ރާއްޖޭގެ ސީނިއާ ކުޅުންތެރިން ފުރަތަމަ ލައިންއަޕްގައި މޮޅަށް ކުޅޭނެކަމުގެ ވަރަށް ބޮޑު އުއްމީދެއް އެބައޮތް ކަމަށާއި ހުރިހާ ކުޅުންތެރިންވެސް މެޗަށް ފިޓުކަމަށް ހެޑު ކޯޗު ސޮފްވާން މުޙައްމަދު ބުނެފިއެވެ.
ކޯޗު ސޮފްވާން މިހެން ބުނެފައިވަނީ މާދަމާ ފަށާ ކާވާ ވިމެންސް ނޭޝަންސް ލީގުގެ ކުރިން ޕީއެސްއެމް ސްޕޯޓްސްއާ ވާހަކަދައްކަމުންނެވެ.
ރާއްޖޭގެ ސީނިއާ އަންހެން ވޮލީބޯޅަ ޓީމު ނޭޕާލަށް ގޮސްފައިވަނީ ޓީމުގެ ސީނިއާ ތިން ކުޅުންތެރިން ނުލައެވެ. އެއީ ހައްވާ މާޖިދާ، ހައްވާ ރާޝިދާ، އާމިނަތު އަރީޝާ އެވެ. އެ ތިން ކުޅުންތެރިން ނެތި ޓީމު ނޭޕާލަށް ގޮސްފައިވަނީ އަންގާރަދުވަހުގައެވެ.
ދިގު ދަތުރަކަށްފަހު ނޭޕާލަށް ދިއުމުން އެ ގައުމުން ވަނީ ދިވެހި ޓީމަށް ހޫނު މަރުހަބާއެއް ކިޔާފައެވެ. ނޭޕާލުގައި މާ ގިނައިރުތަކެއް ނުވަނީސް ޓީމުން ވަނީ ފުރަތަމަ ފަރިތަކުރުންތައް ބާއްވާފައެވެ. ނޭޕާލުގެ ދަސަރަތު ސްޓޭޑިއަމުގެ ވޮލީ ކޯޓުގައި ބޭއްވި ފުރަތަމަ ފަރިތަކުރުންތަކަށްފަހު ކޯޗު ސޮފްވާން ވަނީ ޓީމު އޮތް ހާލަތާއި މެދު ހިތްހަމަޖެހޭ ކަމަށް ބުނެފައެވެ.
ސީނިއާ އަންހެން ވޮލީ ސްކޮޑުގައި ހިމެނޭ ތިން ކުޅުންތެރިން މިވަގުތު ތިބީ ބޫޓާނުގައި ކުރިއަށްދާ ކާވާ ބީޗުވޮލީ މުބާރާތުގައެވެ. ސީނިއާ އަންހެން ޓީމުގެ ހެޑުކޯޗު ވަނީ އެ ކުޅުންތެރިން ނެތި ފެށިކަމުގައިވީ ނަމަވެސް ޖުމްލަކޮށް ސްކޮޑުގައި ތިބި ކުޅުންތެރިންނާ މެދު ހިތްހަމަޖެހޭ ކަމަށް ބުނެފައެވެ. އަދި ކުޅުންތެރިންގެ ފިޓްނަސް ލެވެލްއާމެދު ހިތްހަމަޖެހޭ ކަމަށް ބުނެފައެވެ.
ޖުމްލަ ފަސް ގައުމަކާއެކު މި މުބާރާތް ކުރިއަށްދާނީ 1-7 އޯގަސްޓަށެވެ. ރާއްޖޭގެ އިތުރުން މި މުބާރާތުގައި ވާދަކުރާ ޓީމުތަކަކީ އީރާން، އިންޑިއާ، ސްރީ ލަންކާ އަދި ނޭޕާލެވެ.
މުބާރާތުގައި ރާއްޖެ ކުޅޭ ފުރަތަމަ މެޗުގައި އޮގަސްޓު ދެވަނަ ދުވަހުގެ ހަވީރު ކުޅޭ ދެވަނަ މެޗުގައި ބައްދަލުކުރާނީ އިންޑިއާ އާއެވެ. ޖެހިގެން އަންނަ ދުވަހުގެ ހަވީރު ރާއްޖެ ކުޅޭ ދެވަނަ މެޗުގައި އީރާނާ ވާދަކުރާއިރު، ތިންވަނަ މެޗުގައި އޮގަސްޓު ހަތަރެއްގައި ބައްދަލުކުރާނީ ސްރީ ލަންކާއާއެވެ. އަދި ޓީމުތައް ކުޅޭ ފަހު ބުރުގެ މެޗުގައި ރާއްޖެ ބައްދަލުކުރާނީ ނޭޕާލާއެވެ.
ކޮންމެ ޓީމެއް ކޮންމެ ޓީމަކާ ވާދަކޮށް އެންމެ ރަނގަޅު ނަތީޖާ ނެރޭ ހަތަރު ޓީމު ސެމީ ފައިނަލުގައި ވާދަކުރާނެއެވެ. ފައިނަލް މެޗު ކުޅުމަށް ތާވަލުކޮށްފައިވަނީ 7 އޮގަސްޓުގައެވެ.