މިހާރު ކުރިއަށްދާ އޮލިމްޕިކްސްގެ އަންހެނުންގެ ފުޓްބޯޅައިގައި ސްޕެއިން އަތުން 2-0 އިން ބްރެޒިލް ބަލިވި މެޗުގައި އެ ޓީމުގެ ލެޖެންޑް، މާރްތާ އަށް ރަތް ކާޑު ދައްކާ ދަނޑުން ފޮނުވާލައިފިއެވެ.
މި މެޗުން ބަލިވިނަމަވެސް، ބްރެޒިލް ވަނީ އެންމެ ރަނގަޅު ނަތީޖާ ހޯދީ ތިންވަނަ ޓީމުތަކުގެ ތެރޭގައި ހިމެނި، ކުއާޓާ ފައިނަލުން ޖާގަ ހޯދައިފައެވެ. ގްރޫޕުގެ ތިންވަނަ ހޯދައިގެން ކުއާޓާ އަށް ދަތުރުކުރީ އަނެއް ޓީމަކީ ކޮލަމްބިއާ އެވެ.
ފްރާންސްގެ ކްލަބު ބޯޑޯގެ ދަނޑުގައި ކުޅުނު މި މެޗުގައި އެންމެ ފަހުގެ ފީފާ ވިމެންސް ވޯލްޑް ކަޕްގެ ޗެމްޕިއަން، ސްޕެއިނުން ކާމިޔާބުކުރި ދެ ލަނޑުވެސް ޖެހީ ފަހު ހާފުގައެވެ. މި މެޗުގެ ފުރަތަމަ ހާފުގައި ބްރެޒިލަށް މިހާތަނަށް އެންމެ ގިނަ ލަނޑުޖަހައިދީފައިވާ، މާރްތާ އަށް ސީދާ ރަތެއް ދެއްކީ ސްޕެއިނުގެ އޯލްގާ ކާމޯނާގެ ބޮލުގައި ޖެހޭގޮތަށް ކުރި ނުރައްކާތެރި ޓެކުލަކާ ގުޅިގެންނެވެ. މި ރަތް ކާޑާއެކު މާރްތާ ދަނޑުން ފައިބައިގެންދިޔައީ ރޮމުންނެވެ. އޭރު ދެ ޓީމު އޮތީ 0-0 އިން އެއްވަރުވެފައެވެ.
ސްޕެއިނުން މި މެޗުގައި ޖެހި ފުރަތަމަ ލަނޑު، 68 ވަނަ މިނެޓުގައި ކާމިޔާބުކޮށްދިނީ އެތީނިއާ ޑެލް ކަސްޓީލޯ އެވެ. އޭގެފަހުން، މެޗުގެ އިތުރުވަގުތުގެ ތެރޭގައި އެ ޓީމުގެ ދެވަނަ ލަނޑުޖަހައިދިނީ އަލެކްސިއާ ޕުޓެޔާސް އެވެ.
މި މެޗުގައި ދެއްކި ރަތް ކާޑާއެކު ބްރެޒިލަށް ކުއާޓާގައި ކުޅުމަށް ހަމަޖެހިފައިވާ މެޗުގައި މާރްތާ އަށް ނުކުޅެވޭނެ އެވެ. މިހާރު އުމުރުން 38 އަހަރުގެ މާރްތާ ވަނީ މީގެކުރީން ދެ ފަހަރެއްގެ މަތީން އޮލިމްޕިކްސްގެ އަންހެނުންގެ ފުޓްބޯޅައިގައި ރިހި މެޑެލް ހާސިލްކޮށްފައެވެ. އޭނާ އަކީ ވޯލްޑް ކަޕްތަކުގައި އަންހެން އަދި ފިރިހެން ކުޅުންތެރިން ހިމެނޭ ގޮތަށް މިހާތަނަށް އެންމެ ގިނަ ލަނޑުޖަހައިފައިވާ ކުޅުންތެރިޔާ އެވެ. އެގޮތުން، މާރްތާ ވަނީ މިހާތަނަށް ހަ ވޯލްޑް ކަޕެއްގައި ކުޅެ، 23 މެޗުގައި 17 ލަނޑުޖަހައިފައެވެ.
މި ފަހަރުގެ ގޭމްސްގެ އަންހެނުންގެ ފުޓްބޯޅައިގައި ކުއާޓާގައި ވާދަކުރާ ޓީމުތައް ކަށަވަރުވެފައިވާއިރު، ފުރަތަމަ މެޗުގައި އެންމެ ފަހުގެ ހަތަރު ގޭމްސްގެ ޗެމްޕިއަން، އެމެރިކާ ނިކުންނާނީ ޖަޕާނާ ދެކޮޅަށެވެ. ދެވަނަ މެޗުގައި ސްޕެއިނުން ކޮލަމްބިއާ އާ ވާދަކުރާއިރު، ކެނެޑާ ނިކުންނާނީ ޖަރުމަނާ ދެކޮޅަށެވެ. އަދި ފަހު މެޗުގައި ބްރެޒިލް ބައްދަލުކުރާނީ ފްރާންސާ އެވެ.