންޗެލޮޓީ ބުނީ، އެންޑްރިކްގެ ފުރަތަމަ ފެނިލުމުގައި އޭނާގެ ކިބައިގައި "ވަރަށް ހާއްސަ އެއްޗެއް" ވާކަން ދައްކުވައިދީފައިވާ ކަމަށެވެ. އެ މެޗުގެ ފުރަތަމަ ހާފަށް ފަހު ގެނައި ބަދަލުތަކުގެ ތެރޭގައި ކޯޗު، އަންޗެލޮޓީ ވަނީ، އެންޑްރިކް ބަދަލުކޮށްފައެވެ.
މިފަހަރުގެ ސީޒަނަށް ރެއާލާ ގުޅުނު އެންޑްރިކް ގަތުމަށް އެ ކްލަބުން ވަނީ 2022 ވަނަ އަހަރުގައި ބްރެޒިލްގެ ސައޮ ޕައުލޯ އަށް ނިސްބަތްވާ، ޕަލްމެއިރާސް އާއެކު އެއްބަސްވުމަކަށް އައިސްފައެވެ. އެންޑްރިކް، ރެއާލަށް ބަދަލުވީ، ބޯނަހާއެކު ގާތްގަނޑަކަށް 60 މިލިއަން ޔޫރޯގެ ޓްރާންސްފާ ފީއަކަށެވެ.
"އޭނާ ވަރަށް ހަލުވި، ހަނި އަދި ކުދިޖާގަތަކުގައި ވެސް ވަރަށް ނުރައްކާކޮށް ފެނުނީ." އަންޗެލޮޓީ ބުންޏެވެ.
އަންޗެލޮޓީ ބުނީ، އެންޑްރިކްގެ ހަލުވި ސްޕީޑާއެކު ކިތަންމެ ހަނި ނުވަތަ ކުޑަޖާގައެއް ލިބުނަސް އޭނާ ފެނުނީ ވަރަށް ރަނގަޅަށް އެ ހާލަތްތަކުގެ ބޭނުންހިފައި، އޭނާގެ ހުރި ގާބިލްކަން ދެއްކި ކަމަށެވެ. މި ހުރިހާ ކޮލިޓީ އާއެކު އޭނާގެ ހުނަރުވެރިކަން ފެނިގެންދާ ކަމަށް ވެސް އަންޗެލޮޓީ ބުންޏެވެ. އަދި މިފަދަ ހުރިހާ ސިފަތަކެއް ލިބިފައިވާ ކުޅުންތެރިއަކު ފެނުމަކީ ވަރަށް މަދުން ނޫނީ ނުވާކަމެއް ކަމަށް ވެސް އަންޗެލޮޓީ ވަނީ ބުނެފައެވެ.
މިލާނާ ދެކޮޅަށް ކުޅުނު އެ މެޗުން ރެއާލް ބަލިވީ 1-0 އިންނެވެ. ދެވަނަ ހާފުގެ ކުރީކޮޅު، މިލާންގެ ހަމައެކަނި ލަނޑުޖަހައިދިނީ ނައިޖީރިއާގެ ވިންގް، ސެމުއެލް ޗުކްވުއެޒޭ އެވެ. މިއީ މިލާންގެ އައު ކޯޗު، ޕައުލޯ ފޮންސޭކާގެ އިރުޝާދުގެ ދަށުން، އެ ޓީމު ކުޅުނު ދެވަނަ މެޗެވެ. މި ދެ މެޗުން ވެސް އެ ޓީމު ވަނީ މޮޅުވެފައެވެ.
މިހާރު އެމެރިކާގައި ރެއާލުން ކުރިއަށްގެންދާ ޕްރީ-ސީޒަން ޓުއާގައި ފްރާންސްގެ ކީލިއަން އެމްބާޕޭ އާއި އިންގްލެންޑްގެ ޖޫޑް ބެލިންހަމްގެ އިތުރުން ބްރެޒިލްގެ ވިނީޝަސް ޖޫނިއާ އާއި ރޮޑްރީގޯ ފަދަ ގިނަ ތަރިންތަކެއް ބައިވެރިއެއްނުވެއެވެ. ރެއާލަށް ދެން އެންމެ އަވަހަށް އޮތީ އެމެރިކާގެ ނިއު ޖާޒީގައި ވާދަވެރި ބާސެލޯނާއާ ދެކޮޅަށް ކުޅޭ މެޗެވެ.