ޖުމްލަ ފަސް ގައުމަކާއެކު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވޮލީބޯލް ނޭޝަންސް ލީގު މިއަދު ފަށައިފިއެވެ.
މުބާރާތް ފެށުމުގެ ގޮތުން ހާއްސަ ރަސްމިއްޔާތެއް ވަނީ ބާއްވާފައެވެ. މި ރަސްމިއްޔާތު ޝަރަފްވެރިކޮށްދެއްވީ ނޭޕާލުގެ ޔޫތު އެންޑް ސްޕޯޓްސް މިނިސްޓަރ ތޭޖޫ ލާލް ޗައުދަރީއެވެ. މީގެ އިތުރުން ނޭޕާލްގެ ކުޅިވަރު އެކި އިދާރާތަކުގެ ވެރިންނާއި ކާވާގެ ބައެއް އިސްވެރިން ބައިވެރިވެވަޑައިގެންނެވި އެވެ.
ހުޅުވުމުގެ ރަސްމިއްޔާތު ފެށުމުގެ ކުރިން ކޮންމެ ގަައުމަކުން މި މުބާރާތުގައި ވާދަކުރާ ކުޅުންތެރިން ދައްކާލިއެވެ. އަދި ކުޅުންތެރިންނާއި އޮފިޝަލުންނަށް މުބާރާތުގެ ހުވާލައިދިނެވެ. އަދި ނޭޕާލުގެ ސަގާފީ އައިޓަމްތަކެއް ވެސް ވަނީ ހުށައަޅައިދީފައެވެ.
މުބާރާތުގެ ފުރަތަމަ މެޗުގައި ބައްދަލުކުރާނީ ނޭޕާލާއި ސްރީ ލަންކާއެވެ. އަދި މިއަދު ކުޅޭ ދެވަނަ މެޗުގައި ބައްދަލުކުރާނީ އިންޑިއާ އާއި އީރާނެވެ. ރާއްޖެ ކުޅޭ ފުރަތަމަ މެޗުގައި މާދަމާ ހަވީރު ބައްދަލުކުރާނީ އިންޑިއާ އާއެވެ. މި މެޗު ފަށާނީ ރާއްޖެގަޑިން މާދަމާ ހަވީރު 16:15 ގައެވެ.
ސީނިއާ އަންހެން ވޮލީ ސްކޮޑުގައި ހިމެނޭ ތިން ކުޅުންތެރިން ކަމަށްވާ ހައްވާ މާޖިދާ، ހައްވާ ރާޝިދާ، އާމިނަތު އަރީޝާ މިވަގުތު ތިބީ ބޫޓާނުގައި ކުރިއަށްދާ ކާވާ ބީޗުވޮލީ މުބާރާތުގައެވެ. ސީނިއާ އަންހެން ޓީމުގެ ހެޑުކޯޗު ސޮފްވާން މުޙައްމަދު ވަނީ އެ ކުޅުންތެރިން ނެތި ފެށިކަމުގައިވީ ނަމަވެސް ޖުމްލަކޮށް ސްކޮޑުގައި ތިބި ކުޅުންތެރިންނާ މެދު ހިތްހަމަޖެހޭ ކަމަށް ބުނެފައެވެ. އަދި ކުޅުންތެރިންގެ ފިޓްނަސް ލެވެލްއާމެދު ހިތްހަމަޖެހޭ ކަމަށް ބުނެފައެވެ.
ޖުމްލަ ފަސް ގައުމަކާއެކު މި މުބާރާތް ކުރިއަށްދާނީ 1-7 އޯގަސްޓަށެވެ. ރާއްޖޭގެ އިތުރުން މި މުބާރާތުގައި ވާދަކުރާ ޓީމުތަކަކީ އީރާން، އިންޑިއާ، ސްރީ ލަންކާ އަދި ނޭޕާލެވެ.
އިންޑިއާ އާއި ދެކޮޅަށް ކުޅޭ މެޗަށްފަހު ޖެހިގެން އަންނަ ދުވަހުގެ ހަވީރު ރާއްޖެ ކުޅޭ ދެވަނަ މެޗުގައި އީރާނާ ވާދަކުރާއިރު، ތިންވަނަ މެޗުގައި އޮގަސްޓު ހަތަރެއްގައި ބައްދަލުކުރާނީ ސްރީ ލަންކާއާއެވެ. އަދި ޓީމުތައް ކުޅޭ ފަހު ބުރުގެ މެޗުގައި ރާއްޖެ ބައްދަލުކުރާނީ ނޭޕާލާއެވެ.